Richart de Fournival

Edition: Yvan Lepage. L'oeuvre lyrique de Richard de Fournival . Ottawa: Editions de l'Université d'Ottawa, 1981.

R759: fol. 229v^o
[LVIII]

^{image du manuscrit}

1.   Chascuns qui de bien amer
               Cuide avoir non
        Ne set ou plus a d’amer
               Ne ou mains non.
        Li uns dit et voet prover,
               Et par raison,
        Q'assez vaut mieus por amer
               Dame a baron
        Que pucele por amer,
            Mais je di que non.
        Chascuns a droite achoison,
        S’il jugie le jeu a bon
               Qu'a esprouvé;
        Que que nus i ait trové,
   J’ai mis mis* mon cuer en joene damoisele
        Dont ja ne partirai mon gré.

2.     Celi puet l’en anguser
               De mesprison
        Qui jugement voet doner
               Selonc som bon;
        Pour ce voeill por droit mostrer,
               Et senz tençon,
        Car a joene dame amer
               A plus haut don
        Car a pucele penser
     N’a fors le nom; [-1]
        Mais dame rent gerrerdon,
        Mais pucele est tost chanjanz
              Et senz bonté:
        S'en ai tot mon cuer oster,
   S'ai mis mon cuer en vaillant dame bele
        Dont ja ne partirai mon gré.

3.     La dame blamer ne quier,
               Li ne s'amor;
        Qant plus m'en voeil acointier,
              Plus ma savor,
        Mais ce m’en fait esloignier
              Au chier dou tor
        Que il i a parçonier
              Et nuit et jor;
        Mais qui pucele acointier
          Puet de grant valor,
        Je di q'il fait sen meillor;
        Car qui puet amor [-2]
             De pucele achever, [+2]
        Il ne puet plus haut monter,
   Por quoi j’ai mis mon cuer [-4]
        [Dont ja ne partirai mon gré.]

4.     Cum fait trop a mesprisier,
               Si com g’entent,
        Qui por la dame laissier
               Pucele prent,
        Car ele se voet proier
               Trop longuement
        Ne ne se puet nus fïer
               Certainement,
        Mais dame aime senz trichier
           Et si tient covent.
        Pucele est chose changenz, [-1]
        [............................................]
               Et senz bonté
        [.......................................]
   S’ai mis mon cuer en gente dame bele
        Dont ja ne partirai mon gré.

5.     Chascuns dit d'amors son bon
               Et son talant,
        Mais pucele a plus doz non,
               Et adés rent
        Miel et rees a fuisson
               Qui pres la sent;
        [....................................]
               [.....................]
        Si vos di .......................]
           [..... tot ausiment]
        Com flors novele d'aⁱglant
        Et la primerose rent,
               Plus de bonté
        A pucele sormonté.
   Por quoi j'aim miauz la douce pucelete
        Dont ja ne partirai mon gré.

6.     Se pucele a plus doz nom,
               Petit m'en sent;
        Bien premet senz guerredon
               A mainte gent
        Q'ele met senz achoison
               En grief torment,
        Et lor dist par traïson
               Mon cuer vos rent.
        Bien set amuser bricon
           Par son fauvement;
        Mais dame aimme loiaument
        [Pucele est chose chantanz]*        
        Car trop chier son baisier vent
               Bien l'ai prové,
        Car sovent l'ai essaiée;
   Por quoi j'aim miauz la joeme dame bele
        Dont ja ne partirai mon gré.

7.     Ces .ii. gius m'estuet [fenir]
               Par jugement.
        Bele dame a maintenir
               Plaist voirement,
        Mais ce c'on n'i puet venir
               Senz partement
        Me fait d'autre part tenir;
               Et por ce tent
        Plus mes cuers a retenir
           Chouse de jovent;
        Plus la voeil, plus l’atalent,
        Bien li ai mon maltalent
               Tout pardoné.
        Tel jugement ai doné
   Com doit toz jorz miauz amer la pucelete, [+1]
        Dont ja ni partirai mon gré.

retour à l'index

haut de page