UNIVERSITÉ D'OTTAWA Faculté des Arts

Laboratoire de français ancien

Chrétien de Troyes
Le Chevalier au Lion (Yvain)

Rencontre du Lion et combat contre Harpin


Mesire Yvains pensis chemine
Tant qu'il vint en une gaudine
Et lor oÿ enmi le gaut
Un cri mout dolereus et haut.
Si s'esdrecha leus vers le cri,
Chele part ou il l'ot oÿ,
Et quant il parvint chele part
Vit .i. lion, en .i. essart,
Et .i. serpent qui le tenoit
Par le keue, si li ardoit
Toutes les rains de flambe ardant.
N'ala mie mout regardant
Mesire Yvains chele merveille;
A lui meïsmes se conseille
Auquel des deuz il aidera.
Lor dist c'au lyon aidera,
Qu'a enuious et a felon
Ne doit on faire se mal non,
Et li serpens est enuious,
Si li saut par la goule fus,
Tant est de felonnie plains.
Che se pense mesire Yvains
Qu'il l'ochirra premierement;
L'espee trait et vient avant
90a.3359
Et met l'escu devant se faiche,
Que la flambe mal ne li faiche
Que il getoit parmi la gole,
Qui plus estoit lee d'un ole.
Cheli* lions aprés l'assaut,
De la bataille ne li faut;
Mais quoi qu'il en aviengne aprés,
Aidier li vaurra il adés,
Que pités l'en semont et prie
90b.3368
Qu'il faiche secours et aÿe
A la beste gentil et franche.
A l'espee fourbie et blanche
Va le felon serpent requerre;
Si le trenche jusques en terre
Et les .ii. moitiez retronchonne,
Fiert et refiert, et tant l'en donne
Que tout l'amenuse et depieche.
Mais de le keue une pieche
90c.3377
Li couvint trenchier du leon,
Pour la teste au serpent felon
Qui engoulee li avoit;
...*
L'en trencha, c'onques mains n'en poit.
Quant le leon delivré eut,
Cuida qu'a li li couvenist
Combatre et que sus li venist;
Mais il ne le pensa onques.
Oyés que fist li leons donques:
Il fist que frans et deboinaire,
Que il li conmencha a faire
Samblant que a lui se rendroit,
Et ses piés joins li estendoit,
Puis se va vers tere fichier;
Si s'estuet seur .ii. piés derrier
Et puis si se ragenoulloit
Et toute se faiche moulloit
De lermes, par humilité.
Mesire Yvains, par verité,
Set que li leons l'en merchie
Et que devant lui s'umilie
Pour le serpent qu'il avoit mort
Et lui delivre de la mort;
Si li plaist mout cheste aventure.
Pour le venin et pour l'ordure
Du serpent, essue s'espee,
Si l'a el fuerre reboutee,
Puis se remet il a la voie.
Et li leons les lui costoie,
Que janmais ne s'en partira,
Tousjors mais avec li sera,
90d.3409
Que servir et garder le veut.
Devant a la voie s'aqueut
Tant qu'il senti desous le vent,
Si conme il s'en aloit devant,
Bestes sauvages en pasture;
Si le semonst fains et nature
D'aler em proie et de cachier
Pour sa vitaille pourcachier;
Che veut nature qu'i le faiche.
Un petit s'est mis en la trache
Tant qu'a son seigneur a moustré
Qu'il a senti et encontré
Vent et flair de sauvage beste.
Lors le regarde si s'areste,
Car il le veut servir a gré,
Que encontre sa volenté
Ne vaurroit aler nule part.
Et chil aperchoit son esgart
Qu'il li moustre que il atent;
Bien l'aprechoit, et bien l'entent,
Que s'il remaint, il remanrra,
Et, s'i li siet, que il prendra
La venison qu'il a sentie.
Lors le semont et si l'escrie
Aussi conme .i. brachet feïst;
Et li leons maintenant mist
Le nes au vent qu'il ot senti;
Ne ne li ot de riens menti:
Il n'ot pas une archie alee
Quant il vit en une valee
Tout seul pasturant un chevroil.
91a.3440
Chestui avra il a son voil,
Et il si ot au premier saut,
Puis si en boit le sanc tout chaut.
Quant ochis l'eut si le geta
Seur son dos, si l'en emporta
Tant que devant son seigneur vint,
Qui puis en grant chierté le tint
Pour la grant amor qu'en li ot.
Ja fu pres de nuit, si li plot
Que ileuc se herbegeroit
Et du chevroil escorcheroit
Tant conme il en vaurroit mengier.
Lors le conmenche a escorchier;
Le cuir li fent deseur la coste,
De le longne .i. lardel li oste;
Et trait le fu d'un charbon vis,
S'a de le seche busche pris;
Si rosti tant que tous fu cuis,
Mais du mengier fu nus deduis,
Que il n'i ot ne pain ne sel
Ne nape ne coutel ne el.
Quantqu'il menja devant lui vit
Sen lion, onques ne s'en muit;
Ains l'a tout adés regardé
Tant qu'il ot pris tant du lardé
Et tant mengié qu'il n'en pot plus.
Du chevroil trestout le sousplus
Menga li leons jusques ad os.
Et il tint son chief a repos
Toute la nuit sor son escu,
A tel repos conme che fu;
91b.3473
Et li leons ot tant de sens
Qu'il veilla et fu en espens
Du cheval garder, qui paissoit
L'erbe, qui petit l'encrassoit.
Au matin s'en revont ensamble
Et autel vie, che me samble,
Menerent toute le quinzaine
Tant c'aventure a le fontaine
Deseur le pin les amena.
La par poi ne se forsena
Mesire Yvains, autre feïe,
Quant le fontaine ot aprochie
Et le perron et le chapele.
Mil fois las et dolent se claime
Et chiet pasmés, tant fu dolans.
Et s'espee, qui fu coulans,
Chiet du fuerre, si li apointe
Ad mailles du hauberc la pointe,
Endroit le col, pres de la joe.
N'i a maille qu'il ne descloe,
Et l'espee du col li trenche
Le char desous le maille blanche,
Tant qu'il en fist du sanc cheoir.
Li leons cuida mort veoir
Sen boin ami et son seigneur;
Ains de riens nule duel gregneur
N'oïstes conter ne retraire,
Que il en conmencha a faire;
Il se detort et grate et crie
Et s'a talant que il s'ochie
De l'espee dont est maris,
91c.3506
Qui a son boin seigneur ochis.
A ses dens l'espee li oste
Et sor un fust jesant s'acoste
Et puis derrier .i. fust l'apuie,
Qu'ele ne guenchisse ne fuie
Quant il y hurtera du pis.
Ja fust ses voloirs aconplis
Quant chil de pamisons revint;
Et li leons si se retint,
Qui a la mort tout achesmés
Couroit conme tous forsenés,
Qu'il ne prent garde ou il se fiere.
Mesire Yvains en tel maniere
Decoste le perron se pasme.
Au revenir mout fort se blasme

De l'an que trespassé avoit,
Pour quoi sa dame le haoit,
Et dit: « Que fait qu'il ne se tue,
Cheli qui joie s'est tolue?
Que fais je, las, qui ne m'ochis?
Conment puis je demourer chi
Et veoir les choses ma dame?
En mon cors pour quoi arreste l'ame?
Que fait ame en si dolens cors?
S'ele s'en iert issue hors,
Ne seroit pas en tel martire.
Et mout blasmer et mout despire
Me doit, voir, mout, et je li fas.
Qui pert la joie et le soulas
Par son meffait et par son tort
Mout se doit bien haïr de mort.
91d.3537
Haïr et ochirre se doit;
Et dont puis que nulz ne me voit,
Pour quoi m'espreng que ne me tu?
Dont n'ai je chest leon veü,
Qui pour moi a si grant duel fait
Qu'il se veut m'espee entresait
Parmi le pis el cors bouter?
Et je doi le mort refuser,
Qui ai joie a duel changie?
De moi s'est la joie estrangie.
Mais orendroit n'en dirai plus,
Que che ne porroit dire nus;
S'ai demandee grant oiseuse.
De joie fu la plus joieuse
Chele qui m'iert asseüree;
Mais mout m'ot petite duree.
Et qui che pert par son meffait,
N'est drois que boine aventure ait. »
Quoique il ainsi se demente,
Une chaitive, une dolente,
Estoit en la chapele enclose
Et vit et oÿ cheste chose
Par le mur qui estoit crevés.
Maintenant qu'il fu relevés
De pamisons, si l'apela:
« Dix, fait ele, qui est che la?
Qui est qui se demente si? »
Et il li respont: « Et vous, qui?
- Je sui, fait ele, une chaitive,
La plus dolente riens qui vive. »
Et il respont: « Tais, fole riens!
92a.3568
Tes deux est joie, tes maux biens
Qui a grant joie te fait vivre.
Plus seÝ desvoie et plus s'enyvre
Deux, quant il l'a, qu'a .i. autre honme;
Unz febles hom porte la sonme,
Par us et par acoustumanche,
Que autres de gregnour poissanche
Ne porteroit pour nule rien.
- Par foi, fait ele, je sai bien
Que ch'est parole toute voire;
Mais pour che ne fait arme a croire
Que vous aiés plus mal de moi,
Et pour che mie ne le croi,
Qu'il m'est avis que vous poés
Aler quel part que vous volés,
Et je sui ore emprisonnee;
Si m'est tele saison donnee
Que demain serai chaiens prinse
Et livree a mortel juise.
- Ha, Dix, fait il, par quel fourfait?
- Sire chevaliers, ja Dix n'ait
De l'ame de mon cors merchi
Se je l'ai mie deservi!
Et nepourquant je vous dirai
Le voir, que ja n'en mentirai,
Pour quoi je sui chi em prison:
On m'apele de traÿson
Se je ne truis qui m'en deffende,
Que demain on ne m'arde ou pende.
- Or primes, fait il, puis je dire
Que li mien deulz et la moie ire
92b.3601
A le vostre doleur passee,
Qu'estre porriés delivree
Par qui que soit de chest peril.
Dont ne porroit che estre? Oïl!
Mais je ne sai encor par cui:
Il ne sont el monde que dui
Qui s'en osast pour moi deffendre
Bataille a .iii. chevaliers prendre.
- Conment? fait il, sont il dont troy?
- Oïl, sire, en la moie foi:
Troi sont qui traïtre me claiment.
- Et qui sont chil qui tant vous ayment,
Dont li uns tant hardis seroit
Qu'a trois armes se conbatroit
Pour vous sauver et garandir?
- Je le vous dirai sans mentir:
Li uns est mesire Gauvains
Et
li autres mesire Yvains,
Pour cui demain serai a tort
Livree a martire et a mort.
- Pour qui? fait ...*. Qu'avés vous dit?
- Sire, fait ele, se Dix m'aït,
Pour le fil le roy Urien.
- Or vous ai entendue bien!
Ne vous n'i morrés ja sans li.
Je meïsmes chil Yvains sui
Pour qui vous estes en effroi;
Et vous estes chele, je croi,
Qui en la sale me gardastes;
Ma vie et mon cors me sauvastes
Entre les deuz portes coulans
92c.3632
La u je fui pensis et dolans
Et angousseus et entrepris;
Mors y eüsse esté ou pris
Se ne fust vostre boine aÿe.
Or me dites, ma douche amie,
Qui sont chil qui de traïson
Vous apelent et en prison
Vous ont mise en chest reclus.
- Sire, ne vous chelerai plus
Puis qu'il vous plaist que je vous die.
Voirs est que je ne me fains mie
De vous aidier a boine foy.
Par l'amonnestement de mi,
Ma dame a seignour vous teni;
Mon los et mon conseil creï
Et, par le sainte Patrenostre,
Plus pour son preu que pour le vostre
Le cuidai faire et cuit encore,
Itant vous en reconnois ore;
S'onnor et vostre volenté
Pourquis, se Dix me doinst santé.
Mais quant che vint que vous eüstes
L'an trespassé que vous deüstes
Revenir a ma dame cha,
Ma dame a moi se couroucha
Et mout se tint a decheüe
De che qu'ele m'avoit creüe.
Et quant che seut li seneschaus,
Un fel, .i. lerre, .i. desloiaus,
Si grant envie me portoit
Pour che que ma dame creoit
92d.3663
Lui plus qu'autrui de maint afaire,
Si vit bien pour quoi pooit faire
Entre moi et lui grant courous.
En plaine court et voiant tous,
Me mist sus pour vous l'oy traÿe,
Et je n'oy conseil ne aÿe
Fors que moi seule, qui savoie
C'onques vers ma dame n'avoie
Traïson faite ne pensee.
Si respondi conme esfree
Tout maintenant, sans conseil prendre,
Que je m'en feroie deffendre
Par .i. chevalier contre trois.
Onques chil ne fu si courtois
Que il le deignast refuser,
Ne resortir ne esconser
Ne me vaut, pour riens qu'avenist.
Ainsi a parole me prinst;
Si me couvint d'un chevalier
Encontre trois gage baillier,
Par respit de .xl. jours.
Puis ai esté en mainte cours;

A la court le roy Artur fui,
Ne trouvai conseil de nului
Ne ne trouvai qui me deïst
De vous chose qui me seïst,
Car il n'en savoient nouveles.
- Et mesire Gauvains avecques,
Li frans, li dous, ou estoit donques?
A s'aÿe ne failli onques
Damoisele desconseillie,
93a.3694
Que ne li fust appareillie.
- Se je a court trouvé l'eüsse,
Ja requerre ne li seüsse
Riens nule qui me fust vee.
Mais la roÿne en a menee
Un chevalier, che me dist l'en,
Dont li rois fist que hors du sen,
Quant aprés li li envoia;
Li rois, je cuit, le convoia
Aprés le chevalier qui l'en maine;
S'en est or entrés en grant paine
Mesire Gauvains, qui le quiert.
Janmais .i. jour a sejour n'iert
Juques tant qu'i l'ara trouvee.
Toute la verité prouvee
Vous ai de m'aventure dite.
Demain morrai de mort despite,
Si serai arse sans respit
Pour mal de vous et pour despit.
Et il respont: « Ja Dix ne plache
Qu'a vous pour moi nul ...* vous fache!
Ja, que de* vive, n'i morrés.
Demain atendre me porrés
Apareilliés, de ma puissanche,
De metre en vostre delivranche
Mon cors, si conme le doi faire.
Mais de conter ne de retraire
Qui je sui as gens ne vous chaille!
Que qu'aviengne de la bataille,
Gardés que on ne me connoisse.
- Chertes, sire, pour nul angousse
93b.3725
Vostre nom ne descouverroie.
La mort anchois en soufferroie,
Puis que vous le volés ainsi.
Et nepourquant je vous depri
Que ja pour moi ne revegniés.
Ne veul pas que vous enpregniés
Bataille si tres felenesse.
Vostre merchi de la promesse
Que volentiers vous la feriés,
Mais trestous cuites en soiés,
Car mix est que je seule muire
Que je les veïsse deduire
De vostre mort et de la moie.
Que ja pour chou n'eschaperoie
Quant il vous aroient ochis;
S'est mix que vous remaigniés vis
Que nous fussons mort ambedui.
- Mout avés ore grant anui,
Fait mesire Yvains, chiere amie.
Espoir ou vous ne volés mie
Estre delivre de la mort,
Ou vous despisiés le confort
Que je vous fais de vous aidier.
Ne quier or plus de vous plaidier,
Que vous avés tant fait pour moy,
Chertes, que falir ne vous doi
A nul besoing que vous aiés.
Bien sai que mout vous esmaiés,
Mais, se Dix plaist, en cui je croi,
Il en seront honni tout troi.
Or n'i a plus, que je m'en vois,
93c.3756
Ou que soit, logier en chel bois,
Que d'ostel pres ne sui je point.
- Sire, fait ele, Dix vous doinst
Et boin chastel et boine nuit,
Et de chose qui vous anuit,
Si con je le desir, vous gart! »
Tantost mesire Yvains s'en part,
Et li leons tousjours aprés.
S'ont tant erré qu'i vienent pres
D'un fort chastel a .i. baron
Qui clox estoit tout environ
De mur espés et fort et haut.
Li chastiaus ne cremoit assaut
De mangonnel ne de perriere,
Qu'il estoit fors de grant maniere;
Mais hors des murs estoit si rese
Le place qu'il n'i ot remese
En estant borde ne maison.
Assés en sarés le raison
Une autre fois, quant lieu sera.
Le plus droite voie s'en va
Mesire Yvains vers le chastel;
Et .vii. vallés fort et isnel
Li sont tantost encontre alé.
Si li ont un pont avalé.
Mais du lion, c'avec lui voient,
Venir durement se doutoient;
Si li dïent que, s'i li plaist,
Sen lion a le porte laist,
Qu'il ne les afolt ou ochie.
Et il respont: « N'en parlés mie,
93d.3787
Que ja n'i enterrai sans lui:
Ou nous arons hostel ambedui
Ou je remanrrai cha dehors,
Que autant l'aime conme mon cors.
Et nepourquant n'en doutés riens,
Que je le garderai si bien
Qu'estre porrés tout asseür. »
Et chil respondent: « A boin eür! »
Atant sont el chastel entré
Et vont tant qu'il ont encontré
Chevaliers et dames venans
Et damoiseles avenans
Qui le saluent et descendent
Et a lui desarmer entendent;
Si li dïent: « Bien soiés vous,
Biau sire, venus entre nous,
Et Dix vous y doinst demourer
Tant que vous en puissiés tourner
...* »
Des le plus haut jusqu'au mener*,
Li font joie et forment s'en painent;
A grant joie el chastel l'en mainent.
Et quant le joie li ont faite,
Une dolours qui les dehaite
Leur font tost lor joie oublier;
Si reconmenchent a plourer
Et crïent et si s'esgratinent.
Ainsi mout longuement ne finent
De joie faire et de plourer:
Joie pour lor hoste honnerer
Font sans chou que talent en ayent,
Car d'une aventure s'esmaient
94a.3819
Qu'il atendent a l'endemain;
S'en sont tuit seür et chertain
Qu'il l'avront, ains que midi soit.
Mesire Yvains s'esbahissoit
De che qu'i si souvent changoient
Et duel et joie demenoient.
S'en mist le seignor a raison
Du chastel et de la maison:
« Pour Dix, fait il, biaus dous chiers sire,
Yche vous plairoit il a dire
Pour quoi tant m'avés honoré
Et tant fait joie, et tant plouré?
- Oïl, s'i vous vient a plaisir;
Mais le cheler et le taisir
Devriez mix assés voloir;
Chose qui vous faiche doloir
Ne vous dirai je ja, mon veul;
Che ne porroit estre que duel.
- A nul fuer, fait il, ne lairoie
Que je le verité n'en oye,
Car le desir mout a savoir,
Quel duel que je en doie avoir.
- Dont, fait il, le vous dirai ge.
Mout m'a .i. gayans fait damage,
Qui voloit que je li donnaisse
Ma fille, qui de grant biauté passe
Toutes les pucheles du monde.
Li fex jaians, que Dix confonde,
A non Arpin de la montagne;
N'est nul jour que del ne me* prengne
Trestout quanqu'il en puet ataindre.
94b.3852
Nus mix de moi ne se doit plaindre,
Ne duel faire, ne duel mener;
De duel devroie forsener,
Que sis fix chevaliers avoie,
Plus biaus el monde ne savoie;
S'il a tous .vi., li gaians, prins;
Voiant moi en a .ii. ochis
Et demain ochirra les quatre,
Se je ne truis qui s'ost combatre
A lui, pour mes fix delivre*,
Ou se je ne li veul livrer
Ma fille; et dit, quant il l'avra,
A plus vilz garçons qu'il sara
En sa maison et a plus ors
Le liverra pour ses depors,
Qu'il ne la desire mais prendre.
A demain puis chest duel atendre,
Se Dix ou vous ne m'en conseille.
Et pour chou n'est mie merveille,
Biau sire chiers, se nous plourons.
Mais pour vous, tant con nous poons,
Nous reconfortons a le fye
De faire contenanche lie;

Car folz est qui prodonme atrait
Entour lui, s'oneur ne li fait,
Et vous me resamblés prodonme;
Or vous ai trestoute la sonme
Dite de nostre grant tristreche,
N'en chastel ne en fortereche,
Ne nous a laissié li gaians
Fors tant con nous avons chaiens.
94c.3883
Vous et ensement bien veïstes
Anuit se garde vous preïstes,
Qu'il n'a laissié vaillant .i. oef
Hors de ches murs qui tout sont noef;
Ains a trestuit le bour plané;
Quant che qui vaut en ot mené,
Si mist el remanant le feu;
Ainsi m'a fait maint felon jeu. »
Mesire Yvains tout escouta
Quanques ses hostes li conta,
Et quant trestout escouté ot,
Si li redist che qu'il li plot:
« Sire, fait il, de vostre anui
Mout iriés et mout dolens sui,
Mais d'une chose me merveil,
Se vous n'en avés quis conseil
A la court le fort roi Artur.
Nus hom n'est de si grant vertu
Qu'a sa court ne peüst trouver
Tel qui vaurroit bien esprouver
Sa vertu encontre la soie. »
Et lors li descovre et desloie
Li riches hom que il eüst
Boine aÿe se il seüst
Ou trouver monseigneur Gavain.
« Chil ne l'enpresist pas en vain,
Que ma fenme est sa seur germaine;
Mais la fenme le roi enmaine
Un chevalier d'estrange tere;
Si l'ala a le court requerre,
Ne pour che ja ne l'en eüst
94d.3914
Mené, pour riens que il seüst,
Ne fust Keus, qui l'*embriconna
Le roy tant que il li bailla
Le roÿne et mist en se garde.
Chil fu faus et chele musarde
...*
Trop grant damage et trop grant perte;
Et che est chose toute aperte
Que mesire Gauvains, li preus,
Pour sa nieche et pour ses neveus,
Fust cha venus grant aleüre
Se il seüst cheste aventure;
Mais il ne set, dont tant me grieve
Pour poi que li cuers ne m'en grieve*;
Ains est alés aprés chelui,
Qui Damedix doinst grant anui,
Quant mené en a le roÿne. »
Mesire Yvains onques ne fine
De souspirer, quant che entent;
De la pitié que il l'em prent
Li respont: « Biaus sires chiers,
Je m'en metroie volentiers
En l'aventure et el peril
Se li gaians et vostre fil
Venoient demain a tel heure
Que n'i faiche trop grant demeure,
Que je ferai* ailleurs que chi,
Demain a heure de midi,
Si conme je l'ai creanté.
- Biau sire, de la volenté
Vous merchi je, fait li prodon,
Chent mile fois en .i. randon. »
95a.3947
Et toutes les gens de l'ostel
Li redisoient autretel.
Atant ist d'une chambre hors
Le puchele, gente de cors
Et de faiche bele, plaisans.
Mout fu simple, mate et taisans,
C'onques ses deuz ne parvint fin,
Vers tere vint le chief enclin;
Et sa mere revint decoste,
Que moustrer li voloit son hoste
Li sires, qui les ot mandees.
En lor mantiax envolepees
Vinrent, pour lor lermez couvril*;
Et il lor conmande a ouvrir
Les mantiax et les chiés lever,
Et dit: « Ne vous doit pas grever
Che que je vous conmant a faire,
Que un prodonme mout deboinaire
Nous a Dix et boine aventure
Chaiens tramis, qui m'aseüre
Qu'il se conbatra au gaiant.
Or n'en alés plus delaiant,
C'au pié ne l'en alés chaoir.
- Che ne me laist ja Dix veoir!
Fait mesire Yvains maintenant.
Voir ne seroit mie avenant
Que au pié me venist la suer
Monseigneur Gauvain a nul fuer
Ne sa nieche; Dix m'en deffenge,
C'orgueil en moi tant ne s'estenge
Que a mon pié venir les lais.
95b.3978
Voir je n'oublieroie mais
Le honte que j'en averoie.
Mais de che boin gré lor saroie,
Se eles se reconfortoient
Jusqu'a demain, que eles voient
Se Dix les vaurra conseillier.
Moy n'en couvient il plus proier,
Mais que li gaians si tost viengne
Qu'ailleurs mentir ne me couviengne,
Que pour riens je ne laisseroie
Que demain, a midi, ne soie
Au plus grant afaire pour voir
Que je peüsse onques avoir. »
Ainsi ne les veut pas du tout
Asseürer, car en redout
Est que li gaians ne venist
A chele eure que il poïst
Venir a tans a la puchele
Qui est enclose en la capele.
Et nepourquant tant lor pramet
Qu'en boine esperanche les met;
Et tuit et toutes l'en merchïent,
Qu'en sa proeche mout se fïent
Et mout quident qu'il soit prodon
Pour la compagnie au leon
Qui aussi simplement se gist
Les lui conme unz agniaux fesist.
Pour l'esperanche qu'en li ont
Se confortent et joie font,
N'onques puis duel ne demenerent.
Quant heure fu, si l'en menerent
95c.4009
Couchier en une chambre bele;
Et la damoisele et sa mere
Furent ambdeuz a son couchier,
Car il l'avoient ja mout chier
Et chent mile tans chier l'eüssent
Se la courtoisie seüssent
Et le grant proeche de lui.
Il et li leons amdui
Laiens jurent et reposerent,
Qu'autres gens gesir n'i oserent;
Ains lor fremerent si bien l'uis
Que il n'en peurent issir puis
Jusqu'au matin a l'ajournee.
Quant la chambre fu desfremee,
Si se leva et oÿ messe
Et atendi, pour la promesse
Qu'il ot, jusqu'a l'eure de prime.
Le seignor du chastel meïsme
Apele oiant tous, si li dit:
« Sire, je n'ai plus de respit,
Ains m'en yrai, si ne vous poist,
Que plus demourer ne me loist.
Et saichiés bien chertainement
Que volentiers et boinement
Demouraisse encore une pieche,
Pour les neveuz et pour la nieche
Monseigneur Gauvain, que j'aim mout. »
Trestout li sans fremist et bout
A le puchele, de paour,
A la dame et a son seignor;
Tel paour ont qu'il ne s'en aut,
95d.4042
Que il li vaurrent, de si haut
Conme il ierent, as piés chaïr,
Quant il lor prist a souvenir
Qu'a li ne fust ne bel ne bon.
Lors li offre a donner du sien
Li sires, s'il en veut avoir,
Ou soit de tere ou soit d'avoir,
Mais que encore .i. poi atende.
Et il respont: « Dix m'en deffende,
Que je ja riens nule en aie! »
Et la puchele, qui s'esmaie,
Conmenche mout fort a plourer,
Si li prie de demourer.
Conme destroite et angousseuse,
Pour la roÿne glorieuse
Des angles et du chiel li prie,
Et pour Dieu, qu'il ne s'en voist mie,
Ains atende encore .i. petit,
Et pour son oncle dont il dit
Que il connoist aime et prise.
Lors l'en est mout grans pitié prinze
Quant il ot qu'ele se reclaime
De par l'onme que il plus ainme
Et par la roÿne du chiel
Et de par Dieu, qui est le miel
Et de la douchour de pitié.
D'angousse a .i. souspir jetié,
Que pour le royaume de Tharse
Ne vaurroit que chele fust arse
Que il avoit asseüree;
Sa vie averoit courte duree
96a.4073
Ou il istroit tous vis du sens
S'il n'i pooit venir a tens;
Et d'autre part, en tel destreche
Le retient le grant gentilleche
Monseigneur Gauvain, son ami,
C'a paines ne li fent par mi
Li cuers, quant demourer n'i puet.
Nepourquant encor ne se muet,
Anchois demeure et si atent
Tant que li gaians vint batant,
Qui les chevaliers amenoit;
Et a son col un pel tenoit,
Gros et quarré, agu devant,
Dont il les batoit mout souvent;
Et il n'avoient pas vestu
De robes vaillant .i. festu,
Fors chemises sales et ordes;
S'avoient bien liés de cordes
Les piés et les mains, et seoient
Seur quatre gingles qui clochoient,
Febles et magres et redois.
Chevauchant vinrent les le bois;
Et unz nains bochus et enflés
Les eut keue a keue noués,
Si les costioit trestous quatre
N'onques ne les finoit de batre
D'escorgies a pluseurs neus,
Dont mout cuidoit faire que preus;
Si les batoit si qu'il sanoient;
Ainsi vieument les amenoient
Entre le jaiant et le nain.
96b.4104
Devant le porte, enmi un plain,
S'arreste li gaians et crie
Au prodonme que il deffie
Ses fix de mort, s'i ne li baille
Sa fille; et a sa garchonnaille
La le meteroit a essille*,
Car il ne l'aime tant ne prise
Qu'en li se deignast aprochier;
De garchons ara un millier
Avoec li, souvant et menu,
Qui seront pooulleus et nu,
Tix con garchons et torchepos,
Qui tuit y metront lor escos.
A poi que li prodons n'esrage
Quant ot cheli qui a putage
Dist que sa fille metera
Or* tantost, si qu'il le venra,
Seront ochis si quatre fil;
A tel destreche conme chil
Qui mix s'ameroit mors que vif.
Mout souvant se claiment chaitif,
Et pleure et souvent si soupire;
Et lors li conmencha a dire
Mesire Yvains, li frans, li douz:
« Sire, mout est fel et estouz
Chil gaians, qui forment s'orgoille.
Mais ja Dix si souffrir ne veulle
Qu'il ait pooir seur vostre fille!
Mout la despit et mout l'aville.
Trop seroit grans mesaventure
Se si tres bele creature
96c.4135
Et de si haut parage nee
Estoit a garchons ja donnee.
Cha, mes armes et mon cheval!
Et faites le pont traire aval,
Si me laissiés outre passer.
L'un en couvenra ja laissier,
Ou moi ou lui, ne sai lequel.
Se je le felon, le cruel,
Qui si vous va contraliant,
Pooie faire humiliant
Tant que vos fix vous rendist quite
Et le honte qu'i vous a dite
Vous venist chaiens amender,
Puis vous vaurroie conmander
A Dieu, s'iroie en mon afaire. »
Lors li vont son cheval hors traire
Et toutes ses arment* li baillent;
De lui armer bien se travaillent
Et bien et tost l'ont atourné;
A lui armer n'ont sejourné,
Se tout le mains non que il peurent.
Quant bien et bel atourné l'eurent,
Si n'i ot que de l'avaler
Le pont et de laissier aler;
On li avale et il s'en ist,
Mais aprés lui ne remausist
Li leons en nule maniere.
Et chil qui sont remés arriere
Le conmandent au Sauveor,
Car de lui ont mout grant paour
Que li maufés, li anemis,
96d.4166
Qui maint prodonme avoit ochis
Voiant lor iex, enmi la plache,
C'autretel de lui ne refaiche.
Si prïent Dix qu'i le deffende
De mort, et sauf et vif lor rende,
Et le gaiant li doinst ochirre.
Chascuns, si con il le desire,
Em prie Dieu mout douchement;
Et li gaians mout fierement
Vint vers li, si le manecha
Et dist: « Chil qui t'envoia cha
Ne t'amoit mie, par mes iex!
Chertes, il ne se pooit mix
De toi vengier, en nule guise;
Mout a bien sa venjanche prinze
De quanques tu li as fourfait.
- De noient es entrés el plait,
Fait chil, qui ne le doute rien.
Or fai ton mix et je le mien,
Tes paroles oiseuses me laisse. »
Tantost mesire Yvains s'eslaisse
Et de cheli s'est departis;
Ferir le va enmi le pis,
Qu'il ot armé d'une piax d'ors;
Et li jaians revint le cours
De l'autre part, atout le pel.
Enmi le pis l'en donna tel
Mesire Yvains que la pel fausse;
El sanc du cors, en lieu de sausse,
Le fer de la lanche li moulle;
Et li jaians de duel les roulle
97a.4197
Si que trestout ploier le fait.
Mesire Yvains l'espee trait,
Dont il savoit ferir grans cox.
Le jaiant a trouvé des cox*,
Qui en sa forche se fioit
Tant que armer ne se deignoit;
Et chil, qui tint l'espee traite,
Li a une envaÿe faite;

Del trenchant, non mie du plat,
Le fiert si bien qu'il li abat
De la joe une carbonee,
Et chil l'en ra une donnee
Si qu'il le fait trestout brunchier
Jusques seur le dos du destrier.
A chest cop li leons se creste,
De son seignor aidier s'apreste,
Si saut par ire et par grant forche,
Et ront et fent conme escorche,
Seur le gaiant, le pel velue;
Desous le pel li a tolue
Une grant pieche de le hanche;
Les ners et le braon li trenche,
Et li jaians lor est estors,
Si brait et crie conme tors,
Que mout l'a li leons grevé;
A deuz mains ot le pel levé
Et cuide ferir, mais il faut
Et li leons arriere saut;
Si pert son cop et chiet en vain
Par deles monseigneur Yvain,
Que l'un ne l'autre n'adesa.
97b.4228
Et mesire Yvains entesa,
Si a deuz caux entrelardés.
Ains que il se fust regardés,
Li ot, au trenchant de l'espee,
L'espaulle du bus dessevree;
A l'autre cop, sous le mamele,
Li a boutee l'alemele
De l'espee parmi le foie;
Li jaians chiet, le mort l'aproche,
Et, se uns grans chaisnes cheïst,
Ne cuit gregnor escrois feïst
Que li jaians fist au chaioir.
Le cop vaurrent mout tuit veoir
Chil qui estoient ad crestiaus.
Lors y parut li plus isniax,
Car tuit keurent a la cuirie,
Si con li chien qui ont chacie
La venison tant qu'il l'ont prinze;
Ainsi y keurent sans faintise
Tuit et toutes, par aatine,
La ou chil gist gueule souvine.
Li sires meïsmes y court
Et toutes les gens de sa tour;
Court il* sa fille avec sa mere;
Or ont joie li quatre frere,
Qui mout avoient mal souffert.
De monseigneur Yvain sont serf*;
Mais il ne paurrent retenir
Yvain pour riens qui avenist;
Si li prïent du retourner
Pour deduire et pour sejourner.
97c.4259
Tout maintenant que fait a,
Ailleurs en son afaire va.
Et si respont voir que il n'ose
Asseürer de nule chose;
Il ne set mie devenir
S'i li puet bien ou mal venir;
Mais au seigneur ytant dist il
Qu'il voloit que si quatre fil
Et sa fille prengnent le nain,
S'aillent a monseignor Gauvain,
Quant il saront qu'il iert venus,
Et conment il s'est contenus
Veut qu'il li soit dit et conté;
Que pour noient fait le bonté
Quant nule fois ne iert seüe.
Et il dirent: « Ja n'iert teüe
Cheste bontés, que n'est pas drois.
Bien ferons quanques vous vaurrois,
Mais dites moi que nous dirons,
Sire, quant devant lui venrons,
De qui nous porrons nous loer
Quant nous ne vous savons nonmer. »
Et il respont: « Cheli porrois
Dire, quant devant lui verrois,
Que li chevaliers au leon
Vous dis que je avoie non.
Et avec che proier vous doi
Que vous li dites de par moi
Qu'il me connoist bien et je lui;
Et si ne set or qui je sui.
De riens nule plus ne vous pri;
97d.4290
Or m'en couvient aler de chi,
Et ch'est la riens qui plus m'esmaie,
Que je trop demouré n'i aie,
Car ains que midi soit passés,
Arai aillours a faire assés
Se je y puis venir a heure. »
Lors s'en part, que plus n'i demeure;
Mais anchois mout proié li out
Li sires, au plus bel que il pout,
Que ses quatre fix enmenast:
N'i ot nul mout ne s'en penast
De lui servir, se il vausist;
Mais li ne pleut ne li ne sist
Que nus li feïst compagnie;
Lors s'en va, la plache a guerpie,


Page d'accueil


Dernière mise à jour : 08.11.1999
Pour toute question au sujet de ce site, veuillez vous adresser à :
E-maillabo@francaisancien.net