Edition: Lerond, A. Chansons attribuées au Chastelain de Couci. Paris: P.U.F., 1964.
Suivent les chansons R1872=R1884=R1876a et R700
R1872=R1884=R1876a, fol. 226ro-vo
.xliiii.
-
Por quel forfait e por quel ocaison
M'avés, amors, si de vos eslognié
C’ainc de vos n'oï joie ni gueredon,
Ni ja ni trais qui de moi ait pitié?
A tort m'avés si sans consel laisié
Unques de vos ne me vint se mals non
N'encor, amors, ne vos ai reprocié
Mon servige, mais ore m'en plaing je
E di che mort m'avés sans ocaison. -
Bien devriés en vos garder raison
De moi gravier, qui sui fins et proié
Avrai lonc tans en bone entention;
N'ainc a nul jorn ne me feïstes lié.
Malement ai mon servige enploié,
Se par sofrir n’i veing a garison:
Merci, amors, trop m'avés trevailié,
Ne me laissés issi desconseillié,
Che ma dame ne me giet de priison! -
E vos, dame, cui drois mostre et valors
Q’amer devés vostre loial ami.
Alegiés moi mos mals et mes dolors,
Qar jou sui cil qui plus avra servi!
De vos atenc guerredon e merci,
Car ma joie ne puet venir d'aillors,
Et si g’i faill, mort sui et mar vos vi.
Dit ai que fols, ain m’en tien a gari,
Mas trop vient lent, dame, vostre secors. -
Ne cuidiés pas, dame, ce soit folors
Che jo vos aim et serf et voel e pri;
Tant ai servi, vostre sera l'onors
Se vos m'avés mun service meri.
De vos pier* me dot et faç ardi,
Q'en amor a ardimens et paors;
Ne tot ne çoel mun cuer ne tot nel di;
E se jo rien por paor en obli,
Vointié pitiés, dolce dame, et amors! -
Se nus amans destrois et engoissos
Doit goie avoir por amer loialment,
Donc doi jo bien par droit estre goios,
Che jo sui cil c’a plus a de tormenz.
E tant vos aim, dame, et serf /226vo / bonement,
C’ainc a nul ci* jorn ne fui d’altre amoros, [+1]
E mes canços faç por vos solement,
N’ainc a nul jorn non cantai falsement,
Si me laist Deus, dame, goïr de vos.
R700, fol. 217vo
.iii.
-
Bien chantasse volentiers lieement,
Se jeu trovasse en mon cuer l’achoison;
Mes je ne puis dire, se je ne ment,
C’aie d’amors nulle rien s’ire non.
Por ce ne puis faire liee chançon
Qu’amors le me desenseigne,
Qui veut que j'aim et ne veut que j’ataingne;
E si me tient amant en desespoir,
Qu’el ne m’i lest morir ne joie avoir. -
Ne m’i doit pas amors trop mal voloir
S’a la plus bele del mont mon cuer rent,
C’unques biautez ne fist si son pooir
En nule autre si acesmeement
Com elle a fet en son cors bel et gent.
Car riens q’a grant biautet taigne
N’est qui en lui n’en son cler vis sofraigne,
Fors une riens li messiet, ce m'est vis,
Q’ele tient trop vers moi ses euz eschis. -
Quant je regart son debonere vis
Et je la pri san biau respons avoir,
N'est merveille s’en l’esgart m’esbaïs,
Car g’i conois ma mort et sai de voir.
Que se pitiez ne m’i deigne valoir,
Ne sai ou bon confort praigne,
Car ses orgeuz m’ocit et li mahaigne.
Ha, bele riens coraus, tant mar vos vi,
Quant por ma mort nasquistes sanz merci. -
Que ferai, Deus, partirai me de li,
Nenil, certes! Ne porroit avenir.
Q’ainc nus servise itant ne m’a beli.
Li plaint, li plor, la dolor, li sospir
En poi d’eure mi porroit bien merir.
Car s’a li plaiteet ele daingne, [-2]
A son servise a mon cors en demeine;
Et saiche bien que je n’en puis garir
Se par li non des maus don crieng morir. -
Puis que li cuer ne s’en veut revenir
De vos, dame, por cui il m’a gerpi,
Aumosne avroiz, sel deignez retenir,
Car s’il revient, a moi a il failli.
Por amor Deu et por onor vos pri
Que de lui pitié vos praigne,
Il n’afiert pas a vos que l’en s’en plaigne
Qu’ainc Deus ne fist si mortel traison
Com biau semblant et corage felon. -
Dame, coment qu’il m’en praingne,
Merci amor de ce qu’ele me daigne
Tenir por sien, ne ja de sa prison
Ne quier partir, se morz ou amez non.