V. De la femme de Prunei que Nostre Dame gueri

1. Encore ne me voill pas teire

2. De raconter et de retreire

3. Les autres oevres merveillables

4. Que Dieu, li peres esperitables,

5. Li rois poissans, li glorieus,

6. Fist a Chartres et en meint leus

7. Por sa douce mere essaucier

8. Et por sa besoigne avancier

9. De s'iglise de Chartres feire.

10. Yglise de si haut affeire

11. Ne fust ja feite si briement,

12. Si bien, si biau, si noblement

13. Se l'oevre qui ert commenciee

14. Ne fust de par Dieu avanciee.

15. Ja ne fust feite n'achevee

16. Se Dex, par vertu demontree,

17. N'i meïst cure, il meïssmes,

18. Par ses haus miracles seintismes,

19. Dom, ou livre, trové un ai

20. Qui avint, cel tens, a Prunai,

21. A un leu qui est en Chartain ,

22. N'est de Chartres gueires lointain.

23. En icelle novelleté

24. Que miracles orent esté

25. En l'iglise de Chartres veu,

26. Icil que j'ai amenteü

27. Avint par la vertu devine,

28. Qu'a Prunei ert une mechine

29. Qui ert assés genvre d'aage,

30. Si ert ja, par mariage,

31. O un home par compaignie;

32. Esprise estoit de maladie

33. Qui la tenoit et soir et mein

34. Si que ne de pié ni de mein

35. Ne poeit feire nul office;

36. De piés, de talon ne d'espice

37. Ne poeit aler ne venir

38. Ne au meins riens prendre ne tenir.

39. C'ert maladie merveilleuse

40. Et trop vileinne et trop greveuse.

41. Un an et plus, avoit esté

42. En celle grieve enfermeté.

43. Povre ert, si ne poeit soffire

44. A querre aïde ne medicine[l. mire],

45. Car au mires forment ennuie

46. Quant l'en les requiert o mein vuie,

47. Qu'il entendent toz jors a prendre

48. Et el ne lor avoit que tendre

49. Ne qu'envoier ne que donner,

50. A ce ne poet foisonner.

51. Au lit ot geü longuement,

52. En langueur et en grant torment,

53. Tant c'un an et plus fu passé.

54. Tuit si membre furent quassé

55. De feire si longue gesine.

56. Trouver ne poeit medicine

57. En home ne conseil n'aïe

58. De guerir de sa maladie.

59. Lors ot, en son cuer, remenbrance

60. Que son espoir et sa fiance

61. Metroit en la haute raïne

62. Qui touz les enfers medicine

63. Qui la apellent de cuer verai,

64. Qui de toz rois porta le roi,

65. Qui est pucelle pure et monde.

66. Celle pria, puis que le monde

67. L'avoit despite et enhaïe,

68. Que elle ne l'oubliast mie,

69. Einz regardast s'umble boiasse,

70. Qui tant estoit dolente et lasse,

71. Esgaree et desconseilliee,

72. De grieve enfermeté liee,

73. Que por lé son chier filz priast

74. Que de ce mal la desliast

75. Ou a la mort tost la livrast.

76. Quant el ot fete sa priere,

77. La dame s'umble chamberiere,

78. Qui avoit en lé s'esperance,

79. Ne mist mie en oubliance.

80. La glorieuse dame chiere

81. Son pleint reçut o liee chiere,

82. Car une nuit einsint avint

83. Qu'au let a la meschine vint.

84. La dame qui de grace est pleinne

85. Li dist: " Si tu viauz estre seinne,

86. Ge te voill dire et enorter

87. Qu'a Chartres te faces porter,

88. A m'iglise, sans demorance,

89. Car, se tu as ferme creance,

90. Illeques recevras sancté,

91. Don ton cuer est entalenté. "

92. La meschine moult s'esjoï

93. Quant la seinte promesse oï.

94. Quant il fu jor, si apela

95. Son mari et li revela

96. La chouse qui ert avenue,

97. Com la haute dame ot veüe

98. Qui li dist que seine seroit

99. Se a Chartres la requeroit.

100. Quant si sires oï la novelle,

101. Moult la tint a bone et belle

102. Et moult li sit et moult li plot.

103. Si procura, plus tout qu'i pot,

104. Por la santé de s'espousee,

105. Qu'elle fust a Chartres portee.

106. Ce fut un jor de samadi

107. Que la fame don ge vos di

108. Vint a Chartres. Quant fu venue,

109. Lez l'iglise fu descendue.

110. Cil qui l'amenerent la pristrent

111. Entre leur bras et si la mistrent

112. Droit devant l'autel Notre Dame.

113. Illec se jut la povre fame

114. Et fist sa supplicacion:

115. O foi et o devocion

116. Requist la dame glorieuse

117. Qu'el la feïst liee et joieuse,

118. Et lé et tretoz ses amis,

119. De ce qu'el li avoit promis.

120. La haute dame piteable

121. Sa promesse fist bien estable,

122. Car la fame en santé remist

123. Einsi com elle li promist.

124. Toz lez membres li fist si seins

125. Qu'el s'eida des piez et des meins.

126. Seur ses piez s'estut toute droite,

127. Ne fu ne corbe ne contreite.

128. Des meins fu garie et seine,

129. Que por feire toute oevre humeine.

130. Toute l'enfermeté cessa

131. Et la fame dou tout lessa

132. Si que nul signe n'i remeint

133. D'enfermeté, ce virent meint.

134. Cil meïssmes qui fist le livre

135. La vit dou mal toute delivre,

136. Ce dit et que a lé palla

137. Et sot coment la chouse ala

138. Et en aprist tretout le voir

139. Par cels qui le durent savoir,

140. Par la fame premierement

141. Et par ses voisins ensement

142. Qui a Chartres l'avoient menee.

143. Toute la verité provee

144. En enquist bien deligeament

145. Et sot le voir certeinement,

146. Si com devant oï l'avés.

147. La haute dame, ce savez,

148. Sans sé mouvoir de sa maison,

149. Eüst bien donné garison

150. A la fame s'elle vossist;

151. Mes einsint li plot et li sist

152. Que a Chartres venist santé querre

153. Si que pres et loing par la terre

154. Fust le miracle espert seü

155. Et que l'aport en fust creü,

156. Car tous cil qui sorent et virent

157. Le miracle plus s'enhatirent

158. A porter quant que ert mestier

159. A fere l'oevre et le monstier.

160. Par ce miracle et par autex

161. Furent fez pillers et autex,

162. Fundemens, vostes et mesieres

163. Et oevres de meintes manieres,

164. Et toute l'iglise achevee

165. Dom la Virge est dame nommee.

166. La fame fu joieuse et liee

167. Quant se senti seine et hetiee,

168. Car la santé l'ala hatant.

169. Seur ses deus piez fu en estant;

170. Au ciel, en haut, ses meins tendi,

171. A Dieu grez et graces rendi

172. Et a sa mere glorieuse

173. Par cui el ert seine et joieuse.

174. Tuit cil qui ce miracle virent

175. De la merveille s'esbahirent

176. Et tretuit de joie plorerent

177. Et Dieu et sa mere loerent

178. De leur grace et de leur aïe.

179. La fame, quant el fu garie,

180. A Chartres plus ne sejorna;

181. En son païs s'en retorna

182. Loant Dieu, le haut roi celestre,

183. Et la Virge, dom il voult nestre,

184. La haute raïne ennoree,

185. Qui bien s'ert vers cele aquitee

186. De ce que li avoit promis,