Gautier d'Espinal

Edition: Lerond, A.  Chansons attribuées au Chastelain de Couci. Paris: P.U.F., 1964. P. 202.

R590=1328: fol. 222v^o
.xxvi.

^{image du manuscrit}

1. Comencement de doce saisun bele,
               Qe je voi revenir,
   Si a manbranze d’amors qui me rapele [+1]
               Dun je ne puis partir,
   Et li mavitz qui comence a tentir,
   Et li doz suns de roⁱsel sor gravele,
               Que je voi resclarzir,
               Mi funt resovenir
          De la ou tuit mi bon desir
          Sunt et serunt jusq’al fenir.

2. Toz tems m’et plus amors freche et novele,
               Qant recort a loisir
   Ses jauz, sun vis qui de joie sautele,
               Sun aler, sun venir ,
   Sun doz parler e sun gent contenir,
   Sun bel regart qui muet d’une enstencele 
               Mun cuer ou cuers feri,
               Senz garde de peri;
          Et quant je plus plaing e sospir,
          Plus sui joianz quant la remir.

3. Leial amor et fine et droituriere
               M’a si a sun valoir
   Que ne m’en vueill partir ne traire ariere,
               Ne je n’en ai pooir .
   N’et pas amors dun l’en se puet movoir,
   Ne cil amis qui en nulle maniere
               La bee a decevoir;
               Droim sai je bien de voir
          Qu’ensemble covient remanoir
          Moi et amors par estovoir.

4. Se li annuis de la gent malparliere
               Ne mi feïst doloir,
   Bien poïse mai joie avoir entiere
   [Lacune de 7 vers marquée par un blanc]

retour à l'index

haut de page