UNIVERSITÉ D'OTTAWA Faculté des Arts
Laboratoire de français ancien
Chrétien de Troyes
Le Chevalier au Lion (Yvain)
Pesme-Aventure
Ainsi entr'aus .ii. chevaucherent
Parlant, tant que il aprochierent
Le chastel de Pesme Aventure.
De passer outre n'orent cure
Et li jours aloit declinant.
El chastel vienent cheminant,
Et les gens qui venir les voient
Trestuit au chevalier disoient:
« Mal veigniés, sire, mal vegniez!
Chest hostel vous est enseigniez
Pour mal et pour honte endurer:
Che porroit unz albés jurer!
- Hez! fait il, gent fole, vilaine,
...*
Et qui a tous biens a fali,
Pour quoi m'avés si assali?
- Pour quoi ? Vous le sarés assés
S'encore un poi avant alés!
Mais ja riens nule n'en sarés
Jusques tant que esté arés
Amont en chele fortereche. »
Tantost mesire Yvains s'adreche
104d.5121
Vers le tour, et les gens s'escrïent;
Trestuit a haute vois li crïent:
« Hu ! hu ! Maleüreus, ou vas?
S'onques en ta vie trouvas
Qui te feïst honte ne lait,
La ou tu vas t'en iert tant fait
Que ja par toi n'iert reconté.
- Gens sans honneur et sans bonté,
Fait mesire Yvain, qui escoute,
Gent maleüree et estoute,
Pour quoi m'assaus? Por quoi m'aquels?
Que me demandes? Que me veus,
Qui si aprés moi te degretes?
- Amis, de noient te coureches,
Fist une dame auques d'aage
Qui mout estoit courtoise et sage,
Que chertes pour mal nel* te dïent
Nule chose, anchois te chastïent,
Se tu le savoies entendre,
Que lassus n'ailles ostel prendre;
Ne le pourquoi dire ne t'osent,
Mais il te chastient et chosent
Pour che que esmaier te veulent;
Et a chascun faire le seulent,
Autel atour, as sourvenans,
Pour che que il n'aillent laians.
Et la coustume est cha hors tiex
Que nous n'osons en nos hostix
Herbegier, pour riens qui aviengne,
Nul prodonme qui de hors viengne.
Or est seur toi des ore plus,
105a.5152
La voie ne te deffens plus:
Se tu veus, lassus monteras;
Mais, par men los, retourneras.
- Dame, fait il, se je creoie
Vostre conseil, je cuideroie
Que je eüsse honneur perdu;
Mais je ne savoie en quel leu
Je trouvaisse hostel anuit mais.
- Par foi, fait ele, et je m'en tais,
C'a moi riens nule n'en affiert.
Alés quel part que boin vous iert.
Et nepourquant grant joie aroie
Se je de layens vous veoie
Sans trop grant honte revenir,
Mais che ne porroit avenir.
- Dame, fait il, Dix le vous mire!
Mais mes faus cuers laiens me tire,
Si ferai che que mes cuers ...* »
Tantost vers le porte s'aqueut,
Et ses leons et sa puchele;
Et li portiers a lui l'apele,
Si li dist: « Venés tost, venés,
En tel lieu estes assenés
Ou vous serés bien retenus,
Et mal y soiez vous venus. »
Ainsi li portiers le semont
Et haste de venir amont,
Mais mout li fait laide semonse.
Et mesire Yvains, sans response,
Par devant li s'en passe et troeve
Une grant sale haute et noeve;
105b.5183
S'avoit devant un prael clos
De pex de chaisne agus et gros.
Et par entre les peus laiens
Voit pucheles jusqu'a trois chens
Qui dyverses oevres faisoient:
De fil d'or et de soie ouvroient
Chascune au mix qu'ele savoit;
Mais tel poverté y avoit
Que desliees et deschaintes
En y ot de poverté maintes;
Et les mameles et les keutes
Paroient par leur cotes routes,
Et les chemises as cols sales.
Les cols grelles et les vis pales
De fain et de mesaise avoient.
Il les voit et eles le voient,
Si s'enbronchent toutes et pleurent;
Et une grant pieche demeurent,
Qu'eles n'entendent a riens faire,
Ne lors iex ne püent retraire
De tere, tant sont acourees.
Quant un poi les ot regardees
Mesire Yvains, si s'en trestourne,
Droit vers le porte s'en retourne;
Et li portiers contre lui saut,
Si li escrie: « Ne vous vaut,
Que vous n'en istrés or, biau mestre.
Vous vaurriez or la hors estre,
Mais, par mon chief, riens ne vous monte,
Ains arés eü tant de honte
Que vous plus n'en porrés avoir;
105c.5214
On le vous fera ja savoir*.
Si n'avés mie fait savoir
Quant vous estes venus chaiens,
Car de l'issir est il noient.
- Ne je ne quier, fait il, biau frere.
Mais di moi, par l'ame ton pere,
Damoiseles que j'ai veües
En chel prael, dont sont venuez,
Qui dras de soie et d'offrois tissent?
Oevres font qui mout m'abelissent,
Mais che me desabelist mout
Qu'eles sont de cors et de voult
Maigres et pales et dolentes.
Si m'est vis que beles et gentes
Fussent mout se eles eüssent
Teles choses qui lor pleüssent.
- Jou, fait il, ne vous dirai mie.
Querés autrui qui le vous die.
- Si ferai je, quant mais n'en puis. »
Lors quiert tant que il treuve l'uis
Del prael ou les damoiseles
Ouvroient; et vint devant eles,
Si les salue ensamble toutes;
Et si lor voit cheoir les goutes
Des larmes qui lor decouroient
Des iex si conme eles plouroient.
Adont dist il: « Dix, s'i li plaist,
Chel doel qui ne sai dont vous naist
Vous ost des cuers et tourt a joie. »
L'une respont: « Dix vous en oye,
Que vous en avés apelé!
105d.5244
Il ne vous iert mie chelé
Qui nous sonmes et de quel terre,
Espoir che volés vous enquerre.
- Pour el, dist il, ne vin je cha.
Sire, il avint mout grant pieche a
Que li rois de l'Ille as pucheles
Aloit pour aprendre nouveles
Par les cours et par le païs.
S'ala tant conme faus naïs
Qu'il s'enbati en chest peril.
En mal eür y venist il,
Que nous chetives, qui chi sonmes,
Le honte et le duel en avonmes,
Que onques ne deserveïsmes.
Et bien saichiés que vous meïsmes
Y poés mout grant honte atendre
Se raenchon n'en veut em prendre.
Mais toutevoies ainsi avint
Que mes sires* en chest chastel vint
Ou il a .ii. fix de dyable;
Che ne tenés vous mie a fable,
Que de fenme vraiement furent.
Ychil dui combatre se duirent
Au roy, dont doleurs fu mout grans,
Qu'il n'avoit pas .xviii. ans;
Si le peüssent tout pourfendre
Aussi conme .i. anelet tendre.
Et li roys, qui grant paour ot,
Se delivra au mix qu'il pot;
Si jura qu'il envoieroit,
Chascun jour, tant con drois seroit,
106a.5275
Chaiens de ses pucheles trente;
Si fust quites par cheste rente;
Et fu juré au deviser
Que chest treüz devoit durer
Tant con li dui malfé duroient;
Et a chel jour que il seroient
Conquis ou tué en bataille,
Si fust quites de cheste taille
Et nous serions delivrees,
...*
Et a travail et a mesaise;
Janmais n'arons riens qu'il nous plaise.
Mais mout dis ore grant enfanche,
Qui parlai de la delivranche,
Que janmais de chaiens n'istrons;
Tousjours mais de soie ouverrons,
Ne ja ne serons mix vestues;
Tousjours serons povres et nues,
Et tousjours fain et soif arons;
Ja tant gaaignier ne sarons
Que mix en ayons au mengier.
Du pain avons a grant dangier,
Petit au main et au soir mains,
Que ja de l'oevre de ses mains
N'ara chascune pour lui vivre
Que .iiii. deniers de la livre;
Et de che ne porrons nous pas
Assés avoir viande et dras,
Car qui gaaigne la semaine
Vint sols n'est mie hors de paine.
Et bien sachiés vous a estours
Que il n'i a chele de nous
106b.5307
Qu'il ne gaaigne .xx. sols ou plus.
De che seroit riches uns dus!
Et nous sonmes en grant poverte,
S'est riches de nostre deserte
Chil pour qui nous nous traveillons.
Des nuis grant partie veillons
Et les jours tous pour gaagnier,
Qu'il nous manache a mehaignier
Des menbres quant nous reposons;
Et pour che reposer n'osons.
Mais que vous yroie contant?
De mal et de honte avons tant
Que le quint ne vous en sai dire.
Mais che nous fait esragier d'ire
Que mout souvent morir veonmes
Chevaliers armés et prodonmes,
Qui as deuz malfés se conbatent;
L'ostel trop chierement achatent,
Aussi con vous ferés demain,
Que trestout seul, de vostre main,
Vous couverra, veulliés ou non,
Combatre et perdre vostre non
Encontre les deuz vis dyables.
- Et Dix, li vrais esperitables,
Fait mesire Yvains, m'en deffende
Et vous honneurt et joie rende,
Se il a volenté li vient!
Desormais aler m'en couvient
Veïr ches gens qui laiens sont,
Savoir quel chiere il me feront.
- Or alés, sire, chil vous gart
106c.5338
Qui tous les biens donne et depart! »
Lors va tant qu'i vient en la sale;
N'i treuve gent boine ne male
Qui de riens les meche a raison.
Tant trespassent de la maison
Que il vinrent en un vergier;
Ains de lors chevax herbegier
Ne tinrent plait ne ne parlerent.
Et sachiés bien les establerent
Chil qui l'un en quident avoir.
Ne sai s'il cuidoient le voir:
Encor est leur seigneur tout sain!
Li cheval ont avaine et fain
...*
Mesire Yvains el vergier entre
Et aprés lui toute sa route;
Apuyé voit deseur son coute
Un prodonme qui se gesoit
Seur .i. drap de soie; et lisoit
Une puchele devant li
En un ronmans, ne sai de cui.
Et pour le ronmans escouter
S'i estoit venue acouter
Une dame, et estoit sa mere;
Et li prodons estoit sen pere.
Et se pooient esjoïr
Mout de li veoir et oïr,
Car il n'avoient plus d'enfans;
Ne n'avoit pas .xvii. ans,
Et s'estoit si bele et si gente
Qu'en li servir meïst s'entente
Li dix d'Amours, s'i le veïst,
106d.5370
Ne ja amer ne la feïst
Autrui s'a lui meïsmes non.
Pour li servir devenist hom,
Si* issist de sa deÿté hors
Et ferist lui meïsmes el cors
Du dart dont le plaie ne sane
Se desloiaus mires n'i paine.
N'est drois que nus garir en puisse
Puis que desloiauté n'i truise;
Et qui en garist autrement,
Il n'aime mie loiaument.
De cheste plaie vous deïsse,
Jusques* a .i. mois fin ne preïsse
Se li escouter vous pleüst;
Mais tost deïst tel y eüst
Que je vous parlaisse d'uiseuses,
Que le gent n'est mais amoureuse
Ne n'aiment mais si con il deurent,
Que nis oïr parler n'en veulent.
Mais or oés en quel maniere,
A quel samblant et a quel chiere
Mesire Yvains fu herbegiés.
Contre lui salirent en piés
Tuit chil qui el vergier estoient;
Tout maintenant que il le voient,
Si li dïent: « Or cha, biau sire,
De quanques Dix puet faire et dire
Soiés vous benois clamés,
Et vous et quanques vous amés! »
Je ne sai se il le dechoivent,
Mais a grant joie le rechoivent
107a.5401
Et font samblant que il lor plaise
Que herbegiez soit a grant aise.
Et neïs la fille au seignor
Le sert et porte grant honor
Conme on doit faire son boin hoste:
Trestoutes ses armes li hostent*,
Et che ne fu mie du mains
Qu'ele meïsmes de ses mains
Li leve le col et le faiche;
Toute honnor veut que on li faiche
Li sires, si conme ele fait.
Chemise ridee li trait
Hors d'un coffre, et blanches braies,
Et fil et aguille a ses manches
Lachier, et bien tost s'en avanches*;
Puis li vest et ses bras li coust.
Or doinst Dix que trop ne li coust
Cheste losenge et chest serviche!
A vestir deseur sa chemise
Li a baillié un biau sercot
Et un mantel sans haligot,
Vair d'escarlate, au col li met.
De lui servir tant s'entremet
Qu'il en a honte et mout li poise;
Mais la puchele est si courtoise
Et tant franche et tant deboinaire
Qu'encor en quide ele poi faire.
Que bien set qu'a sa mere plaist
Que riens a faire ne li laist
Dont ele le cuit losengier.
La nuit fu servis au mengier
107b.5431
De mes tant que trop en y ot;
Li aportes* anuier pot
As sergens qui des mes servirent.
La nuit toutes honors li firent
Et mout a aise le couchierent;
N'onques puis a lui n'aprochierent
Que il fu en son lit couchiés.
Et ses leons vint a ses piés,
Si con il l'ot acoustumé.
Au main, quant Dix ot alumé,
Par le monde, son luminaire,
Si matin conme il le puet faire,
Qui tout fait par conmandement,
Se leva mout isnelement
Mesire Yvain et la puchele;
S'oïrent a une chapele
Messe qui mout tost lor fu dite
En l'onor de Saint Esperite.
Mesire Yvains aprés la messes*
Pour les nouveles felenessesÝ,
Quant il cuida qu'il s'en deüst
Aler, que riens ne li neüst;
Mais ne pot mie estre a son cois.
Quant il dist: « Sire, je m'en vois,
S'i vous plaist, a vostre congié.
- Amis, encor ne vous doing gié,
Fait li sires de la maison.
Je ne puis faire par raison,
Qu'en chest chastel a establie
Une mout fiere diablie
Que il me couvient maintenir.
107c.5462
Je vous ferai ja chi venir
Deus grans sergans mout fiers et fors;
Encontr'el*, soit ou drois ou tors,
Y couvenrra vos armes prendre.
S'encontr'els vous poés deffendre
Et cel* andous vaintre et ocirre,
Ma fille a seignour vous desire,
Et de chest castel vous atent
L'onnours et quanqu'il y apent.
- Sire, fait il, je n'en quier point.
Ja Diex ainsi ne la me doinst,
Et vostre fille vous remaigne,
Ou l'emperere d'Alemaigne
Seroit bien saus s'il l'avoit prinse
...*
- ...*
De noient vous voi escondire,
Que vous n'en poés escaper.
Mon castel et ma fille a per
Doit avoir, et toute ma tere,
Qui andous les porra conquerre
Qui ja vous vendront assalir.
La bataille ne puet faillir
Ne remanoir en nule guise.
Mais je sai bien que couardise
Vous fait ma fille refuser,
Qui si vous cuidiés escuser
Outreement de la bataille;
Mais che sachiés vous bien, sans faille,
Que conbatre vous i estuet.
Pour riens escaper ne s'en puet
Nus chevaliers qui cheens gise.
Cheste coustume est rente assise,
107d.5495
Que trop avra longue duree,
Que ma fille n'iert marie*
Tant que conquis andous les voie.
- ...*
Conbatre, maloit gré mien;
Mais je m'en souffrisse mout bien
Et volentiers, ce vous otroi.
La bataille, ce poise moi,
Ferai quant ne puet remanoir. »
Atant vienent, chis ...* et noir,
Andui li dui filz a nuitun.
Si n'i a celui qui n'ait un
Baston cornu de cornillier
Qu'il avoit fait encorniller
De celure* et puis lier d'arcal.
Des les espaulles contreval
Furent armés jusqu'a genous,
Mes les chiés orent et les volz
Desarmés et les jambes nues,
Qui n'estoient mie menues.
Et ainsi armé con il vindrent,
Escus reons sur les chiés tindrent,
Fors et legiers pour escremir.
Li lions conmenche a fremir
Tout maintenant que il les voit,
Qu'il set mout bien et aperchoit
Que a ches armes que il tiennent
Conbatre a son seignour se vienent;
Si se heriche et creste ensemble,
De hardement et d'ire tramble
Et bat la tere de sa coue,
Qu'il a talent que il rescoue
107a.5527
Son seignour ains que il l'ochient.
Et quant chil le voient, si dïent:
« Vassaus, ostés de ceste plache
Vostre leon, qui nous manache,
Ou vous vous clamés recreant;
Qu'autrement, je vous acreant,
Le vous couvient en tel lieu metre
Qu'il ne se puisse entremetre
De nous* aidier ne de vous* nuire.
Sols vous venés a nous deduire,
Que li leons vous aideroit
Mout volentiers se il pooit.
- Vous meïsmes, qui le doutés,
Fait mesire Yvains, l'en ostés,
Que mout me plaist et mout me siet,
S'il onques puet, que il vous griet,
Et mout me plaist se il m'aïe.
- Par foy, font il, or n'i a mie!
Faites le miex que vous porroiz,
Que ja aïe n'en aroiz.
Touz sols sans aïe d'autrui,
Solz i devés estre et nous dui.
Se li leons ert aveuc vous,
Pour tant qu'il se mesllast a nous,
Dont ne seriés vous pas sous,
Dui seriés contre nous dous.
Si vous couvient, jel vous afi,
Vostre leon oster de chi,
Mais bien vous poist tot orendroit.
- Ou volés vous, fait il, qu'il soit?
Ou volés vous que je le mete? »
108b.5558
Lors li moustrent une cambrete.
Il dïent: « Laiens le metés.
- Fait iert, des que vous le volés. »
Lors l'i maine et si l'i enserre.
Et on li va maintenant querre
Ses armes pour armer son cors;
Et son cheval li ont trait fors,
Si li baillent et il i monte.
Pour li laidir et faire honte
Li passent li dui campion,
Qu'asseüré son du leon,
Qui est dedens le cambre enclos.
Des maches li donnent grans cops,
Que petite aïe li fait
Escus ne hiames que il ait;
Car quant sor le hiame l'ataignent,
Trestout li enbuignent et fraignent,
Et li escus pechoie et font
Conme glache; tex cops i font
Que ses poins i puet on bouter.
Mout font andui a redouter.
Et il, que fait de dus maufés?
De honte et de crieme escaufés,
Se deffent de toute sa forche;
Mout s'esvertue et mout s'efforche
De donner grans cops et pesans.
Ne faillent pas a lors presens,
Qu'il orent lor bontés a double.
Or a son cuer dolent et trouble
Li leons, qui est en sa cambre,
Que de la grant bonté li menbre
108c.5589
Que cil li fist par sa franchise,
Que il avroit de son serviche
Et de s'aïe grant mestier;
Ja li rendroit a grant sestier
Et a grant muy ceste bonté;
Ja n'i aroit riens mesconté
S'il pooit issir de laiens.
Mout va reverchant de tous sens
Ne ne voit par ou il s'en aille.
Bien ot les cops de la bataille,
Qui perilleuse est et vilaine,
Et pour che si grant duel demaine
Qu'il esrage vis et forsenne.
Tant va reverchant qu'il assenne
Au soil, qui porrissoit pres tere;
Si grate tant qu'il s'i enserre
Et fiche jusque pres des rains.
Et ja estoit mesire Yvains
Mout traveilliés et mout suans,
Que mout trouvoit les .ii. truhans
Fors et felons et adurés.
Mout i avoit cops endurés
Et rendu, tant con il plus pot,
Ne de riens blechiés ne les ot,
Que trop savoient d'escremie;
Et lor escu n'estoient mie
Tel que riens en ostast espee,
Tant fust trenchans et afilee.
Pour che si se pooit mout fort
Mesire Yvains douter de mort;
Mes adés tant se contretint
108d.5620
Que li leons outre s'en vint,
Tant ot desous le soeil graté.
S'or ne sont li felon maté,
Donques ne le seront il mais;
Car au leon trive ne pais
N'aront il, tant que vis les sache.
L'un en aert et si le sache
A tere, ausi com un ploton.
Or sont effreé li glouton,
Mes n'a honme en toute la plache
Qui en son cuer joie n'en faiche.
Car chil ne relevera ja
Que li leons ateré a,
Se li autres ne li secourt;
Pour lui aidier, chele part court
Et pour lui meïsme deffendre,
Qu'a li s'alast li leons prendre
Lués qu'il aroit celui ochis
Que il avoit par tere mis.
Et si ravoit plus grant paour
Du leon que de son seignour.
Mes or est mesire Yvains fox,
Des qu'il li a tourné le dos
Et voit le col nu a delivre,
Se longuement le laisse vivre,
Car mout li est bien avenu.
La teste nue et le col nu
Li a li glous abandonné,
Et il li a tel cop donné
Que la teste du bus li ret,
Si souavet que mot n'en set.
109a.5651
Et maintenant a tere vient
Pour l'autre, que li leons tient,
Que rescourre et tolir li veut.
Mes pour noient, car tant se deut
Que mire a tans mais n'i ara;
Qu'en son venir si le navra
Li leons, qui si vint iriés,
Que laidement fu enpiriés.
Et toutevoies arrier le boute
Et voit que il li avoit toute
L'espaulle destre du bus traite.
Pour lui de riens ne se dehaite,
Que ses bastons li est cheüs.
Et cil gist pres conme ferus,
Qu'il ne se craulle ne ne muet;
Mais tant a que bien parller puet
Et dit, si conme il le puet dire:
« Ostés vostre leon, biau sire,
S'il vous plaist que plus ne m'adoist,
Que de desor faire vous loist
De moi tout quanques boin vous iert.
Cil qui merchi prie et requiert,
N'i doit faillir cil qui la rueve,
Se honme sans pitié ne trueve.
Et je ne me deffendrai plus,
Ne ja ne me releverai sus
De ci, pour che que mestier aie,
Si me met en vostre manaie.
- Di donc, fait il, que tu otroies
Que vaincus et recreant soies.
- Sire, fait il, ...* i pert bien:
109b.5682
Vaincus sui je, maloit gré mien,
Et recreans, jel vous otroi.
- Donques n'as tu garde de moi
Et mes leons te rasseüre. »
Tantost viennent grant aleüre
Toutes les gens environ lui;
Et li sires et la dame, il dui,
Si li font joie et si l'acolent
Et de lor fille l'aparolent,
Si li dïent: « Or serés vous
Damoisiax et sires de nous,
Et nostre fille iert vostre dame,
Car nous le vous donnons a fame.
- Et je, fait il, le vous redoing.
Qui l'a, si l'ait! Je n'en ai soing;
Si n'en di je riens pour desdaing:
Se vous plaist* se je ne la praing,
Que je ne puis ne je ne doi.
Mes, se vous plaist, delivrés moi
Les chaitives que vous avés;
Li termes est, bien le savés,
Qu'eles s'en doivent aler cuites.
- Voirs est, fait il, che que vous dites,
Et jes vous rent sans contredit,
Et trestoutes les vous aquit.
Mes prenés, si ferés savoir,
Ma fille et trestout mon avoir,
Qui est mout bele et gente et sage;
Jamais si riche mariage
N'avrés, se vous cestui n'avés.
- Sire, fait il, vous ne savés
109c.5713
Mon ensoigne ne mon afaire,
Ne je ne le vous os retraire.
Mais ce sachiés, quant je refus
Ce que ne refuseroit nus
Qui deüst son cuer ne s'entente
Metre en puchele bele et gente,
Que volentiers la receüsse
Se je peüsse ne deüsse.
Chesti ne autre rechevoir
Je ne puis, ce sachiés de voir.
Si m'en laissiés em pais atant,
Que la damoisele m'atant
Qui aveuc moi est cha venue;
Compaignie m'i a tenue
Et je la revoil li tenir,
Que qu'il m'en doie avenir.
- Volés, biau sire? Et vos, conmant?
Jamais, se jel ne vous conmant
Et mes consax ne le m'aporte,
...*
Ainz remandrés en ma prison.
Orgueil faites et mesprison
Quant je vous pri que vous preigniés
Ma fille et vous le dedaigniés.
- Desdaing, sire? Non fais, par m'ame,
Mais je ne puis espouser fame
Ne remanoir pour nule paine.
La damoisele qui m'enmaine
Si gur*, qu'autrement ne pue* estre.
Mes je vous jur, de ma main destre,
Et vous plevis, si m'en creés,
Que, si con vous or me veés,
109d.5745
Revendrai se je onques puis
Et prendrai vostre fille puis,
Quelque ore que bon vous iert.
- Dehais, fait il, qui vous en quiert
Ne foy ne plege ne creante!
Se ma fille vous atalente,
Vous revendrés hativement;
Ja pour foy ne pour serement,
Je cuit, ne vendriés plus tost.
Or alés, que je vous en ost
touz creantes et touz couvens.
...*
Ou vous volés, ne me caut il!
N'ai mie me fille si vil
Que ja par forche le vous doingne.
Or alés en vostre besoigne,
Que tout autant, se vous venés,
M'en est, con se vous remanés. »
Tantost mesire Yvains s'en tourne,
Que el castel plus ne sejourne,
Et s'en a devant lui menés
Les chaitives desprisonnés,
Que li sires li a baillies
Povres et mal appareillies;
Mais or sont riches, ce lor samble.
Fors du castel toutes emsamble,
Devant lui, .ii. et .ii. s'en issent;
Ne je ne cuit qu'eles feïssent
Tel joie com eles le font
De celui qui fist tout le mont,
S'il fust du chiel venus ent traire*.
Merci et pais li vont requerre
110a.5777
Toutes les gens qui dit li orent
Tant de honte com il plus porent;
Si le vont ainsi convoiant,
Et il dit qu'il n'en set noiant:
« Je ne sai, fait il, que vous dites,
Et si vous em claime je toz quites,
C'onques cose que je a mal tiegne
Ne deïstes, dont me souviegne. »
Chil sont mout lié de che qu'il ouent,
Et se courtoisie mout louent,
Si le conmandent a Dieu tuit
Quant grant piece l'orent conduit.
Et les damoiseles li ont
Congié demandé, si s'en vont.
Au partir toutes li enclinent,
Et si li orent et destinent
Que Diex li doinst joie et santé
Et venir a sa sauveté
En quelcumques lieu que il aut.
Et cil respont que Diex les saut,
Cui la demeure mout anuie:
« Alés, fait il, Diex vous conduie
En vos païs sauves et lies. »
Maintenant se sont avoïes;
Si s'en vont grant joie menant.
Pour toute question au sujet de ce site, veuillez vous adresser à :
labo@francaisancien.net