XXVI. Dou vilein qui saiet s'avoine a la feste de saint Germein, a Sors

1. Puis ce que Dex prist char humaine

2. En la Virge de grace plaine,

3. Enaprés cel tens, en l'an milliesme

4. Et sixte ovesques deus centiesme,

5. Le jor de feste saint Germein,

6. Que aoust coumence l'endemein,

7. Novellement fut un cas sors:

8. En la parroisse avint a Sors

9. Cist cas qui est moult merveilleux;

10. Leves i a de Chartres deux.

11. Cist quas dom ge vos vois contant

12. Si avint a un païsant:

13. Guillaume ot non de Lavardin.

14. Il n'ert n'en cortil ne jardin,

15. Mes es chans, ou saiet s'avoine

16. A grant travaill et a grant poine.

17. Cil vilains es chans laboroit,

18. Qui Dex ne ses sains ne cremoit

19. Ne quel font cil vilein meint;

20. Cil a la feste de son seint

21. A saier s'avoine entendet.

22. Son parroisage mal rendet;

23. Ne li chaloit de parroisage,

24. Plus pensoit a son gaignage;

25. Povreté feire li feiseit,

26. Toute vois a Dieu despleseit.

27. Quanque cil s'avoine saiet,

28. Dom a seint Germein dessaiet,

29. Gens de la paroisse passaient

30. Par la, qui le aumostaient[l. aumonestaient];

31. A reprendre Guillaume se pristrent

32. Et en reprenant si li distrent:

33. " Guillaume, ce n'est mie droit

34. Que tu fes bosoigne orendroit

35. A la feste de nostre saint.

36. Dex nos beneïe et nos seint!

37. Coment t'est monté en la teste

38. Que tu euvres a nostre feste?

39. Ne fu tu, dimenche, a l'iglise

40. Oïr la messe et le servise?

41. Nostre prestre, nostre persone,

42. Quant, dimenche, preescha au prone,

43. Commanda bien communement

44. Et sus esconmeniement

45. Enjoint a ses paroissiens,

46. Aus genvres et aus enciens,

47. Que il hui n'ovrasset[l. ovrassent] de leur meins.

48. Lors luer respondi li vileins,

49. Pleins de vilanie et d'outrage,

50. Et mostra son vilein courage:

51. " Se si puissant fust saint Germeins

52. Come dist nostre chapeleins,

53. A moi et a autres que moi

54. Le monstrast, dom point ne m'esmoi. "

55. Cil s'en alerent sans aloingne,

56. Et cil remeint en sa bosoigne

57. Et, toute jor, saia s'avoine,

58. Dou matin jusqu'a nonne pleine.

59. Une freidure lors senti,

60. Dom le cors trestot li menti.

61. Tuit si menbre orent troblement,

62. Que senti un grant mouvement

63. Qui de ses entrailles venoit.

64. En sa mein senestre tenoit

65. Ja la darreanne manvee

66. Que il avoit des chans levee.

67. De sa mein oster la vouloit

68. Et mestre jus ou il souloit,

69. Mes ne peüst, por vif ardoir,

70. De ses meins fere desardoir

71. La manvee de la senestre

72. Et la faucille de la destre.

73. Espoventez fu li vileins

74. Quant il ne pot ouvrir les meins.

75. A l'iglise foï le cors,

76. Savoir s'aïe ne secors

77. Il trovast en nulle maniere;

78. Et vileins, devant et desriere,

79. Trestoz entor lui s'asenblerent.

80. A ouvrir ses meins s'essaierent

81. Tel qui estoient grant et fort,

82. Mes par enging ne par effort

83. Les meins desardoir ne li porent.

84. Le miracle virent et sorent:

85. A Dieu et a sa mere chiere

86. Firent por Guillaume priere,

87. A seint Germein et a tous seins,

88. Et si firent sonner les seins

89. En l'enneur Dieu et saint Germein.

90. Jor et nuit, jusqu'a l'endemein,

91. Fu en itel estat Guillaumes,

92. Les deiz des meins aers au paumes,

93. Qu'il ne meïst jus por riens nee

94. La faucille ne la manvee.

95. Tuit de pitié forment pleurerent

96. Et por lui, sans cesser, proierent

97. Que Dex, par sa seinte poissance,

98. Li volsist donner delivrance.

99. Quant la nuit fu einsi passee,

100. A pluseurs vint lors en pensee

101. Que Guillaume a Chartres menroient

102. A l'iglise et si feroient

103. Passer desous la seinte chasse,

104. Car il craient bien, s'il i passe,

105. S'il doit guerir, que il guerra,

106. Car la vertu Dieu aperra.

107. Au matinet, aprés la messe,

108. Ot ou mostier de gent grant presse:

109. Hommes et fames, clerc et lei

110. I erent venuz sans delei.

111. Tuit communement s'asemblerent

112. Et Guillaume a Chartres menerent.

113. A l'iglise, a Chartres, vindrent;

114. Guillaume et tuit a genouz se mistrent.

115. Quant Guillaume s'agenoulla,

116. Sa face de lermes moilla,

117. Forment gemi et soupira;

118. La seinte chasse remira

119. Et l'autel besa moult souvent

120. N'encore n'ot delivrement.

121. Lors s'escrierent tuit a masse

122. Qu'il passast souz la sainte chasse,

123. Et il i passa humblement

124. Que desous se tint longuement,

125. Mes la grace et la delivrance

126. Li fist encore deleiance.

127. Outre passa moult esmaié;

128. Moult ot gemi et lermoié

129. Tant qu'il cheï en paumoison

130. Et cria haut en oroison:

131. " Priés tuit que g'aie merci! "

132. Enflé estaient et nerci

133. Les dois des meins outre mesure.

134. Enprés reconte l'escripture

135. Que un chanoine de la ville

136. - Guillaume de Colleteinville

137. Avoit non, si con dit l'escrit,

138. Preuzdom et cremoit Jhesu Crist -

139. C'esseia devant l'asemblee

140. S'un seul espi de la manvee

141. Peüst oster ou arrachier,

142. Ou por tirer ou por sachier,

143. Et pluseurs autres qui i erent,

144. Que clerc que lei, i essaierent,

145. Mes onques tant ne porent feire

146. C'un espi en peüssent treire.

147. Si le vit le prestre de Sors,

148. Qui oï les pleinz et les pleurs

149. Que ses parroisiens fesoient

150. Et pres qu'il ne desesperaient;

151. Lors s'escria moult hautement:

152. " Seigneurs et dames ensement,

153. Qui por cest homme ci venistes,

154. Si dolens ne saiés ne tristes;

155. De Dieu ne vous deffiez mie:

156. La misericorde et l'aïe

157. Est moult grant de Dieu, nostre pere.

158. N'i ait nus qui se desespere,

159. Mes en Dieu et en sa poisance

160. Et en sa mere aiez fiance,

161. Qui est fleur de virginité.

162. Vos serois par lé visité

163. Et vos envoiera secors

164. Si que liez retorneroiz a Sors.

165. Et si sera bien, ce me semble,

166. Que vos ailliez tretuit ensemble

167. Au tronc, la ou l'en met a l'euvre:

168. Illec se parfera vostre oevre

169. Illeques sera sans doutance

170. Escoronee vostre esperance. "

171. A cest conseil tuit s'acorderent:

172. Au tronc ensemble a l'oevre alerent,

173. Devant la chasse seint Liubin.

174. A terre se mirent enclin.

175. O pleur et o gemissement,

176. Prierent Dieu et ensement

177. Sa douce mere glorieuse,

178. Qui enfanta la fleur joieuse

179. Qui reforma l'estat humein,

180. Et seint Liubin et seint Germein

181. Requistrent o voiz haute et clere

182. Et seint Tomas de Conteorbere,

183. De cui sanc ot illuec partie

184. Et son coustel d'anceserie.

185. A touz sainz et a toutes seintes

186. Firent il ausint leur conpleintes:

187. De touz requistrent ajustoire,

188. Que Dex mostrast illuec sa gloire.

189. Cil qui les reliques gardoit

190. La destre, ou la faucille ardoit,

191. Toucha ou le coustel a plein:

192. Tantoust fu ouverte la mein,

193. Les dois estenduz et ouvers.

194. Tuit virent le miracle espers,

195. Si comencierent a crier,

196. Dieu et sa mere a mercier.

197. Puis retoucha a la senestre,

198. Ou la manvee vit clouse estre,

199. Le coutel a ce seint martir:

200. Les doiz pristrent a departir

201. Et de la paume, que tuit virent,

202. Si que de ses meins li chaïrent

203. La manvee de la senestre

204. Et la faucille de la destre.

205. Tuit li seint sonnerent de joie.

206. Jamés ne cuit que nus hom voie

207. Telle joie comme i ot feite;

208. Ne porroit pas estre retreite

209. La grant joie que tretuit firent.

210. Quant Guillaume deslié virent

211. De la douleur et dou lien,

212. Et prestre et clerc et parroissen

213. Dieu et sa mere mercierent.

214. Joieus a Sors s'en retornerent,

215. Gloirefianz le roi celestre,