XV. D'un vallet de Corbeville qui fu gueri de sa plaie

1. Autre miracle oïr vos pleise

2. Qu'i n'est pas reson que ge teise.

3. Si con ge truis en l'escriture.

4. D'un chatel qui siet sus Eüre,

5. Qui Corbeville est appelé,

6. Fu tout li pueple atelé

7. A un char qu'a Chartres menoient,

8. Que troussé et chargié avoient

9. De lons tres et de grous merrien,

10. Qu'avis leur est que c'ert la rien

11. Qu'il eüssent en leur baillie

12. Dom meulz poaient fere aïe

13. A l'iglise de Chartres fere.

14. Au char se pristrent tuit a treire,

15. De servir Nostre Dame enpris

16. Et par essamples bien apris

17. D'autre gent qui einsint servoient

18. La dame des dons qu'il avoient.

19. Tant orent leur chemin tenu

20. Que a un leu furent venu

21. Qui de leur ville ert pres assez.

22. Le jor, travailliés et lassés

23. Furent et virent anuitier;

24. Si orent de repous mestier,

25. Et a repouser les cuita

26. Quant ill virent qu'il anuita.

27. Le char lesserent sans targier,

28. Qu'aler se vouloient herbergier.

29. Illec avint un grant domage

30. A un vallet de genvre age

31. Qui ot mis un sen vestement

32. Sus le char, que si vistement

33. Treit a sei qu'il l'en mescheï,

34. Car sus un de ses piez cheï,

35. Tout dou trenchant, une coigniee

36. Qui ert sus le char encruchiee

37. - Ne sei qui mise l'i avoit -

38. Dom le vallet mot ne savoit.

39. Cil qui ot sa robe enpoigniee

40. A soi la treit et la coigniee

41. Sus son pié feru tel coup a

42. Que trois des ortaus li coupa,

43. Fors qu'au trois piaus par de sos tindrent.

44. Tuit si conpaignon vers lui vindrent,

45. Plein de douleur et de pesance,

46. Quant oïrent la mescheance.

47. Leur prestre meïsmes i vint,

48. Qui de ce qu'au vallet avint

49. Ert moult dolent et esmaié.

50. De la plaie au vallet plaié,

51. Grant russiau de sanc decoroit.

52. Chacun por voir i acoroit.

53. Dou vallet, qui si ert blecié,

54. Erent tristes et courrocié.

55. Li prestres, qui au preu veilla

56. Dou vallet, a cels conseilla

57. Qui de lui plus s'entremetoient,

58. Que les trois ortaus qui tenoient

59. Au pelestes de souz entieres

60. Meïssent en leur leus arrieres

61. Et asseüssent sagement

62. Et liassent estroitement.

63. Quant cil fu lié et bendé

64. Com li prestres l'ot commandé,

65. Porter voudrent li bacheler

66. Aus otels o els osteler;

67. Mes cil ne leur vout otraier.

68. Onques ne le sorent praier

69. D'aler o els; bien contredit

70. Et aferme forment et dit

71. Que sous le char ostel prendra,

72. La misericorde Dieu atendra

73. Et le conseil et la vitoire

74. De la douce dame de gloire

75. En cui servise il se navra.

76. Ja autre ostel, ce dit, n'avra

77. Fors que souz le char seulement.

78. Illec prendra herbergement.

79. Celle nuit, souz le char gerra

80. Et illec morra ou guerra.

81. Si com il li vint a pleisir,

82. Souz le char le mistrent gesir.

83. Illec, toute nuit, le lesserent.

84. A l'endemein matin leverent,

85. A leur char arriere revindrent,

86. Vers le navré leur voie tindrent

87. Por veoir se il se douloit

88. Ou meins ou plus qu'il ne souloit.

89. Le voir en voellent esprover.

90. Plus dolent le cuident trover,

91. Si comme au navrés ert coustume

92. Que la douleur plus leur alume

93. Quant la plaie s'est refreidie.

94. Li vallez seins, sans maladie,

95. Liés et hetiez et en bon point

96. Trovent comme s'il n'eüst point

97. Esté ne navré ne plaié.

98. Bien ot son servise enplaié

99. Quant la haute cere[l. mere] virgieine

100. Qui les ames et les cors seine

101. L'ot si gari et respassé

102. Que cuir tranchié ne ous quassé

103. Ne paroit, fors c'une lignete,

104. Petite, soutille et grellete,

105. Le leu de la plaie mostroit.

106. Cousturier mortel ne costroit

107. Si soutilment n'en tel maniere;

108. Moult est la dame boene ovriere,

109. Qui sot fere tele jointure

110. Qu'i n'i paroit point de costure.

111. Tuit ensemble grant joie firent

112. Quant tel miracle avenir virent,

113. Si espert et si esprové,

114. Que sein et hetié l'ont trové

115. Celui qu'einsint navré lesserent.

116. Dieu et sa mere en mercierent.

117. L'afere qu'orent commencié

118. Ont parfet et tant avancié

119. Qu'a Chartres vindrent o grant joie.

120. En l'iglise, qui la montjoie

121. De paradis estre resemble,

122. Entreirent tuit joieus ensemble.

123. O humblesce, o subjection,

124. O foi et o devocion,

125. Rendirent graces a la dame