UNIVERSITÉ D'OTTAWA Faculté des Arts

Laboratoire de français ancien

Chrétien de Troyes
Le Chevalier au Lion (Yvain)

Texte complet

40a.1

Artus, li boins rois de Bretagne,
La cui proece nous ensagne
Que nous soions preu et cortois,
Tint cort si riche comme rois
A cele feste ki tant couste,
C'on apele la Pentecouste.
Li cours fu a Carduel en Gales;
Après mangier, parmi ces sales,
Li chevalier s'atropelerent
La u dames les apelerent
Et les dames et les puceles.
Li un raconterent noveles,
Li autre parloient d'Amours,
Des angoisces et des dolors
Et des grans biens k'en ont sovent
Li desciple de lor covent,
Qui lors estoit riches et buens;
Mais ore i a mout poi des suens,
S'en est Amors molt abaiscie,
Car bien pres l'ont ja tot laissie;
Car cil ki soloient amer
Se faisoient cortois clamer
Et preu et large et honorable;
Ore est Amors tornee a fable
Por çou que cil qui rien n'en sentent
Dïent k'il aiment, et si mentent,
Et cil fable et mençogne en font
Ki s'en vantent et droit n'i ont.
Mais por parler de cels ki furent,
Laissons cels qui en vie durent,
K'encor valt miels, ce m'est avis,
.I. cortois mors c'uns vilains vis.
Por çou me plaist a raconter
Cose ki fait a escolter
Del roi ki fu de tel tesmoing
C'on en parole pres et loing;
Si m'acort d'itant as barons

40b.38

C'al mains toustans vivra ses nons
Et par lui sunt ramenteü
Li boin chevalier elleü
Qui en honor se travillierent.
Mais cel jor mout s'esmervillierent
Del roi ki d'entrels se leva;
Si ot de tels cui molt pesa
Et ki molt grant parole en firent:
Onques mais avenir ne virent
A si grant feste en cambre entrer
Por dormir ne pour reposer;
Mais cel jor issi li avint
Que la roïne le retint,
Si demora tant dalés li
K'il s'oublia et endormi.

A l'uis de la cambre deffors
Fu Dodinials et Saigremors
Et Kex et messire Gavains,
Et avec fu mesire Yains,
Et si estoit Caloghernans,
.I. chevaliers preus et vallans,
Ki lor ot conmenchié .i. conte,
Non de s'oneur, mais de sen* honte.
Que que il son conte contoit
Et la roïne l'escoltoit,
S'est de dalés le roi levee
Et vint sour els si a emblee;
Ains que nus le peüst veoir,
Se fu laissie entr'els caoir,
Fors que Caloghernans sans plus,
Cil salli encontre li sus.
Et Kex, qui mout fu ramprosnex,
Fel et poignans et anieus,
Li dist: « Par Dieu, Caloghernant,
Mout vos voi or preu et vallant,
Et certes mout m'est bel que vous
Estes li plus cortois de tous;
Et bien sai que vos le cuidiés,
Tant estes vos de sens widiés.
S'est drois que ma dame le cuit
Que vos sachiés plus que nous tuit
De cortoisie et de proueche:

40c.80

Ja laissames or par pereche,
Espoir, que nos ne nos levames
U por ço que nos ne dagnames.
Mais* foi, sire, non fesimes,
Mais por ço que nos ne veïmes
Ma dame, ains fustes vos levés.
- Certes que ja fussiés crevés,
Fait la roïne, al mien cuidier,
Se ne vos peüsciés widier
Del venim dont vos estes plains.
Anieus estes et vilains,
De ramprosner nos conpagnons.
- Dame, se nos ne gaagnons,
Fait Kex, en vostre conpagnie,
Gardés que nos n'i perdons mie.
Jo ne quit avoir cose dite
Qui me doie estre a mal escrite
Et, s'il vous plaist, taisiés vos ent:
Il n'a cortoisie ne sens
En plait d'uiseuse maintenir;
Cis plais ne doit avant venir,
Ne on nel doit plus halt monter.
Mais faites nos avant conter
Ço que il avoit conmenchié,
Car ci ne doit avoir tenchié. »

A ceste parole respont
Caloghernans, et si s'apont:
« Sire, fait il, de la tenchon
N'ai jo mie grant marison;
Petit m'en est, et poi le pris.
Se vos avés vers moi mespris,
Jo n'i arai ja nul damage:
A miels vallant et a plus sage,
Mes sire Ké, que jou ne sui,
Avés vos dit sovent anui,
Car bien en estes costumiers.
Toustans doit puir li femiers,
Et tahons poindre, et malos bruire,
Si doit mout anoier et nuire.
Mais jo ne conterai hui mais,
Se ma dame m'en laisce en pais,
Et jou li pri qu'ele se taise,

40d.122

Que nule rien ki me desplaise
Ne me conmant, siue merci.
- Dame, trestot cil ki sont ci,
Fait Kex, boin gré vos en saront,
Car volentiers l'escolteront;
Et ja n'en faites rien por moi,
Mais, foi que vos devés le roi,
Le vostre signeur et le mien,
Commandés li, si ferés bien.

- Caloghernant, fait la roïne,
Ne vos calle de l'aatine
Monsegnor Ké le senescal;
Costumiers est de dire mal,
Si c'on ne l'en puet castoier.
Commander vos voel et proier
Que ja n'en aiés au cuer ire
Ne por lui ne laissiés a dire
Cose ki nous plaise a oïr,
Se de m'amor volés joïr;
Si conmenchiés tot de rechief.
- Dame, dist il, ce m'est mout grief
Que vos me conmandés a faire;
Ains me lairoie .i. des dens traire,
Se corechier ne vos cuidasce,
Que huimais nule rien contasse;
Mais jo ferai ço qui vous siet,
Comment que il onques me griet,

Quant il vous plaist; ore entendés!
Cuer et orelles me rendés,
Car parole si est perdue
S'ele n'est de cuer entendue.
Et ki or me volra entendre,
Cuer et orelles me doit rendre,
Car tex i a qui ce k'il oent
N'entendent pas, et si le loent;
Et cil n'en ont fors que l'oïe,
Puis que li cuers n'i entent mie;
C'as orelles vient la parole,
Aussi conme li vens ki vole,
Mais n'i arreste ne demeure,
Ainsçois s'en part en mout poi d'eure
Se li cuers n'est si esvilliés

41a.162

C'al prendre soit aparelliés;
Car cil le puet en son venir
Prendre et enclore et retenir;
Les orelles sunt voie et dois
Par u vient des c'al cuer li vois;
Et li cuers prent dedens le ventre
La vois, qui par l'orelle i entre.
Et qui or me volra entendre,
Cuer et orelles me doit rendre,
Car ne voel pas parler de songe,
Ne de fable ne de mençoigne.

Ja avint pres a de .x. ans
Que, seus comme uns païsans,
Aloie querant aventures,
Armés de totes armeüres
Si com chevaliers devoit estre;
Si tornai .i. chemin a destre,
Par mi une forest espesse.
Mout i ot voie felenesse,
De ronsces et d'espines plaine;
A grant anui et a grant paine,
Ting cele voie et cel sentier;
Et bien pres tot le jor entier
M'en alai cheminant issi
Tant que de la forest isci,
Et ce fu en Nortombellande.
De la forest, en une lande
Entrai et vi une bretesche
A demie liue galesche;
Se tant i ot, plus n'i ot pas.
Cele part ving plus que le pas,
Et vi le baile et le fossé
Tout environ parfont et lé,
Et sor le pont en piés estoit
Cil cui li fortereche estoit,
Sor son puig .i. ostoir mué.
Ne l'euc mie bien salué,
Quant il me vint a l'estrier prendre
Et me conmanda a dessendre.

Jou dessendi; il n'i ot el,
Car mestier avoie d'ostel;
Et il me dist tot maintenant

41b.204

Plus de .c. fois en .i. tenant,
Que beneoite fust la voie
Par u laiens venus estoie.
Atant en la cort en entrames,
Le cort et le porte passames.
Emmi la cort au vavassor,
Cui Diex otroit joie et honor
Tant con il fist moi cele nuit,
Pendoit une table, je cuit,
U il n'avoit ne fer ne fust
Ne rien qui de keuvre ne fust.
Sor cele table, d'un martel
Qui dalés ert a un postel
Feri li vavassors .iii. cols.
Cil ki laiens erent enclos
Oïrent le vois et le son;
S'iscirent hors de le maison
Et vinrent en la cort a val.
Li uns corut a mon cheval,
Que li boins vavassors tenoit;
Et jo vi que vers moi venoit
Une pucele bele et gente.
En li remirer mis m'entente:
Ele fu bele et graille et droite.
De moi desarmer fu adroite,
K'ele le fist et bien et bel;
Puis m'affubla .i. cort mantel
Vair d'escarlate paonache;
Et tout nos guerpirent la place,
Que avec moi ne avec li
Ne remest nus; ço m'abeli,
Car plus n'i queroie veoir.
Et ele m'amena seoir
El plus bel praelet del monde,
Clos de bas mur a la reonde.
La le trovai si affaitie,
Si bien parlant, si ensaignie,
D'itel samblant et d'itel estre
Que mout m'i delitoie a estre,
Ne jamais por nul estavoir
Ne m'en volsisce removoir;
Mais tant me fist la nuit de guerre

41c.246

Li vavassors k'i me vint querre
Quant del souper fu tans et hore;
N'i poc plus faire de demore,
Si fis lués son conmandement.
Del souper vos dirai briement
K'il fu del tot a ma devise,
Puis que devant moi fu assise
Li pucele, ki s'i assist.
Aprés mangier itant me dist
Li vavassors k'il ne savoit
Le terme puis que il avoit
Herbegié chevalier errant
Ki aventure alast querant;
S'en avoit il mout herbegié.
Aprés çou me proia que gié
Par son ostel m'en revenisse
En guerredon, se jou peuisse.
Petit por mon oste fesisse
Se cel don li escondesisse.

Mout fui la nuit bien ostelés,
Et mes chevax fu enselés,
Lues que on pot le jor veoir,
Car je l'oi mout proié le soir;
Si fu bien faite ma proiere.
Mon boin oste et sa fille chiere
A Saint Esperit conmandai;
A trestos congiet demandai,
Si m'en alai lués que je poi.
L'ostel gaires ellongié n'oi
Quant je trovai en .i. essars
Et tors salvages et lupars
Ki s'entrecombatoient tuit
Et demenoient si grant bruit
Et tel fierté et tel orguel,
Se voir conoistre vos en voel,
Que de paor me trais arriere,
Que nule beste n'est si fiere
Ne plus orguellose de tor.
.I. vilains, qui ressambloit Mor,
Grans et hisdeus a desmesure,
Issi tres laide creature
Com on poroit dire de bouche,

41d.289

(Com on poroit dire de bouche)
Illuec seoit sour une çouche,
Une grant machue en sa main.
Jou m'aprochai vers le vilain,
Si vi k'il ot grosse la teste
Plus que roncis ne autre beste,
Cavex locus et front pelé,
S'ot plus de .ii. espans de lé,
Orelles velues et grans
Aussi lees conme .ii. vans,
Sorciex ot grans et le nes plat,
Oels de chuete, nes de cat,
Bouche fendue conme lous,
Dens de saingler agus et rous,
Barbe noire, guernons tortis,
Et le menton avoit al pis,
Torte eskine corve et bochue.
Apoiés fu sor sa machue,
Vestus de robe si estragne
Qu'il n'i avoit ne lin ne lagne,
Ains ot a son col atachiés
.II. quirs, de novel escorchiés,
De .ii. toriaus u de .ii. bués.
En piés salli li vilains lués
Qu'il me vit vers lui aprochier.
Ne seuc se il me volt tolchier,
Ne ne seuc qu'il voloit enprendre,
Mais jo me garni de desfendre,
Tant que je vi que il s'estut,
En piés tous cois, si ne se mut,
Et fu montés dessor .i. tronc,
S'ot bien .xiiii. piés de lonc;
Si m'esgarda, et mot ne dist,
Nient plus c'une beste fesist;
Et jo cuidai que il n'eüst
Raison et parler ne seüst.
Totes voies tant m'enhardi
Que jo li dis: « Va, cor me di
Se tu iés boine cose u non! »
Et il me dist: « Je sui uns hom.
- Quels hom? fac jou. - Tex com tu vois;
Si gart les bestes en cest bois.

42a.333

Gardes? Pour Saint Piere de Rome,
Ja ne conoissent eles home;
Jo ne cuit qu'en plain n'en boscage
Puist on garder beste salvage,
N'en autre lieu, por nule cose,
S'ele n'est loie u enclose.

- Jo les garc si, je vos plevis,
Que ja n'istront de cest porpris.
- Et tu, conment? Di m'ent le voir.
- N'i a celi ki s'ost movoir
Puis qu'eles me voient venir;
Car quant j'en puis une tenir,
Si le destraig par les .ii. cors,
As puins que j'ai et durs et fors,
Que les autres de paor tramblent
Et tot environ moi s'assamblent
Aussi com por merci crier;
Mais nus ne s'i poroit fier,
Fors moi, s'entr'eles s'estoit mis,
Que maintenant ne fust occis.

Ensi sui de mes bestes sires,
Et tu, si me devroies dire
Quels hom tu iés et que tu quers.
- Je sui, fait il, uns chevaliers
Qui quier ço que trover ne puis;
Assés ai quis, et rien ne truis.
- Et que volroies tu trover?
- Aventures, por esprover
Ma proeche et mon hardemant.
Or te proi et quier et demanc,
Se tu ses, que tu me conselles
U d'aventure u de mervelles.
- A çou, fait il, faulras tu bien:
D'aventures ne sai jo rien;
Onques mais n'en oï parler.
Mais se tu voloies aler
Ci pres dusqu'a une fontaine,
N'en venroies mie sans paine,
Se tu li rendoies son droit.
Chi pré troveras orendroit
.I. sentier ki la te menra.
Toute la droite voie va,

42b.375

Se bien vels tes pas emploier,
Car bien poroies forvoier,
K'il i a d'autres voies mout.
La fontaine verras de* bout,
S'est ele plus froide que marbres.
Ombre li fait li plus biax arbres
C'omques peüst faire Nature.
Car en tous tans sa folle dure,
K'il ne le pert por nul yver.
Et s'i pent uns bachins de fer
A une si longe caaine
Qu'il dure jusc'a la fontaine.

A la fontaine troveras
.I. perron, tel que tu verras;
Jo ne te sai a dire quel,
Car jo ne vi onques nul tel;
Et d'autre part une capele,
Petite, mais mout par est bele.
S'el bachin vels de l'aigue prendre
Et dessor le perron espandre,
Ja verras une tel tempeste
K'en cest bos ne remanra beste;
Car tu verras si foldroier,
Venter et arbres pechoier,
Plovoir, toner, et espartir
Que, se tu t'en pués departir
Sans grant anui et sans pesance,
Tu seras de plus grant poissance
Que nus chevaliers qui fust onques. »
Del vilain me parti adonques,
Et bien pot estre miedi
Quant l'arbre et la capele vi.

Bien sai de l'arbre, c'est la fins,
Que ce estoit li plus biax pins
Qui onques sor tere creüst.
Ne cuit c'onques si fort pleüst
Que d'iaue i chaïst une goute,
Ainsçois couloit par dessus tote.
A l'arbre vi le bachin pendre,
Del plus fin or qui fust a vendre
Onques encore a nule foire.
De la fontaine, poés croire,

42c.421

K'ele bouloit con iaue caude,
Si ert plus clere k'esmeralde;
Et fu aussi c'uns ars voltis,
S'avoit desous .iiii. rubins,
Plus flamboians et plus vermax
Que n'est al matin li solaus,
Quant il apert en oriant.
Ja, quant jo sace a essiant,
Ne vos en mentirai de mot.
Li mervelle a veoir me plot
Del grant tempest et de l'orage,
Dont jo ne me tieg mie a saje,
Que maintenant, se jo peuisse,
Mout volentiers m'en repentisse,

Quant jo euc le perron crousé
De l'aigue al bachin arrousé.
Mais trop en i versai, ce dolt;
Car lués vi si le ciel derront
Et plus que par .xiiii. pars
M'en feroit es oels li espars;
Et les nues tot melle et melle
Jetoient nois et pluie et grelle.
Tant fu li tans pesmes et fors
Que tantost cuidai estre mors
Des foldres k'entor moi caoient,
Et des arbres ki depeçoient.
Mais tost me rasseüra
Que li tans gaires ne dura.
Saciés que mout fui esmaiés,
Tant que li tans fu rapaiés.
Et tot li vent se reposerent;
Quant Dieu ne plot, plus ne venterent.
Et jou vi l'air cler et pur,
De joie fui tot aseür;
Car joie, s'onques le conui,
Fait oblier maint grant anui.
Des que li tans fu trespassés,
Vi sor le pint tant amassés
D'oisiax, s'est qui croire m'en welle,
Qu'il n'i avoit branche ne fuelle
Que ne fust colverte d'oisiax;
S'en estoit li arbres plus biax;

42d.463

Et trestot li oisiel cantoient
Si que mout bien s'entr'acordoient;
Mais divers chans cantoit cascuns,
C'onques ço que cantoit li uns
A l'autre canter n'i oï.
De lor joie me resjoï,
S'escoltai tant qu'il orent fait
Lor service trestot a trait;
K'ainc mais ne vic si bele joie
Ne mais ne cuic que nus hon l'oie
Se il ne va oïr celi
Ki tant me plot et abeli
Que jo m'en dui por fol tenir.
Tant i fui que j'oï venir
Chevaliers, ço me fu avis,
Bien cuidai que il fuscent .vi.,
Tel noise et tel esfroi menoit
Uns seus chevaliers ki venoit.
Quant jo le vi tot seul venant,
Mon cheval restrains maintenant,
Al monter demore ne fis;
Et cil, conme maltalentis,
Vint plus tost c'uns alerions,
Fiers par sanblant conme lions.
De si haut con il pot crier
Me conmencha a desfier,
Et dist: « Vassal, mout m'avés fait,
Sans desfianche, honte et lait.
Desfier me deüsciés vos
Se il eüst guerre entre nos,
U au mains droiture requerre
Ains que vos me meüsciés guerre.
Mais se jo puis, sire vassax,
Sor vos retornera li max
De mon bos, ki est abatus.
Plaindre se doit qui est batus;
Et jo me plag, si ai raison,
Que vos m'avés de ma maison
Cachié al foldre et a la pluie.
Fait m'avés cose qui m'anuie,
Et dehait ait cui il est bel,
K'en mon bos et en mon castel

43a.507

M'avés faite tele envaïe
Que mestier ne m'eüst aïe
De gent ne d'arme ne de mur.
Onques ni ot arme aseür
De fortereche ki i fust,
Por dure piere ki i fust.
Mais saciés que desoremais
N'arés a moi trives ne pais. »
A cest mot, nos entrenusumes,
Et nos escus andoi preïmes,
Si se colvri cascuns del soin.
Li chevaliers ot cheval boin
Et lance roide; et fu sans dolte
Plus grans de moi la teste tote.

Ensi del tot a meschief fui,
Car je fui plus petis de lui
Et ses chevax plus grans du mien.
Parmi le voir, ce sachiés bien,
M'en vois por ma honte colvrir.
Si grant colp con jo peut solfrir
Li donai, c'onques ne me fains;
El comble de l'escu l'atains;
Si mis trestote ma poissance
Si k'en pieces vola ma lanche;
Et li siue remest entiere,
Qui n'estoit mie mout legiere,
Ains pesoit plus, al mien cuidier,
Que nule lanche a chevalier,
C'ainc nule si grosse ne vi.
Et li chevaliers me feri
Si roidement que du cheval
Parmi la crupe, contreval,
Me mist a la tiere tot plat;
Si me laissa hontex et mat,
C'onques puis ne ne regarda.
Mon cheval prist et moi laissa;
Si se mist arriere a la voie.
Et jou, ki mon roi ne savoie,
Remés coreços et pensis.
Dalés la fontaine m'assis,
.I. mout petit me reposai;
Le chevalier sivir n'osai,

43b.549

Car folie faire cuidasce.
Et, se jo bien faire l'osasce,
Ne seuc jo onques k'il devint.
En la fin, volentés me vint
C'a mon oste covent tenroie
Et que par la retorneroie.
Ensi me plot, issi le fis,
Et mes armes totes jus mis
Por aler plus legierement;
Ensi m'en ving honteusement.

Quant jo ving la nuit a l'ostel,
Trovai mon oste tot autel,
Aussi lié et aussi cortois
Conme j'avoie fait ainsçois.
Onques de rien ne m'aparchui,
Ne de sa fille ne de lui,
Que mains volentiers me veïssent
Ne que mains d'onor me feïssent
K'il avoient fait l'autre nuit.
Grant honor me porterent tuit,
Le lor merci, en lor maison,
Et dïent bien c'onques mais hom
N'en ert escapés, k'il seüscent
Ne que oï dire l'eüscent,
Par la u j'estoie venus,
K'il ne fust pris u retenus.
Ensi alai, ensi reving;
Al revenir por fol me ting.
Si vos ai conté conme fols
Çou c'onques mais dire ne vols.

- Par mon chief, dist messire Yains,
Vos estes mes cosins germains,
Si nos devomes entramer;
Mais de ço vos puis fol clamer
Que vos tant le m'avés celé.
Se je vos ai fol apelé,
Je vos pri k'il ne vos en poist,
Car se jo puis et il me loist,
G'irai vostre honte vengier.
- Bien pert k'il soit aprés mangier,
Fait Kex, qui taire ne se pot:
Plus a paroles en plain pot

43c.591

De vin k'en .i. mui de cervoise.
On dist que cas saols s'envoise.
Aprés mangier, sans remuer,
Va cascun Noradin tuer,
Et vos irés vengier Forré!
Sor* vostre penel abouré
Et vos cauces de fer froiies
Et vos banieres desploies?
Or tost, por Dieu, mesire Yvain,
Moverés anuit u demain?
Faites le nos savoir, biax sire,
Quant vos irés a cel martire,
Car nos vos volrons convoier;
N'i ara prevost ne voier
Qui volentiers ne vos convoit.
Et je vos pri, conment qu'il soit,
N'en alés pas sans nos congiés.
Et se vos anquenuit songiés
Malvais songe, si remanés!
- Dyables estes vos dervés,
Messire Ké, fait la roïne,
Que vostre langue onques ne fine.
Li vostre langue soit honie,
Que tant i a de vilonie!
Certes, vostre langue vos het,
Car tot le pis k'ele onques set
Dist a cascun, quels que il soit.
Langue ki onques ne recroit
De maldire soit maleoite!
La vostre langue si esploite
Qu'ele vos fait a tos haïr:
Miels ne vos puet ele traïr.
Bien sai que jo l'apeleroie
De traïson, s'ele estoit moie.
Home qui ne puet castoier
Devroit on al mostier loier,
Par Dé, devant le cruchefis.
- Certes, dame, de tos ses dis,
Fait messire .Y., ne me calt.
Tant puet et tant set et tant valt
Messire Kex en totes cours
Que il n'ert ja muiaus ne sours.

43d.633

Bien set encontre une folie
Respondre orguel et felonie,
Se* fist onques autrement.
Or, savés bien se vos ment.
Mais jo n'ai cure de tenchier
Ne de mellee conmenchier;
Car cil ne fait pas la mellee
Qui done premiers la colee,
Ains le fait cil qui se revenge.
Bien le feroit a .i. estrange
Qui tenche a un sien compagnon.
Ne voel pas sambler le gagnon
Qui se hireche et reskigne
Quant autres mastins le reskigne. »
Et quequ'il parloient issi,
Li rois hors de la cambre issi,
U il ot fait longe demore,
Car dormi ot jusc'a cele ore.
Et li baron, quant il le virent,
Trestot encontre lui sallirent
Et il tos rasseoir les fist.
Dalés le roïne s'assist,
Et la roïne maintenant
Les noveles Caloghernant
Li raconte tot mot a mot,
Ki bien et bel conter li sot.

Li rois les oï volentiers
Et fait .iii.sairemens entiers,
L'ame Uterpandragon son pere
Et le son fil et le sa mere,
Qu'il iroit veïr la fontaine,
Ja ains ne passeroit quinsaine,
Et le tempeste et la mervelle,
Et si k'il i venra la velle
Monsignor saint Jehan Baptiste,
Et si prendra la nuit sa giste,
Et dist que avec lui iront
Tot cil ki aler i volront.
De çou que li rois devisa
Toute la cors miels l'en prisa,
Car mout i voloient aler
Li baron et li bacheler.

44a.675

Mais ki qu'en soit liés ne joians,
Messire Kex* en est dolans,
Ki i cuidoit aler tous seus;
S'en fu destrois et angoisceus
Del roi, ki aler i devoit.
Por ço seulement li grevoit
K'il savoit bien que la batalle
Aroit messire Kex, sans falle;
U mesire Gauvains meismes,
Espoir, le demanderoit primes,
Ains que il, s'il la requeroit;
Ja veee ne li serroit.
Se nus de ces .ii. le requiert,
Ja contredite ne li iert.
Mais il ne les atendra mie,
K'il n'a soig de la compagnie,
Ainsçois ira tos seus, sien voel,
U a sa joie u a son duel,
Et, ki i remagne a sejor,
Il i volra estre ains tierc jor
En Breteliande, et querra,
Se il puet, tant que il verra
Le destroit sentier besogneus,
Que mout en est tres desireus,
Et le lande et le maison fort
Et le soulas et le deport
De la cortoise damoisele
Qui tant est avenans et bele,
Et le preudonme avec sa fille,
Qui en honor faire s'escille,
Tant est frans et de boine part.
Puis verrai les tors en l'assart
Et le grant vilain qui les garde.
Li demore le veoir, tarde,
Del vilain ki tant par est lais,
Grans et hisdeus et contrefais
Et noirs a guise de frison.
Puis verra, s'il puet, le perron
Et la fontaine et le bachin
Et les oisiax dessor le pin;
Si fera plovoir et venter.
Mais il ne s'en quert ja venter

44b.717

Ne ja, sien voel, nus nel savra
Dessi adont que il avra
Grant honte u grant honor eüe,
Puis si soit la cose seüe.
Messire Yvains de la cort s'emble
Se que nul home n'i assamble,
Mais seus vers son ostel s'en va.
Tote sa maisnie trova,
Si conmanda metre sa sele
Et .i. sien escuier apele
Cui il ne celoit nule rien.
« Di, va! fait il, aprés moi vien
La fors et mes armes m'aporte!
Jo m'en istrai par cele porte
Sor mon palefroi, tot le pas.
Garde que ne demores pas,
K'il me covient mout lonc aler.
Et mon cheval fai enseler,
Si l'amaine tost aprés moi,
Si ramaine mon palefroi.
Mais garde bien, jo te conmant,
Que nus qui de moi te demant,
Que ja novele ne l'en dies.
Se ja de rien moi te fies,
Ja mar t'i fieroies mais.
- Sire, dist il, ore en est pais,
Alés et je vos sivrai ja,
Que ja par moi nus nel sara.

Messire Yvains maintenant monte,
Qui vengera, s'il puet, la honte
Son cosin, ains que il retort.
Ses escuiers as armes cort
Et au cheval, si monte sus,
Que de demore n'i ot plus,
Qu'il n'i faloit ne fers ne clos.
Sen signor siut tos les esclos
Tant que il le voit dessendu;
Si l'avoit .i. poi atendu
Fors del chemin, en .i. destor.
Tot son harnas et son ator
Ot atorné et si monta.
Messire Yvains ne sejorna,

44c.759

Puis c'armés fu, ne tant ne quant,
Ainsçois erra cascun jor tant,
Par montagnes et par valees,
Et par forés longes et lees,
Par lius estranges et salvages,
Et passa selonc mains passages
Et maint peril et maint destroit
Tant k'il vint al sentier tot droit,
Plain de ronsces et d'oscurté;
Adonc fu il a salveté,
K'il ne pooit mais meserrer.
Ki que le doie comperer,
Ne finera tant que il voie
Le pin ki la fontaine onbroie,
Et le perron et le tormente
Qui pluet et tone, grelle et vente.
La nuit ot, ce poés savoir,
Tel ostel com il dut avoir;
Car plus de bien et plus d'onor
Trova assés el vavassor
C'on ne li ot conté ne dit;
Et en la pucele revit
De sens et de biaute .c. tans
Que n'ot conté Chalogrenans,
C'on ne puet pas conter la sonme
De boine dame et de preudonme,
Des k'il s'atorne a grant bonté.
Ja n'ert tot dit ne raconté,
Que langue ne poroit retraire
Tant d'onor com preudon set faire.

Messire Yvains cele nuit ot
Mout boin ostel, et mout li plot.
Et vint es essars l'endemain,
Vit le forest, vit le vilain,
Ki le forest li ensaigna;
Mais plus de .c. fois se saigna
De la mervelle que il ot,
Comment Nature faire sot
Oevre si laide et si vilaine.
Puis ala dusc'a la fontaine,
Si vit quanques voloit veoir.
Sans arrester et sans seoir

44d.801

Versa sor le perron de plain
De l'aigue le bachin tot plain.
Et maintenant venta et plut
Et fist tel tans con faire dut.
Et quant Diex redona le bel,
Sor le pint vinrent li oisel
Et fisent joie mervillose
Sor la fontaine perillose.

Et quant la joie fu remese,
Vint, d'ire plus ardans que brese,
Li chevaliers a si grant bruit
Com s'il cachast .i. cerf de ruit.
Et maintenant k'il s'entrevirent,
S'entrevinrent et samblant firent
K'il s'entrehaïscent de mort.
Cascuns ot lanche roide et fort;
Si s'entredonent si grans cols
Sour les escus qu'il ont as cols
Qu'il les percent, haubers dellicent;
Les lances fendent et esclicent,
Et li tronchon volent en haut.
Li uns l'autre a l'espee assalt,
Et ont, au caple des espees,
Les guiges des escus colpees
Et les escus dehekiés tous,
Et par deseure et par desous,
Si que les pieces jus en pendent,
N'il ne se cuevrent ne desfendent;
Car si les ont haligotés
C'a delivre sor les costés
Et sor les bras et sor les hanches
En caïrent les pieches blanches.
Felenessement s'entresprevent,
Onques d'un estal ne se muevent,
Nient plus que feissent doi gres;
Ainc doi chevalier si engrés
Ne furent de lor mors haster.
N'ont cure de lor cols gaster,
K'al miex qu'il püent les enploient.
Et li elme embarent et ploient
Et del hauberc les malles volent,
Si que del sanc assés se tolent;

45a.843

Car d'els meïsmes sunt si caut
Li haubers mie ne lor valt
A cascun gaires plus d'un froc.
Ens es vis se fierent d'estoc,
S'est grans mervelle que tant dure
Li batalle si fors et dure.
Mais andoi sunt de si grant cuer
Que li uns por l'autre, en nul fuer,
De tiere .i. piet ne guerpiroit
Se dusc'a mort navrés estoit.
Et de ço fisent mout que preu
C'onques lor chevax en nul lieu
Ne navrerent ne empirierent,
K'il ne volrent ne ne dagnierent,
Mais tos tans a cheval se tinrent
Que nule fois a pié ne vinrent;
S'en fu li batalle plus bele.
En la fin, son elme esquartele
Al chevalier mesire Yvains;
Del cop fu estordis et vains
Li chevaliers; si s'esmaia,
K'ainc mais si felon n'assaia,
K'il avoit dessos le capel
Le chief fendu dusc'al cervel,
Si que del cervel et del sanc
Tainst li malle del hauberc blanc,
Dont si tres grant dolor senti
Por poi li cuers ne li menti.
S'il fui puis, n'ot mie tort,
Car navré se senti a mort;
Que rien ne li valut desfense.
Si tost s'en fuit, quant il s'apense,
Vers son castel s'est ellaisciés,
Et li pons li fu abaisciés
Et li porte olverte a bandon;
Et messire Yvains de randon
Quanqu'il puet aprés esperone.
Si com gerfaus grue randone,
Qui de loing muet et tant l'aproche
Tenir le cuide mais n'i toche,
Ensi fuit cil et il le cache
Si pres por poi qu'il ne l'embrace,

45b.885

Et si ne le par puet ataindre;
Si est si pres que il l'ot plaindre,
De la destreche que il sent.
Mais toustans al fuir entent
Et cil del cachier s'esvertue,
Qui crient sa paine avoir perdue
Se mort u vif ne le retient,
Car des ramprosnes li sovient
Que mesire Kex li ot dites.
N'est pas de la promesse quites
Que son cosin avoit promise,
Ki creüs n'ert en nule wise
Se vraies ensagnes n'en porte.
A esperon jusc'a la porte
De son castel l'en a mené;
Si sunt ens ambedoi entré.
N'onme ne fenme ne troverent
Es rues, si com il alerent,
Et vinrent ambedoi d'ellais
Dusch'a la porte du palais.
Li porte fu mout haute et lee,
Si avoit mout estroite entree
Que doi honme ne doi cheval
Sans encombrier et sans grant mal
N'i peüssent ensamble entrer
Ne doi home entrencontrer;
Car tot ensement estoit faite
Com arbaleste qui agaite
Le trait, tant qu'il vient en agait;
Et l'espie est en son agait
Dessus, ki fiert et trait et prent,
Quant ele escape et dessent
Et riens nule adoise a le clef,
Ja n'i tolchera si soef.
Ensi desous la porte estoient
Doi trebuchet qui sostenoient
Amont une porte colant
De fer esmolue et trenchant;
Quant riens sor cel engieng montoit,
Li porte dessus destendoit;
S'estoit pris et detrenchiés tos
Cui li porte atagnoit desous.

45c.927

Et tot a droit em mi le pas
Estoit si destrois li trespas
Com ce fust .i. sentiers batus.
El droit chemin s'est embatus
Li chevaliers molt sajement
Et mesire Yvains folement
Sel vint atagnant de si pres,
Hurte grant aleüre aprés,
C'a l'archon derriere se tint;
Et de chou si bien li avint
Qu'il se fu avant estendus:
Tost eüst esté porfendus,
Se ceste aventure ne fust,
Car ses chevax marcha le fust
Ki tenoit la porte de fer.
Aussi com dyables d'infer,
Dessent li porte et chiet a val,
S'ataint le crupe du cheval
Derriere, et trencha tot par mi;
Mais ne tolcha, la Dieu merchi,
Monsignor Yvain fors que tant
Que triers son dos li vint rasant,
Si que ans.ii. les esperons
Li trencha al res des talons,
Si k'il caï mout esmaiés;
Et cil ki fu a mort blechiés
Li escapa en tel maniere.
Une tel porte avoit derriere
Comme cele devant estoit.
Li chevaliers ki s'en fuioit
Par cele porte s'en issi
Et li porte aprés lui chaï.
Ensi fu messire Yvains pris.
Mout angoisços et entrepris
Remest dedens le sale enclos,
Qui tote estoit celee a clos;
D'or erent paintes les maisieres,
De boine oevre et de colors chieres.
Mais de rien si grant duel n'avoit
Com de ço que il ne savoit
Quel part cil s'en estoit alés.
D'une cambre d'illuec dalés

45d.969

Oï olvrir .i. huis estroit;
Queque il ert en tel destroit,
S'en issi une damoisele,
Seule, mout avenans et bele,
Et l'uis aprés li refferma.
Quant monsignor Yvain trova,
Si l'esmaia mout de premiers:
« Certes, dist ele, chevaliers,
Jo cuit que mal estes venus:
Se vos estes apercheüs,
Vos i serrés tous depechiés,
Car mes sire est a mort jugiés
Et bien sai que vos l'avés mort.
Ma dame en fait .i. duel si fort,
Et ses gens environ li crïent,
A poi que de duel ne s'ocïent;
Si vos sevent il bien çaiens,
Mais entr'els est li duels si grans
Que il n'i püent ore entendre;
Sil* vos voelent ocire et prendre:
A ço ne puent il fallir,
Quant il vos volront assaillir. »
Et mesire Yvains li respont:
« Ja, se Dieu plaist, ne m'ociront
Ne ja par els pris ne serrai.
- Non, se Dieu plaist, car j'en ferai
Avec vos ma poissance toute.
N'est mie preudom qui trop dolte;
Por ço quit que preudom soiés
Que n'estes pas trop esmaiés.
Et sachiés bien, se jo pooie,
Service et honor vos feroie,
Car vos le feïstes ja moi.
Une fois, a la court le roi
M'envoia me dame en messaje;
Espoir, n'estoie pas si saje,
Si cortoise, ne de tel estre
Conme pucele deüst estre;
Mais onques chevalier n'i ot
Qui a moi dagnast dire mot
Fors vos, tos seus, qui estes chi;
Mais vos, la vostre grant merchi,

46a.1011

M'i honorastes et servistes.
De l'onor que vos m'i fesistes
Vos rendrai ci le guerredon.
Bien sai conment vos avés non
Et reconeü vos ai bien:
Fiex estes le roi Uriien,
S'avés a non mesire Yvains.
Or soiés seürs et certains
Que ja, se croire me volés,
Ne serés pris ne atrapés;
Icest mien anelet prendés
S'il vos plaist, si le me rendés
Quant je vos arai delivré. »
Lors li a l'anelet livré,
Si li a dit k'il a tel forche
Com a li bos dedens l'escorce,
Ki le cuevre, c'on n'en voit point;
Mais il covient que on l'enpoint
Si k'el puig soit li piere enclose;
Puis n'a garde de nule cose
Cil ki l'anel en son doit a,
Que ja veïr ne le porra
Nus hom, tant ait les oels overs,
Neis que li bos qui est colvers
De l'escorce qui sor lui naist.
Icho monsignor Yvain plaist,
Et, quant ele li ot çou dit,
Sel mena seoir en .i. lit
Colvert d'une quelte si riche
C'ainc n'ot tele li dus d'Ostriche;
La li a dit que, s'il voloit,
A mangier li aporteroit;
Et il dist k'il li estoit bel.
Li damoisele cors* isnel
En la cambre, revint mout tost,
S'aporta .i. capon en rost
Et .i. gastel et une nape,
Et vin qui fu de boine crape,
Plain pot, d'un blanc hanap colvert;
Si li a a mangier offert;
Et cil, cui il estoit mestiers,
Manga et but mout volentiers.

46b.1053

Quant il ot mangié et beü,
Furent par laiens esmeü
Cil qui occire le cuidoient
Et lor segnor vengier voloient,
Qui ja estoit en biere mis.
Et cele li a dit: « Amis,
N'oés qu'il vos quierent ja tuit?
Mout i a grant noise et grant bruit,
Mais, qui que viegne, ne qui voise,
Ne vos movés ja por la noise,
Que vos ne serés ja trovés,
Se de cest lit ne vos movés;
Ja verrés plaine ceste sale
De gent mout aniose et male
Qui trover vos i cuideront;
Et si cuic qu'il aporteront
Par ci le cors por metre en tere;
Si vos conmencheront a querre
Et desos bans et desos lis.
Ce serroit soulas et delis
A home qui paor n'aroit,
Quant gent si avule verroit;
K'il seront tot si avulé,
Si desconfit et desgiglé
Que il errageront tot d'ire;
Jo ne vos sai or plus que dire,
Mais Dieu puisse jo aorer,
Que jo n'i puis plus demorer.
Diex m'a doné et lieu et aise
De faire cose qui vos plaise,
Car mout grant talent en avoie. »
Lors s'est mout tost mise a la voie
Et, quant ele s'en fu tornee,
Tote la gens fu atornee,
Ki de .ii. pars as portes vinrent
Et bastons et espees tinrent;
Si ot mout grant foule et grant presse
De gent felenesse et engresse;
Et virent le cheval trenchié,
Devant la porte, le moitié.
Lors si cuidierent estre cert
Que, quant l'uis aroient olvert,

46c.1095

Que dedens celui troveroient
Que il por ocire queroient.
Puis leverent amont les portes,
Par cui maintes gens furent mortes,
Mais il n'i ot a celui ciege
Tendu ne trebucet ne piege,
Ains i entrerent tot d'un front;
L'autre moitié trovee ont
Del cheval mort dalés le suel;
Mais onques entr'els n'orent oel
Que monsignor Yvain veïssent,
Que mout volentiers l'ocheïssent;
Et il les veoit corechier
Et forsener et erragier;
Et disoient: « Ço, que puet estre?
Que çaiens n'a huis ne fenestre
Par u nule riens s'en alast,
Se n'estoit oisiax qui volast,
U esquireus qui est velus,
U beste aussi petite u plus,
Car les fenestres sunt ferees,
Et les portes erent fermees
Lués que mes sire en issi fors;
Mors u vis est çaiens li cors,
Que la fors ne remest il mie;
La sele assés plus que demie
Est çaiens, ce veons nos bien,
Et de lui ne veons nos rien
Fors que les esperons trenchiés
Qui li chaïrent de ses piés.
Alons cerquier par tos ces angles,
Si laisçomes ester nos jangles;
Encore est il çaiens, jo cuit,
U nos somes encanté tuit,
U tolu le nos ont maufé. »
Ensi trestot d'ire escaufé
Parmi la sale le queroient
Et parmi ces parois feroient
Et parmi lis, et parmi bans;
Mais des cols fu cuites li frans
Lis u cil estoit colciés,
K'il ni fu ferus ne tolciés.

46d.1137

Mais assés ferirent entour
Et mout rendirent grant estour:
« Mors u vis est çaiens li cors,
K'il n'en est pas issus la hors. »
Partot fierent de lor bastons,
Com avules qui a tastons
Va alcune cose querant,
Et tos ces angles reversant
Dessos lis et dessous eskames.
Es une des plus beles dames
C'onques veïst riens terriene,
Ne crestiiens ne crestiene.
De plus bele n'estoit parole;
Mais de duel faire estoit si fole
A poi de duel ne s'ocioit.
Et a la fie, s'escrioit
Si haut qu'ele ne pooit plus,
Puis rechaoit a tere jus.
Et quant amont estoit levee,
Aussi conme fenme dervee,
Se conmenchoit a deschirer
Et ses cavex a detirer;
Ses mains detort et ront ses dras,
Et si se pasme a cascun pas,
Ne riens ne le puet conforter,
Car son segnor en voit porter
Devant li, en la biere, mort,
Dont ja ne cuide avoir confort;
Por ço crioit a halte vois.
L'aigue beneoite et la crois
Et li cierge aloient devant
Avec les dames d'un covent,
Li candeler, li encensier
Et li clerc, qui sunt despensier
De faire le halte despense
A coi li caitive arme pense.

Mesire Yvains oï les cris
Et le duel, qui ja n'ert descris,
Ne nus ne le poroit descrire,
Ne tex ne fu escris en livre;
Et li porcessions passa,
Mais entor la biere amassa

47a.1177

Em mi la sale uns grans encals,
Car li sans tous vermaus et caus
Rissi al cors parmi la plaie;
Et ço fu provance veraie
K'encore estoit laiens, sans falle,
Cil qui ot faite la batalle.
Lors ont partot cerquié et quis
Celui qui l'ot mort et conquis,
Et reverchié et remué,
Tant que tot furent tressué
Por l'angoisçe et por le touel
Qu'il orent por le sanc vermel
Qui devant els fu degoutés.
S'en fu mout ferus et boutés
Messire Yvains, la u il jut;
Mais onques por ço ne se mut.
Et les gens plus et plus dervoient
Por les plaies ki escrevoient;
Si s'esmervellent por coi sagnent,
Ne voient rien dont il se plagnent,
Et dist cascuns et cil et cist:
« Entre nos est cil qui l'ocist,
Et nos ne le veomes mie:
Ço est mervelle deablie. »
Por ço si grant dolor menoit
La dame a poi ne forsenoit,
Et crioit conme hors du sens:
«Ha! Diex dont ne trovera l'en
L'omicide, le traïtour
Qui m'a ocis mon boin segnor?
Boin? Voire le millor des buens!
Vrais Diex, li tors en sera tuens
Se tu l'en laisses escaper.
Autrui que toi n'en sai blasmer,
Car tu le m'embles a veüe.
Ainc tex force ne fu veüe
Ne si grans tors com tu me fais,
Car nis veïr ne le me lais,
Celui ki ci est pres de moi.
Bien puis derver, quant jo nel voi,
Que entre nos s'est çaiens mis
U fantosmes u anemis;

47b.1219

Si sui enfantosmee toute;
U cil est couars, si me dolte,
Quant devant moi venir nen ose.
Ahi! fantosmes, male cose,
Por qu'ies vers moi acouardie
Quant a mon segnor fus hardie?
Que ne te puis ore tenir?
Mais comment puet ço avenir
Que tu mon signor ocesis
S'en traïson ne le fesis?
Car ja par toi conquis ne fust
Mes sire, se veü t'eüst,
K'el monde son parel n'avoit,
Ne Diex ne hom ne l'i savoit,
Ne il n'en i a mais nul de teus.
Certes, se tu fusces mortex,
N'osasses mon signor atendre,
C'a lui ne se pooit nus prendre. »

Ensi la dame se debat,
Ensi tot par li se combat,
Ensi se tormente et confont,
Et sa gens, avec, si reffont
Si grant dolor que plus ne puent.
Le cors en portent, si l'enfoent;
Et tant ont quis et tribolé
Que del querre sunt tot lassé;
Si le laissent coi par anui,
Quant ne püent veïr nului
Qui de rien en fache a mescroire.
Et les nonains et li provoire
Orent ja fait tot le service;
Repairiet furent de l'eglise
Et venu sor la sepulture.
Mais de trestot ço n'avoit cure
Li damoisele de la cambre;
De monsegnor Yvain li menbre;
S'est a lui venue mout tost
Et li a dit: «Sire, a grant ost
A çaiens ceste gens esté.
Mout ont chi aval reversé
Et remué tos ces angles,
Plus menuement que brachés

47c.1265

Ne va querant pertris ne qualle.
Paor avés eü sans falle.
- Par foi, fait il, vos dites voir;
Ja si grant ne cuidai avoir.
Mais neporquant, s'il pooit estre,
U parmi huis u par fenestre
Verroie volentiers la fors
Le porcession et le cors. »
Mais il n'avoit entension
Au cors n'a la porcession,
K'il volsist k'il fuscent tot ars,
Se li eüst cousté .m. mars.
.M. mars? Voire, par foi, .iii. mile.
Mais por la dame de la vile,
Que il voloit veïr le dist;
Et li damoisele le mist
A une fenestre petite.
Quanqu'ele puet vers lui s'aquite
De l'onor qu'il li avoit faite.
Parmi cele fenestre agaite
Mesire Yvains la bele dame,
Qui dist: « Biax sire, de vostre ame
Ait Diex merci, si voirement
Que onques, au mien essient,
Chevaliers sor cheval ne sist
Qui de rien nule vos valsist.
De vostre honor, biaux sire chiers,
Ne fu onques nus chevaliers,
Ne de la vostre compagnie;
Largece fu la vostre amie
Et hardemens vostre compains.
En la conpagnie des sains
Soit la vostre ame, biax dols sire! »
Lors rechiet jus, si se descire
Trestot quanques as mains li vient.
A mout grant paine se retient
Messire Yvains, comment qu'il tourt,
Que les mains tenir ne li cort.
Mais la damoisele li prie
Et loe et conmande et castie,
Conme cortoise et deboinaire,
Qu'il se gart de folie faire

47d.1307

Et dist: «Vos estes ci molt bien.
Ne vos movés por nule rien
Tant que cis dels soit abaisciés;
Et ces gens departir laissiés,
Qu'il se departiront par tens.
Si vos contenés a mon sens,
Si com je vos lo contenir,
Grans biens vos en pora venir.
Ici poés estre et seoir,
Et ens et fors la gent veoir
Qui passeront parmi la voie,
Ne ja n'ert nus qui ci vos voie,
Si avés mout grant avantage;
Mais gardés vos de dire oltrage.
Gardés, se vos pensés folie,
Que pour rien ne le dites mie.
Li sajes hom fol pensé cuevre
Et met, s'il puet, le boin a oevre.
Or vos gardés dont conme sages
Que n'i metés la teste en gages,
C'on n'en prendroit ja raenchon;
Soiés pour vos en sospechon,
Et de mon conseil vos soviegne;
S'estés en pais tant que jo viegne,
Car je n'os plus ci arrester,
G'i poroie tant demorer,
Espoir, que on m'en meskerroit
Por ço que on ne me verroit
Avec les autres en la presse,
S'en prendroie male confesse. »

Atant s'en part et cil remaint,
Qui ne set comment se demaint:
Del cors qu'il voit que on enfuet
Li poise, quant avoir n'en puet
Alcune cose k'il emport
Tesmoing qu'il l'a conquis et mort,
Que mostrer puist en aparant;
S'il n'en a tesmoig et garant,
Dont est il honis entresait,
Tant est Kex et fel et malvais,
Plains de ramprosnes et d'anui,
Que jamais ne garroit a lui.

48a.1353

« Toustans mais m'iroit ramprosnant
Et gas et ramprosnes disant,
Alsi com il dist l'autre jour. »
Foles ramprosnes al sejour
Li sunt al cuer batans et fresces.
Et de son miel et de ses bresces
Li randonroit noveles* mors*
Qui par sa tiere fait son cours;
S'a tote sa proie acoillie;
S'a enamee s'anemie,
S'aime la rien qui plus le het.
Bien a vengie, et si nel set,
La dame la mort son segnor;
Venjance en a prise grignor
Qu'ele prendre ne le seüst
S'Amours vengie ne l'eüst,
Ki si dolchement le requiert,
Qui par les oels el cuer li fiert;
Mais cil cols a plus grant duree
Que cols de lanche ne d'espee:
Cols de lanche garist et saine
Mout tost, quant mires i met paine;
Et li plaie d'Amors empire
Quant est plus pres de son mire.

Une plaie a mesire Yvains,
Dont il ne sera jamais sains,
C'Amors s'est tote a lui rendue.
Les lieus u ele est espandue
Vait reversant, et si s'en oste;
Ne velt avoir ostel ne oste
Se cestui non, et que preus fait
Quant de malvaisté se retrait
Por ço que tote a lui se doinst.
Ne velt c'aillors ait de lui point;
Se cerke tos les viex ostex;
S'est grans hontes c'Amors est tex
Et quant ele si mal se proeve
Quant el plus vil lieu qu'ele troeve
Se herberge tot aussi tost
Com en tot le millor d'une ost.
Mais ore est ele bien venue,
Chi ert ele a honor tenue

48b.1395

Et chi li fait boin demorer.
Ensi se devroit atorner
Amors, ki est si haute cose,
Que mervelle est conment ele ose
De honte en malvais lieu descendre.
Celui samble ki en la cendre
Et en la polre espant son balsme;
Cil het honor et aime blasme,
Et destempre suie de miel,
Et melle chucre avec le fiel.
Mais or n'a mie fait itel,
Ore est logie en franc ostel,
Dont nus ne li puet faire tort.
Quant on ot enfoui le mort,
S'en partirent tot erranment;
Clerc, chevalier et autre gent,
Ne dame n'i remest, que cele
Qui sa dolor mie ne cele.
Mais cele i remaint tote seule,
Qui sovent se prent par le gueule,
Et tort ses puins et bat ses palmes,
Et list en .i. psaltier ses psalmes,
Enluminé a letres d'or.
Et messire Yvains est encor
A la fenestre, u il esgarde;
Mais con il plus s'en done garde,
Plus l'aime et plus li abelist.
Ço qu'ele pleure et q'ele list,
Volsist bien que laissié l'eüst
Et c'a li parler li leüst.

En cel voloir l'a Amors mis,
Qui a la fenestre l'a pris;
Mais de son voloir se despoire,
Car il ne puet cuidier ne croire
Que ses voloirs puist avenir,
Et dist: « Por fol me puis tenir,
Quant jo voel ço que ja n'arai;
Son signor ai mort li narai
Et cuic a li pais avoir!
Par foi, ne cuic mie savoir,
Qu'ele me het plus orendroit
Que nule rien, et si a droit.

48c.1437

Orendroit ai jo dit que sages,
Que fenme a plus de .c. corages.
Celui corage qu'ele a ore,
Espoir, cangera ele encore;
El le cangera sans espoir;
Si sui mout fols qui m'en despoir,
Et Diex li doinst par tans cangier,
K'estre m'estuet en son dangier
Toustans mais, puis c'Amors le velt.
Qui Amors en gré ne requelt
Puis que ele entor lui se trait,
Felonie et traïson fait;
Et jo di, qui or velt si l'oie,
Qu'il ne puet avoir bien ne joie.
Mais por ço n'en perdrai je mie,
Encore amerai m'anemie,
Car jo ne le doi pas haïr
Se jo Amors ne voel traïr.
Ço c'Amors velt doit jo amer.
Et me doit ele ami clamer?
Oïl, voir, por ço que jou l'aim.
Et jo m'anemie le claim;
Ele me het, si n'a pas tort,
Car ço qu'ele amoit li ai mort.
Et sui jo dont ses anemis?
Naie, certes, mais ses amis;
Onques riens tant amer ne vals.
Mout me poise des blons caviax
Que jo li voi rompre et trenchier;
N'onques ne puent estanchier
Les larmes, ki des oels li chieent:
Totes ces coses li dessient!
Atot ço qu'il sunt plain de lermes,
Si qu'il n'en est ne fins ne termes,
Ne finent onques si bel oel.
De ço qu'ele pleure me duel
Ne de rien n'ai si grant destrece
Con de son vis que ele blece,
Qui n'eüst pas ço desservi:
Onques si bien tallié ne vi
Ne si fres ne si colore;
Et çou me par a acoré

48d.1481

Que jo li voi sa gorge estraindre.
Certes ele ne se set faindre
Que al pis qu'ele puet ne se face;
Que nus cristaus ne nule glace
N'est si clere ne si polie.
Diex! Por coi fait si grant folie
Et por coi ne se blece mains?
Por coi detort ses beles mains
Et fiert son pis et esgratine?
Dont ne fust çou mervelle fine
A esgarder, s'ele fust lie,
Quant ele est or si bele irie?
Oïl, voir, ce puet on jurer,
Onques mais si desmesurer
Ne se pot en biauté Nature,
Car trespassee i a mesure
U ele, voir, n'i olvra onques.
Comment peüst ço estre donques?
Dont fust si grans biautés venue?
Ja le fist Diex, de sa main nue,
Por Nature faire muser.
Tot son tans i poroit user
S'ele le voloit contrefaire,
Que ja n'en poroit a chief traire;
Ne Diex, s'il s'en voloit pener,
N'i saroit jamais assener
Que jamais tele refesist
Por paine que il i mesist. »

Ensi mesire Yvains devise
Celi qui de duel se debrise,
N'ainc mais ne cuic qu'il avenist
Que nus hom qui prison tenist
Amast en si fole maniere,
Dont il ne fera ja proiere
Ne autres por lui, bien puet estre.
Tant fu illuec a la fenestre
Qu'il en vit la dame raler
Et que on ot fait avaler
Ambes .ii. les portes colans.
De ço fust uns autres dolans,
Qui miex amast sa delivrance
Qu'il ne fesist sa demoranche;

49a.1525

Mais il met autretant a oevre
Se on les clot, que s'on les oevre.
Il ne s'en alast mie, certes,
Se li fussent adiés olvertes
Et se li dame li donast
Congiet et si li pardonast
La mort son segnor boinement,
Si s'en alast seürement,
C'Amors et Hontes le detient,
Qui de .ii. pars devant li vient.
Il est honis se il s'en va,
Car ço ne cuideroit nus ja
Que il eüst si esploitié;
D'autre part, a che colvoitié,
De la bele dame veoir
Au mains, s'il plus n'en puet avoir,
Que de la prison ne li caut:
Morir velt ains que il s'en alt.
Mais li damoisele repaire,
Qui li velt conpagnie faire
De solasier et deporter
Et porcachier et aporter
Quanqu'il volra a sa devise.
Mais de l'amor k'en lui est mise,
Le trova mout pensiu et vain;
Si li a dit: « Mesire Yvains,
Quel siecle avés vos hui eü?
- Tel, fait il, qui mout m'a pleü.
- Pleü? Par foi, vos dites voir?
Cconment* puet dont boin siecle avoir
Ki voit c'on le quert por ocire,
S'il n'aime sa mort et desire?
- Certes, dist il, ma dolce amie,
Morir ne volroie jou mie,
Et si me plot mout tote voie
Ce que jo vi, se Diex me voie,
Et plaist et plaira tostans mais.
- Or le laiscons atant en pais,
Fait cele, car bien sai entendre
U ceste parole velt tendre.
Ne sui si nice ne si fole
Que bien n'entende une parole.

49b.1567

Mais ore en venés aprés moi,
Car jo prendrai prochain conroi
De vos metre hors de prison.
Bien vos metrai a garison. »
Et cil respont: « Soiés certaine,
Jo ne me movrai, de samaine,
En larrechin ne en emblee.
Quant la gens ert tote assanblee
Parmi ces rues, la deffors,
Plus a honor m'en istrai fors
Que jo ne feroie nuitantre. »
A cest mot, aprés li s'en entre
En une petite cambrete.
La damoisele, ki fu brete
De lui servir et en apens,
Se li fist creanche et despens
De tot quanques il li covint.
Et quant lius fu, bien li sovint
De çou que il li avoit dit,
Que mout li plot ce que il vit,
Quant par la sale le queroient
Cil qui occire le voloient.

Li damoisele estoit si bien
De sa dame que nule rien
A dire ne li redoltast,
A coi que li cose montast,
Qu'ele estoit sa maistre et sa garde.
Mais por coi fust ele coarde
De sa dame reconforter
Et de s'onor a* amonter?

La premiere fois a conseil
Li dist: « Dame, mout m'esmervel
Que folement vos voi olvrer.
Et cuidiés vos dont recolvrer
Vostre signor por faire duel?
- Naie, fait ele, mais mon voel
Seroie jo morte avec lui.
- Por coi? - Por aler aprés lui.
- Aprés lui? Diex vos en deffende
Et aussi boin signor vos rende.
Si com il est poesteïs.
- Ains tel mençoigne ne desis,

49c.1611

K'il ne me poroit si boin rendre.
- Alsi boin, se le volés prendre,
Vos renderai, sel proverai.
- Fui toi! Ja voir nel troverai.
- Si ferés, dame, s'il vos siet.
Mais or dites, si ne vos griet,
Vostre tere, ki deffendra
Quant li rois Artus i venra,
Qui doit venir l'autre semaine
Al perron et a la fontaine,
A grant gent et a compagnie?
Sachiés que ço ne falra mie;
Ja en avés eü messaje
De la demoisele salvage
Qui les letres vos envoia.
Ahi! com bien les emploia!
Vos deüssiés or consel prendre
De vostre fontaine deffendre,
Et vos ne finés de plorer!
N'i eüssiés que demorer,
Se vos pleüst, ma dame chiere;
Car certes une camberiere
Ne valent tot, bien le savés,
Li chevalier que vous avés:
Ja par celui qui miex se prise
N'en ert escus ne lance prise.
De gent malvaise avés vos mout,
Mais ja n'i ara si estout
Qui a cheval monter en ost,
Et li rois vient a si grant ost
K'il saisira tot sans deffense. »
Li dame set mout bien et pense
Que ele le conselle en foi;
Mais une folie a en soi
Que les autres fenmes i ont:
Et, a bien pres, totes le font,
Qui de lor volenté s'escusent
Et ço qu'eles velent reffusent.
« Tais! fait ele, ne dire mais.
Se jo t'en oi parler jamais,
Ja mar feras el que t'enfuies:
Tant paroles que tu m'anuies.

49d.1651

- Al boin eür, fait ele, dame,
Bien i pert que vos estes fenme,
Qui se corece quant ele ot
Nului qui bien faire li lot. »
Maintenant cele s'en ala;
Et la dame se rapensa
Que mout avoit grant tort eü;
Et mout volsist avoir seü
Comment ele poroit prover
Que poroit chevalier trover
Millor c'onques ne fu ses sire;
Mout li oroit volentiers dire,
Mais ele li a deffendu.
En cel pensé a atendu
Desc'a dont que cele revint;
Mais onques deffense n'i tint,
Ains li redist tot maintenant:
« Conment? est il ore avenant
Que si de duel vos occiés?
Por Dieu, et car vos confortés;
Al mains si le laisiés por honte:
A si halte dame ne monte
Que duel si longement maintiegne.
De vostre honor vos resoviegne
Et de vostre grant gentilleche.
Cuidiés vos que tote proeche
Soit morte avec vostre segnor?
.C. aussi boin et .c. mellour
En sunt remés parmi le monde.
- Se tu en mens, Diex te confonde!
Et neporquant .i. seul m'en nonme
Qui ait renon de si preudonme
Que mes sire ot tot son aé.
- Voire, si m'en sarés mal gré,
Si vos en coreceriés
Et moi vos en mesasmeriés.
- Non ferai, jo t'en asseür.
- Ce soit a vostre boin eür,
Qui vos en est a avenir,
Se il vos venoit a plaisir.
Et Diex ce done qu'il vos plaise!
Ne voi rien por coi je me taise,

50a.1693

Que nus ne nos voit ne escolte.
Vos me tenrés ja por estote,
Mais jo dirai ce qu'il me samble:
Quant doi conpagnon sont ensamble
Venu as armes en batalle,
Li quels cuidiés vos qui miex valle,
Quant li uns a l'autre conquis?
Endroit de moi doins jo le pris
Al vainqueor. Et vos, que faites?
- Il m'est avis que tu me gaites,
Si me vels a parole prendre.
- Par foi, vos poés bien entendre
Que jo m'en vois parmi le voir,
Et si vos di par estavoir
Que miex valt icil qui conquist
Vostre segnor que il ne fist:
Il le conquist, si l'encaucha
Par hardement dessi a cha,
Si qu'il l'enclost en sa maison.
- Ore oiiés, fait ele, raison,
La plus grant c'onques mais fust dite!
Fui! plaine de male esperite.
Fui! garche fole et anuiouse.
Ne dire mais itele huisose,
Ne jamais devant moi ne viegnes,
Tant que de lui parole tiegnes!
- Certes, dame, bien le savoie
Que ja vostre gré n'en aroie,
Et jel vos dis mout bien avant.
Mais vos m'eüstes covenant
Que ja mal gré ne m'en sariés.
Ne ja ire n'en averiés. »

Atant vers la cambre retorne,
U mesires Yvains sejourne,
Que ele garde a mout grant aise;
Mais ne voit chose qui li plaise
Quant la dame veïr ne puet,
Ne del plait que ele li muet
Ne se gaite ne ne set mott.
Mais la dame tote nuit ot
A li meïsme grant tenchon,
Qu'ele estoit en grant sospechon

50b.1737

De sa fontaine garandir.
Si se conmence a repentir
De celi qu'ele avoit blasmee
Et laidengie et ramprosnee,
Qu'ele estoit bien seüre et certe
Que por loier ne por desserte
Ne por amor que a lui ait
Ne l'en mist ele onques en plait.
Et plus aime ele li que lui,
Ne son honte ne son annui
Ne li loeroit ele mie,
C'a* trop est se loiax amie.

Estes vos la dame cangie:
De celi qu'ele avoit laidie
Ne cuide jamais en nul fuer
C'amer le doie de boin cuer,
Et celui qu'ele a reffusé
A mout loialment escusé
Par raison et par droit de plait,
Qu'il ne li avoit rien meffait.
Si se derraisne tot issi
Com s'il fust venus devant li;
Lors si conmenche a plaidoier:
« Di, va! Poroies tu noiier
Que par toi ne fust mors me sire?
- Iço, fait il, ne puis je dire,
Ains l'otroi bien. - Di dont por coi.
Fesis le tu por mal de moi,
Por haïne ne por despit?
- Ja n'aie jo de mort respit
S'onques por mal de vos le fis.
- Dont n'as tu rien vers moi mespris
Ne vers moi n'eüs tu nul tort,
Que s'il peüst il t'eüst mort;
Por ço, mien essient, ai gié
Et bien et loialment jugié. »

Ensi par soi meïsme proeve,
Et droit sens et raison i troeve,
Que n'a en lui haïr nul droit,
Si dist ço que ele volroit;
Et par li meïsme s'alume
Aussi com la busche qui fume

50c.1779

Tant que li flanme s'i est mise,
Que nus ne soffle ne atise.
Et s'or venoit la damoisele,
Ja derraisneroit la querele
Dont ele a esté plaidoïe,
S'en a esté mout laidoïe.
Et ele revint mout matin,
Si reconmenche son latin
La u ele l'avoit laissié.
Et cele tint le chief baissié,
Qui a mesfaite se sentoit
De ço que laidoie l'avoit;
Mais or li volra amender
Et del chevalier demander
Le non et l'estre et le lignage;
Et s'umelie conme sage,
Et dist: « Merci crier vos voel
Del grant oltrage et del orguel
Que jo vos ai dit conme fole;
Or me rendrai a vostre escole.
Mais dites moi, se vos savés,
Li chevaliers dont vos m'avés
Tenue en plait si longement,
Quels hom il est ne de quel gent.
Se il est tex c'a moi atagne,
Mais que de par lui ne remagne,
Jou le ferai, je vos otroi,
Signor de ma tere et de moi.
Mais il le colvenra si faire
Que on n'en puist nul mal retraire
Ne dire: « C'est cele ki prist
Celui qui son segnor ocist. »
- En non Dieu, dame, si ert ill.
Signor arés le plus gentill
Et le plus franc et le plus bel
Qui onques fust del tans Abel.
- Comment a non? - Mesire Yvains.
- Par foi, cil n'est mie vilains,
Ains est mout frans, jo le sai bien,
Si est fiex le roi Urien.
- Par foi, dame, vos dites voir.
- Et quant le porons nos avoir?

50d.1821

- Desqu'a .viii. jors. - Trop tarderoit,
Que ja, mien voel, venus seroit.
Viegne anuit u demain, seviax.
- Dame, ne cuit que nus oisiax
Peüst en .i. jor tant voler.
Mais jo i ferai ja aler
.I. mien garchon qui mout tost cort,
Qui ira bien jusqu'a la court
Al roi Artu, al mien espoir,
Al mains jusqu'a demain al soir,
Que dusques la n'iert il trovés.
- Cis termes est trop lons d'assés:
Li jor sunt lonc. Mais dites li
Que demain al soir resoit chi
Et voist plus tost que il ne seult.
Se bien tost esploitier se velt,
Fera de .ii. jornees une;
Et anquenuit luira li lune,
Si refache de la nuit jor,
Et jo li donrai al retour
Ço qu'il volra que jo li doigne.
- Sor moi laissiés ceste besogne,
Que vos l'arés entre vos mains,
Jusqu'a tierc jor, a tot le mains.
Et endementiers manderés
Vos gens et si demanderés
Consel del roi ki doit venir.
Por la costume maintenir
De vostre fontaine desfendre
Vos colvenroit conseil aprendre;
Ne il n'i ara ja si haut
Qui s'ost vanter que il i aut.
Lors porés dire tot a droit
Que marier vos colvenroit.
Uns chevaliers molt alosés
Vos velt prendre, mais ne l'osés
Prendre se il nel loent tuit.
Por ço preg jo bien en conduit,
Tant les conois jo a malvais,
Que, por cargier autrui le fais
Dont il seroient trop cargié,
Vos en venront caïr al pié,

51a.1863

Et si vos en merchieront
Car hors de grant paine serront.
Car qui paor a de son ombre,
S'il puet, volentiers se desconbre
D'encontre de lanche et de dart,
Car c'est malvais jus a coart. »
Et la dame respont: « Par foi,
Ensi le voel, ensi l'otroi,
Et jou l'avoie ja pensé
Si com vos l'avés devisé,
Et tot ensi le ferons nos.
Et ci por coi demorés vos?
Alés! Ja plus n'i delaiés!
Si faites tant que vos l'aiés,
Je remanrai avec mes gens. »
Ensi fina lor parlemens.
Et cele faint que voist querre
Monsignor Yvain en sa tierre,
Si le fait cascun jor bagnier,
Et laver et aplainier;
Robe d'escarlate vermelle,
A son vestir la* aparelle
Plichon vair a tote la croie.
N'est riens que ele n'i acroie
Qu'il coviegne a home acesmer
Fremal d'or a son col fremer,
Olvré a pieres precieuses
Qui font les gens plus gracieuses,
Et çainture, et almosniere
Faite d'une riche sangniere;
Bien l'a del tot apareillié.
Et a sa dame renunchié
Que revenus est li messages:
Si a esploitiet conme sages.
« Comment, dist ele, quant venra
Mesire Yvains? - Çaiens est ja.
Çaiens est il viegne dont tost,
Celeement et en repost
Dementres c'avec moi n'est nus.
Gardés qu'il n'en i viegne plus,
Car jo harroie mout le quart. »
La damoisele atant s'en part;

51b.1905

S'est venue a son oste arriere,
Mais ne mostre mie a sa chiere
La joie que ses cuers avoit,
Et dist que sa dame savoit
Qu'ele l'avoit laiens gardé,
Et dist: « Mesire Yvains, par Dé,
Ne m'i valt mais nient celee.
Tant est de vos la cose alee
Que ma dame la cose set,
Qui mout m'en blasme et mout m'en het,
Et mout m'en a ocoisonee;
Mais tel seürté m'a donee
Que devant li vos puis mener
Sans rien nuire et sans rien grever.
Ne vos grevera rien, je croi,
Fors tant, que mentir ne vos doi,
Car jo feroie mesprison,
Avoir vos velt en sa prison,
Et si velt si avoir le cors
Que neis li cuers ne soit deffors.
- Certes, dist il, jo le voel bien,
Il ne me grevera ja rien;
En sa prison voel jo bien estre.
- Si serés vos, par le main destre
Dont jo vos tieng! Ore en venés,
Mais a mon los vos maintenés
Si humlement devant sa face
Que male prison ne vos fache.
Ne por ço ne vos esmaiés:
Ne cuic mie que vos aiés
Prison qui trop vos soit grevaine. »
La damoisele issi l'enmaine;
Ensi l'esmaie, et asseüre,
Et parole par colverture,
Car sans prison n'est nus amis,
En la prison u il est mis;
Bien a droit ki prison le claime,
Car bien est en prison qui aime.

La damoisele par le main
Emaine monsignor Yain
La u il ert mout cier tenus;
Si crient il estre mal venus,

51c.1947

Et s'il se crient, n'est pas mervelle.
Dessor une quelte vermelle
Troverent la dame seant.
Grant paor, ce vos acreant,
Ot mesire Yvains a l'entree
De la dame k'il ont trovee;
La dame si ne lor dist mot,
Por ço que plus grant paor ot.
Si fu de paor esbahis,
Qu'il cuida bien estre traïs;
Si se tint loing. Cele i ala
Qui par son sens li amena,
Et dist: « .V.c. dehais ait s'ame
Ki maine en cambre a bele dame
Chevalier ki ne s'en aproce,
Et qui de langue et de bouche,
Ne s'en doie acointier, s'il sache!»
A cest mot pres de li le sache,
Si li dist: « En cha vos traiés,
Chevaliers, et paour n'aiés
De ma dame, qu'ele vos morde;
Se li querés pais et acorde,
Et jou prierai mout por vos
Que la mort Aclados le rous,
Qui fu ses sire, vos pardoinst. »
Mesire Yvains maintenant joinst
Ses mains, si s'est a jenols mis
Et dist, conme verais amis:
« Dame, voir, ja ne vos querrai
Merchi, ains vos merchierai
De quanques de moi volrés faire,
Que riens ne m'en porroit mesplaire.
- Non, sire? Et se jo vous occi?
- Dame, la vostre grant merchi,
Que ja ne m'en orrés dire el.
- Ainc mais, fait ele, n'oï tel,
Que si vos metés a devise
De tot en tot en ma franchise
Sans ce que jo ne vos esfors.
- Dame, nule force si fors
N'est conme cele, sans mentir,
Qui me conmande a consentir

51d.1989

Vostre voloir de tot en tot.
Rien nule a faire ne redolt
Qui vos pleüst a conmander,
Et, se jo pooie amender
La mort u jo n'ai rien forfait
Jo l'amenderoie sans plait.

- Conment, fait ele. Ore me dites,
Si soiés de l'amende quites,
Se vos nient me mesfesistes,
Quant vos mon signor occesistes.
- Dame, fait il, vostre merchi;
Quant vostre sires m'assalli,
Quel tort euc jo en moi desfendre?
Qui altrui velt occire et prendre,
Se cil l'ocist qui se desfent,
Dites moi se noient mesprent.
- Nenil, qui bien esgarde a droit;
Et, jo cuic, que rien ne valroit
Se jo fait occire l'avoie.
Mais mout volentiers saveroie
Dont cele force puet venir
Qui vos conmande a contenir
A mon voloir, sans contredit;
Trestot le mesfait vos en quit,
Mais seés vos, si me contés
Comment vos estes si dontés.

- Dame, fait il, li force vient
De mon cuer, qui a vos se tient;
En cest voloir m'a mes cuers mis.
- Et qui le cuer, mes dols amis?
- Dame, mi oel. - Et les oels, ki?
- Li grans biautés que en vos vi.
- Et li biautés k'i a forfait?
- Dame, tant que amer se fait.
- Amer? Et cui? - Vos, dame chiere.
- Moi? - Voire voir - En quel maniere?
- En tel que graindre estre ne puet;
En tel que de vos ne se muet
Mes cuers, c'adés en tel point truis;
Que de vos partir ne me puis;
Et si que tous a vos m'otroi;
Certes je vos aim plus que moi;

52a.2031

En tel, s'il vos plaist, ...* delivre,
Que por vos voel morir u vivre.
- Et oseriiés vos emprendre
Por moi ma fontaine a desfendre?
- O je, voir, dame, vers tos homes.
- Saciés dont, nos acorderomes. »

Ensi s'acorderent briement.
Et li dame ot son parlement
Tenu devant a ses barons
Et dist: « De ci nos en irons
En cele sale u ma gent sunt,
Qui loé et conseilliet m'ont.
Por le besogne que il voient,
De marier congiet m'otroient.
Et jo l'otroi por le besoing;
Ici meïsme a vos me doing,
C'a signor resfuser ne doi
Boin chevalier et fil de roi.

Ore a la damoisele fait
Quanqu'ele voloit entresait;
Et mesire Yvains est plus sire
C'on ne vos puist conter ne dire,
Car la damoisele l'enmaine
En la sale, ki estoit plaine
De chevaliers et d'autres gens;
Et mesire Yvains fu si gens
C'a mervelle l'esgardent tuit.
Encontre els se leverent tuit;
Tot les saluent et enclinent
Monsignor Yvain, et devinent:
«C'est cil qui ma dame prendra;
Dehait qui li desfendera,
Que mervelles sanlle prodonme.
Certes, l'empeerris de Rome
Seroit en lui bien mariee.
Car l'eüst il ja affiee
Et ele lui de nue main,
Si l'espousast hui u demain. »
Ensi parolent tot de rent*.
Al chief de la sale ot .i. banc
U la dame s'ala seoir,
Si que tot le porent veoir.

52b.2073

Et mesire .Y. samblant fist
Q'a ses piés seoir se volsist,
Mais ele le leva amont;
Et de la parole semont
Son senescal, que il le die,
Si que bien soit de tos oïe.

Oiiés ke dist li senescaus,
Ki n'estoit arestius ne baus:
« Signor, fait il, guerre nos sort:
N'est jors que li rois ne s'atourt
Por venir no tere gaster,
Et mout se paine de haster.
Ainsçois que li quinsaine past,
Sera trestot torné a gast,
Se boin mainteneor n'i a.
Quant ma dame se maria,
N'a mie encor .vi. ans parclos,

52c.2090

Si le fist ele par mon los.
N'a or de tiere c'une toise
Cil ki tot cest païs avoit
Et qui mout bien i avenoit:
C'est grans dels que poi a vescu.
Fenme ne doit porter escu
Si ne set de lance ferir;
Mout amender, et mout cierir,
Se puet de prendre .i. boin segnor.
Ainc mais n'en ot mestier grignor;
Loés li tost que signor pragne,
Ains que la costume remagne
Qui en cest castel a esté
Bien a .xxxi. an passé. »
A cest mot dïent tot ensamble,
Que biens a faire lor en samble,
Et trestot desc'al pié li vienent.
De son voloir en grant le tienent;
Si se fait proier de son bien,
Tant que trestot maloit gré sien
Otroie ce qu'ele fesist,
Se cascuns li contredesist,
Et dist: «Signor, puis k'il vos siet,
Cis chevaliers, ki les moi siet,
M'a mout proïe et mout requise.
En m'onor et en mon servise
Se velt metre, et jo l'en merchi,
Et vos l'en merchiés aussi.
Ne onques mais ne le conui,
S'ai mout oï parler de lui.
Si haus hom est, ce saciés bien,
Com li fiex le roi Urien.
Sans ço qu'il est de halt parage,
S'est il de si grant vasselage
Et tant a cortoisie et sens,
Que delloer nel me doit l'en.
De monsignor Yvain, je cuit,
Avés bien oï parler tuit,
Et ce est il qui me requiert.
Plus est haus hon c'a moi n'affiert,
Volentiers, ce dist, me prendra. »
Il dïent: « Ja ne passera

52d.2133

Li jors, se vos faites que sage,
Ains c'aiés fait le mariage,
Que mout est fols cil qui demeure
De son preu faire .i. sole eure. »
Tant li prïent que ele otroie
Ço qu'ele fesist totevoie,
C'Amors a faire li conmande
Ce dont los et consel demande;
Mais a plus grant honor le prent
Quant ele a le los de sa gent;
Et les proieres rien n'i grievent,
Ains li esmuevent et sollievent
Le cuer a faire son talent.
Li chevax qui pas ne va lent
S'esforce quant on l'esperone;
Voiant tos ses barons se done
Li dame a monsegnor Yain.
Par le main de son capelain
Prise a Laudine de Landuc,
La dame, qui fu fille al duc
Laudunet, dont on note .i. lai.
Le jor meïsme, sans delai,
L'esposa et fisent les noces.
Assés i ot mitres et croces,
Que la dame i avoit mandés
Ses evesques et ses abés.
Mout i ot gent et mout leeche,
Et mout i ot de grant riqueche,
Plus que conter ne vos saroie
Quant lonc tans pensé i aroie;
Miex me vient taire que pau dire.
Mais ore est messire Yvains sire
Et li mors est tost oubliés;
Cil qui l'a mort s'est mariés
A sa fenme, et ensamble gisent;
Et la gent aiment plus et prisent
Le vif c'onques le mort ne firent.
A ses noces mout le servirent,
Qui durerent dusc'a la velle
Que li rois vint a la mervelle
De la fontaine et del perron,
Et avec lui tot si baron;

53a.2175

Et trestot cil de sa maisnie
Furent en la chevalerie,
C'uns trestos seus n'i fu remés.
Et si disoit mesire Kex:
« Ahi! qu'est ore devenus
Yvains, quant il n'est cha venus,
Ki se vanta aprés mangier
Qu'il iroit son cosin vengier?
Bien pert que ce fu aprés vin!
Fuis s'en est, jo le devin,
Qu'il n'i osast venir por l'uel.
Mout se vanta de grant orguel.
Mout est hardis qui vanter s'ose
De ço dont autres ne l'alose,
Ne n'a tesmoig de sa loenge
Se ço n'est par false losenge.
Mout a entre malvais et preu,
Car li malvais entor le feu
Dist de lui unes grans paroles,
Et tient totes les gens a foles
Et cuide c'on ne le conoisce.
Et li preus aroit grant angoisce
S'il ooit dire nis de lui
Les proeces qui sont en lui.
Neporquant, certes, bien m'acort
A ço que il n'a mie tort
Se il se prise et il se vante,
Qu'il ne troeve qui por lui mente;
Se il nel dist, qui le dira?
Tot se taisent nis li hira,
Qui des vallans crie le ban
Et les malvais jete a .i. van. »

Ensi mesire Kex parloit,
Et mesire Gavains disoit:
« Mesire Ké, por Dieu, merchi!
Se mesireYvains n'est or ci,
Ne savés quel essoine il a.
Onques tant voir ne s'avilla
Qu'il desist de vos vilonie,
Tant con il a fait cortoisie.
- Sire, dist Kex, et jo m'en tais,
Ne m'en orrés parler jamais,

53b.2217

Puis que je voi qu'il vos anuie. »
Et li rois por veïr le pluie
Versa de l'aigue plain bachin
Sor le perron, dessos le pin;
Et plut tantost mout fondanment.
Lors ne tarda mie gramment
Que mesire Yvains sans arrest
Entra armés en la forest
Et venoit plus que les galos
Sor .i. cheval et grant et gros,
Fort et hardi et tost alant.
Et mesire Kex ot talant
Il demanderoit le batalle.
Quele qu'en fust la deffinalle,
Il voloit conmenchier tosjors
Les mellees et les estors
U il en eüst grant courous.
Le roi en prie devant tous,
Que ceste batalle li laist.
«Ké, fait li rois, puis qu'il vos plaist,
Devant tos le m'avés rovee,
Ne vos doit mie estre veee. »
Kex l'en merchie, puis si monte.
S'or li puet faire .i. poi de honte
Mesire Yvains, liés en sera
Et mout volentiers li fera,
Car bien le reconoist as armes.
L'escu a pris par les enarmes
Et Kex le sien, si s'entrelaiscent,
Chevax alerÝ et lances baiscent
Que il tenoient empuignies;
.I. petit les ont alongies
Tant que par les debous les tinrent,
Et a ce que il s'entrevinrent,
De tex cols ferir s'angoiscierent
Que lor lances ans.ii. froiscierent
Et vont dessi es puins froiiant.
Mesire Yvains colp si pesant
Li dona que dessos la sele
A fait Kex le torneboiele
Et li elmes en tere fiert.
Plus d'anui faire ne li quiert

53c.2259

Mesire Yvains, ainsçois dessent
A la tiere et le cheval prent.
Si fu mout bel a tex i ot,
Et fu mout bien qui dire sot:
« Ahi! ahi! com or gisiés,
Vos ki les autres despisiés!
Et neporquant s'est il bien drois
C'on le vos pardoist* cesti fois,
Que onques mais ne vos avint. »
A itant, devant le roi vint
Mesire Yvains, et par le frain
Maine le cheval en sa main,
Por ço que il le voloit rendre,
Et li dist: « Sire, or faites prendre
Cest cheval, car jo mesferoie
Se rien del vostre retenoie.
- Et ki estes vos? dist li rois,
Ne vos conistroie des mois
Se desarmé ne vos veoie
U se nomer ne vos ooie. »
Lors s'est mesire Yvains nonmés;
S'en fu Kex de duel assonmés
Et mas et mus et desconfis,
Ki dist k'il s'en estoit fuis.
Et li autre mout lié en sunt,
Qui de sa dolor joie font.
Nis li rois grant joie mena;
Mais mesire Gauvains en a
.C. tans plus grant joie que nus,
Car sa compagnie amoit plus
Que chevalier ke il seüst
Ne que onques veü eüst.
Et li rois li requiert et prie,
Se il li plaist, que il li die
Comment il avoit esploitié,
Car mout avoit grant colvoitié
De tote savoir l'aventure;
De voir dire mout le conjure.
Et cil li a trestot conté
Le grant service et le bonté
Que la damoisele li fist;
Onques de mot n'i entreprist,

53d.2301

Ne rien nule n'i oblia.
Et aprés çou le roi proia
Que il et tot si chevalier
Venissent o lui herbegier;
Honor et joie li feroient,
Quant o lui herbegiet seroient.
Et li rois dist que volentiers
Li feroit, .viii. jors tos entiers,
Honor et joie et conpagnie.
Et mesire Yvains l'en merchie,
Ne de demore plus n'i font,
Maintenant montent, si s'en vont
Vers le castel le droite voie.
Et mesire Yvains en envoie
Devant la route .i. escuier,
Qui portoit .i. faucon gruier,
Por ço que il ne sospresiscent
La dame et que sa gent fesiscent
Contre le roi les maisons beles.
Quant la dame oï les noveles
Del roi ki vient, mout a grant joie.
N'i a nul ki la novele oie,
Qui n'en soit liés et ki ne mont.
Et li dame tos les semont
Et prie k'encontre lui voisent;
Et il ne tencent ne ne noisent,
Car de faire sa volenté
Furent trestot entalenté.

Encontre le roi de Bretagne
Vont tot sor grans chevax d'Espagne,
Si saluent mout haltement
Le roi Artu premierement
Et puis sa compagnie tote:
« Bien viegne, fait il, ceste route
Ki de si preudomes est plaine.
Beneois soit ki les amaine
Et ki si buens ostes nos done. »
Contre le roi li castiax tone
De la joie que on i fait.
Li drap de soie sont fors trait
Et estendu a parement,
Et des tapis font parement,

54a.2343

Que par les rues estendent
Contre le roi que il atendent;
Et si font .i. autre apareil,
Que por le calor du soleill
Cuevrent les rues de cortines.
Li saint, li cor et les buisines
Font le castel mout ressoner,
Que on n'i oïst pas toner.
D'une part, dansent les puceles,
Sonent taburent et freteles,
Timbre, tabletes et tabour;
D'autre part, refont lor labour
Li legier saleor ki saillent;
Trestot de joie se travallent,
Et a ceste joie reçoivent
Le roi, si conme faire doivent.
Et li dame en est fors issue,
D'un drap emperial vestue,
Robe d'ermine tote fresche,
Sor son chief une garlandesce
Trestote de rubins cargie;
Ne n'ot mie chiere marie,
Ains l'ot si gaie et si riant
Qu'ele estoit, al mien essiant,
Plus bele que une dieuesse.
Entor li fu la presse espesse,
Qui disoient trestot a tire:
« Bien viegne li rois et li sire
Des rois et des signors del monde! »
Ne puet estre c'a tous responde
Li rois, que vers lui voit venir
Li dame a son estrier tenir.
S'en va, mais il nel volt atendre,
Ains se hasta mout de descendre;
Si dessendi lués qu'il le vit;
Li dame le salue et dist:
« Bien viegne, par .c. mile fois,
Li rois mes sire; beneois
Fait* mesire Gauvains, ses niés.
- Soit* vostre cors et vostre chiés,
Fait li rois, bele creature,
Ait joie et grant boine aventure! »

54b.2385

Puis l'embracha parmi les flans
Li rois, conme gentiex et frans,
Et ele lui tot a plains bras.
Des autres ne paroil je pas
Comment ele les conjoï,
Mais onques nus parler n'oï
De nule gent tant conjoïe,
Tant honoree et tant servie.

De la joie assés vos contasse
Se ma parole ne gastasse.
Mais sol d'icele contenance
Vos voel faire une ramenbranche
Ki fu faite a privé conseill
Entre la lune et le soleill.
Savés de cui jo vos voel dire?
Cil ki fu des chevaliers sire
Et qui sor tos est honerés
Doit bien estre sires clamés.
Por monsignor Gauvain le di,
Car de lui est tot altressi
Chevalerie enluminee
Com li solaus, la matinee,
Oevre ses rais et clarté rent
Par tos les liex u il resplent.
Et de celi refait la lune
Dont il ne puet estre que une,
De grant foi et de grant aïe.
Et neporquant jo nel di mie
Seulement por cest boin renon,
Mais por ço que Lunete a non.

Li damoisele ot non Lunete
Et fu une avenans brunete,
Tres sage et viseuse et cointe.
A monsignor Gauvain s'acointe,
Ki durement le prise et aime,
Et pour ço s'amie le claime
Que ele avoit de mort gari
Son conpagnon et son ami;
Se li offre mout son service.
Et ele li conte et devise
A com grant paine ele conquist
Sa dame, tant qu'ele le prist,

54c.2427

Mon signor Yvain, a mari,
Et comment ele le gari
Des mains a cels qui le queroient:
O els estoit, si nel veoient!
Mesire Gauvains mout se rist
De çou qu'ele li conte et dist:
« Ma damoisele, je vos doing
Et a mestier et al besoing
.I. tel chevalier com jo sui;
Ne me cangiés ja por altrui,
Se amender ne vos cuidiés;
Jo sui vostres, et vos soiés
D'ore en avant ma damoisele.
- Vostre merci, sire », fait ele.

Ensi cil doi s'entracointoient,
Et li autre altres dons donoient,
Que d'altretex i ot nonante,
Dont cascune fu preus et gente,
Noble, cointe, cortoise, saje,
Damoisele de halt parage;
Si se porent mout solagier
Et d'acoler et de baisier
Et de parler et de veoir
Et de dalés eles seoir,
Itant en orent il au mains.
Ore a feste mesire Yains
Del roi, qui avec els demore;
Et la dame tant les honore,
Cascun par soi et tos ensamble,
Que tex fols i a cui il samble
Que d'amors viegnent li atrait
Et li samblant qu'ele lor fait.
Et cels puet on nices clamer
Qui cuident c'on les voelle amer
Quant une dame est si cortoise
C'a .i. maleüreus adoise,
Si li fait joie et si l'acole;
Flos* est liés de bele parole,
Si l'a on mout tost amusé.
A grant ...* ont lor tans usé
Trestote le quinsaine entiere:
Deduit de bos et de riviere

54d.2469

I ot mout qui le volt avoir;
Et ki volt la tiere savoir
Que mesire Yvains ot conquise
Et la dame qu'il avoit prise,
Si se repuet aler esbatre
Dessi a .v. liues ou .iiii.,
Par les castiax d'illuec entor.
Quant li rois ot fait son sejor
Tant qu'il n'i volt plus demorer,
Si refist son oirre aprester.
Mais il avoient la semaine
Trestot proié et mis en paine,
Al plus qu'il s'en porent pener,
Que il en peüssent mener
Monsignor Yvain avec eus.
« Comment! Serés vos or de cels,
Çou disoit mesire Gavains,
Qui por lor femes valent mains?
Amender doit de bele dame
Qui l'a a amie u a fame;
N'est pas drois por que el ...* aint
Que ses los et ses pris remaint.
Certes, vos en serés iriés
De s'amor se vos empiriés;
Que fenme a tost s'amor reprise,
Si n'a pas tost*, s'ele desprise
Celui qui de noient empire
Quant il est d'un roiame sire.
Or primes doit vostre pris croistre.
Rompés le fraim et le cavoistre,
S'irons tornoier moi et vous,
Que on ne vos apiaut jalous.
Or ne devés vos pas songier,
Mais les tornois reconmenchier
Et emprendre a mout fort joster,
Que que il vos doie couster.
Assés songe qui ne se muet!
Certes, venir vos i estuet,
Et jo serai a vostre ensagne;
Gardés que par vos ne remagne,
Biax conpaig, nostre compagnie,
K'en moi ne falra ele mie.

55a.2513

Mervelle est conment on a cure
De l'aise qui tot adiés dure.
Biens adolcist par delaier,
Et plus est buens a assaier
.I. petis biens, quant on delaie,
Que uns grans c'on tostans assaie.
Joie d'amors qui vient a tart
Samble le vert buisse qui art,
Ki dedens rent plus grant calor
Et plus se tient en sa valor,
Com plus se tient a alumer.
On puet tel cose acostumer
Qui mout est malvaise a retraire;
Quant on le velt, nel puet on faire.
Et por ço ne le di jo mie,
Se j'avoie si bele amie
Com vos avés, sire conpains!
Foi que jo doi Dieu et ses sains,
Mout a envis le laisseroie.
Mien essient, fols en seroie.
Mais tex conselle bien autrui,
Qui ne saroit consellier lui,
Alsi com li preecheour
Sunt delloial et lecheor,
S'ensagnent et dïent le bien
Dont il ne velent faire rien! »

Mesire Gauvains tant li dist,
Ceste cose tant li requist
Qu'il li creanta qu'il iroit,
Mais a sa dame le diroit,
S'il en poroit congiet avoir;
U fache folie u savoir,
Ne laira que congiet no pragne
De retorner en la Bretagne.
Le dame en a a conseill traite,
Qui del congié pas ne se gaite,
Si li dist: « Ma tres dolce dame,
Vos qui estes mes cuers et m'ame,
Mes biens, ma joie, ma santés,
Une cose me creantés,
Por vostre honor et por la moie. »
Li dame tantost li otroie,

55b.2555

Qui ne set k'il velt demander.
« Sire, dist ele, conmander
Me poés quanques buen vos ert. »
Tot maintenant congiet requiert
Mesire Yvains, de convoier
Le roi et d'aler tornoier,
Que on ne l'apiaut recreant.
Et ele dist: « Je vos creant
Le congié jusqu'a .i. termine.
Mais l'amours devenra haïne,
Que j'ai a vos, cers en soiés,
Certes, se vos le trespassiés,
Le terme que je vos dirai;
Sachiés que ja n'en mentirai.
Se vos mentés, jo dirai voir.
Se vos volés m'amor avoir
Et de rien nule m'avés chiere,
Pensés de revenir arriere,
A tot le mains jusqu'a .i. an,
.VIII. jors aprés le Saint Jehan;
Hui en cest jor sont les octaves.
De m'amor serés mas et aves,
Se vos nen estes a cel jor
Avec moi, çaiens, a sejour. »

Mesire Yvains plore et sospire
Si fort c'a paines li pot dire:
« Dame, cis termes est trop lons.
Se jo pooie estre colons
Totes les fois que jo volroie,
Mout sovent avec vos serroie.
Et jo pri Dieu que, se lui plaist,
Ja tant demorer ne m'i laist.
Mais tex cuide mout tost venir
Qui ne set k'il est a venir.
Et jo ne sai k'il avenra,
Se essoines me detenra
De malage ne de prison;
S'avés de tant fait mesprison
Que vos n'en avés mise fors
Seviaus l'essoine de mon cors.
- Sire, fait ele, jo l'i mech;
Et neporquant bien vos promech

55c.2597

Que, se Diex de mort vos desfent,
Nus essoines ne vos atent
Tant k'il vos sovenra de moi.
Mais or metés en vostre doi
Cest mien anel, que je vos prest;
Et de la piere quels ele est
Vos dirai jo tot en apert:
Prisons nel tient ne sanc ne pert
Nus amans verais et loiax,
Ne avenir ne li puet max,
Mais k'i le port et chier le tiegne
Et de s'amie li soviegne;
Ainsçois devient plus durs que fers.
Il vos ert escus et haubers
Et voir ainc mais a chevalier
Ne le voil prester ne baillier,
Mais vos par chierté le doing jé. »
Mesire ...* a pris congié,
S'ot mout ploré al congiet prendre.
Et li rois ne volt plus atendre
Por rien c'on dire li seüst,
Ains lor huche c'on lor eüst
Tost lor palefrois amenés,
Aparelliés et enfrenés.
Puis qu'il li plot, mout tost fu fait;
Li palefroi lor sunt hors trait,
Se n'i a fors que del monter.
Ne sai que vos doie conter,
Conment mesire Yvains depart,
Et ses baisiers c'om i depart,
Com furent de larmes semé
Et de sospirs enbalsemé.
Et del roi, que vos conteroie,
Conment li dame le convoie
Et ses senescaus avec li
Et ses puceles altressi?
Trop i feroie lonc demore.
La dame, por ço qu'ele plore,
Prie li rois de remanoir
Et de raler a son manoir;
Tant li prie c'a mout grant paine
S'en retorne, et sa gent en maine.

55d.2639

Mesire Yvains, mout a envis,
S'est de s'amie departis,
Ne mais li cuers ne se remuet.
Li rois le cors mener en puet,
Mais del cuer n'en menra il point,
Qui si se tient et si se joint
Al cuer sa dame; si remaint
Qu'il n'a pooir que il l'en maint;
Puis que li cors est sans le cuer,
Dont n'a il pooir en nul fuer;
Et se li cors sans le cuer vit,
Tel mervelle nus hon ne vit.
Ceste mervelle est avenue
Qu'il a la vie retenue
Sans le cuer, qui estre i soloit,
Que siure plus ne le voloit.
Li cuers a boine remanance
Et li cors est en esperanche
De retorner al cuer arriere;
Si fait cuer d'estrange maniere
D'esperance, qui mout sovent
Se muet et fausse de covent.
Ja, jo cuit, l'ore ne savra
Qu'esperanche traï l'avra;
Car se il .i. sol jor trespasse
Del terme qu'il a pris a masse,
Mout a envis trovera mais
A sa dame trive ne pais.
Et jo cuit qu'il le passera,
Car departir nel laissera
Mesire Gauvains d'avec lui.
Car as tornois vont anbedui
Par tos les liex u on tornoie.
Et li ans passe totevoie,
Sel fist si bien mesire Yvains
Tot l'an que mesire Gauvains
Se penoit de lui honerer.
Et si le fist tant demorer
Que trestos li ans fu passés
Et de l'autre an aprés assés,
Tant que emmi aost vint,
Que li rois cort a Cestre tint.
29a.(2847)

D'orge prestri atot le palle;
Atot çou estoit il, sans falle,
Muisis et ses com une escorce.
Mais li fains l'angoisse et esforce
Tant que le peu li seut li pains;
C'a tos mengiers est sausse fains,
Bien destempree et bien confite.
Tot menja le pain a l'ermite
Mesire Yvains, fist bien le sot,
Et but de l'aigue froide al pot.
Quant mengié ot, si se refiert
El bos, et cers et bisces quiert;
Et li boins hom desos son toit
Prie Dieu, quant aler l'en voit,
Qu'il l'en desfende et qu'il l'en gart,
Qu'il ne reviegne cele part.
Mais n'est riens, tant poi de sens ait,
Qui el lieu u on bien li fait
Ne reviegne mout volentiers.
Puis ne passa .i. jors entiers,
Tant com il fu en cele rage,
Que alcune beste salvage
Ne li aportast a son huis.
Icele vie mena puis,
Et li boins hom s'entremetoit
De l'escorchier, et si metoit
Assés de la venison cuire;
Et li pains et l'aigue en la buire
Estoit adiés en la fenestre
A l'ome forsené repestre;
S'avoit a mangier et a boivre
Venison sans sel et sans poivre
Et aigue frode* de fontaine.
Et li boins hom estoit en paine
Des cuirs vendre et d'acater pain
D'orge u d'espiautre u de grain.
S'ot puis tote sa livrison,
Pain a plenté et venison
Qui li dura tant longement
C'un jor le troverent dormant
En la forest .ii. damoiseles
Et une lor dame avec eles

29b.2885

De cui maisnie eles estoient.
Vers l'ome nu que eles voient
Cort et dessent l'une des .iii.;
Mais mout le resgarda ainsçois
Que rien nule sor lui veïst
Qui reconoistre li feïst;
Si l'avoit ele tant veü
Que tost l'eüst reconeü
Se il fust de si riche ator
Com il avoit esté maint jor.

Al reconoistre mout tarda
Et totesvoies l'esgarda
Tant qu'en la fin li fu avis
D'une plaie qu'il ot el vis;
C'une tel plaie el vis avoit
Mesire Yvains, bien le savoit,
K'ele l'avoit sovent veüe.
Par la plaie s'est percheüe
Que ço est il, et rien nel dolte;
Mais de ço s'esmervelle tote
Comment ço li est avenu
Que si l'a trové povre et nu.
Mout se sagne, mout s'esmervelle;
Ne le boute pas ne esvelle,
Ains vient al cheval, si remonte
Et vient as autres, si lor conte
S'aventure tot en plorant.
Ne sai que voise demorant
A conter le duel qu'ele fist;
Mais plorant a se dame dist:
« Dame, je ay Yvain trové,
Le chevalier miex esprové
Del monde et le miex entechié;
Mais jo ne sai par quel pechié
Est al franc home meskaü;
Espoir, aucun duel a eü
Qui le fait issi forsener;
C'on puet bien par duel mal errer,
Et savoir et veïr puet l'en
Qu'il n'est mie bien en son sens,
Que ja voir ne li avenist
Que si vilment se contenist

29c.2927

Se il n'eüst le sens perdu.
Cor li eüst or Diex rendu
Le sens alsi bien qu'il l'ot onques
Et puis se li pleüst adonques
K'il remansist en vostre aïe!
Car trop vos a mal envaïe
Li quens Ailiiers, qui vos guerroie.
La guerre de vos .ii. verroie
A vostre grant honor finee
Se Diex si boine destinee
Vos donast qu'il le remesist
En son sens et puis remansist
En vostre aïe a cest besoing. »
La dame dist: « Or n'aiés soing,
Car certes, se il ne s'en fuit,
A l'aïe de Dieu, jo cuit,
Li osterons nos de la teste
Toute la rage et la tenpeste.
Mais tost aler vos en covient,
Car d'un onguement me sovient
Que me dona Morghe li saje;
Et si me dist que nule rage
N'est en teste, k'il ne l'en ost. »
Vers le castel s'en vont mout tost,
Que pres ert et n'i avoit pas
Plus de demie liue .i. pas,
As liues ki el païs sont;
A le mesure des nos font
Les .ii. une et les .iiii. deus.
Et cil remest dormant tos seus,
Et cele va l'ongement querre.
.I. sien escring mout tost desserre,
S'en traist le boiste et si le carge
A sa damoisele, trop large
Et* li prie qu'ele n'en soit,
Le front et les tenples l'en froit,
C'allors metre n'en a besogne.
Le front et les tenples l'en oigne,
Et le remanant bien li gart,
Qu'il n'a point de mal autre part
Fors tant solement el cervel.
Robe vaire, cote et mantel

29d.2969

Li fait porter, de soie en graine.
Tot ço li porte et si li maine
En destre .i. palefroi mout buen,
Et avec ço i met del suen:
Chemise et braies delies,
Et cauces noires bien taillies.
Atot iço, mout tost s'en va;
Encor celui dormant trova
La u ele l'avoit laissié.
Ses chevax mist en .i. plaissié,
Ses atache et loie mout fort,
Et vient a celui qui se dort,
Atot le boiste et l'onguement;
Si fait mout tres grant hardement
Quant de forsené tant s'aproce
Qu'ele le manie et atolche;
Et prent l'ongement, si l'en oint
Tant com en le boiste en ot point,
Car sa garison tant colvoite
Que de l'oindre partot s'esploite;
Si le met trestot en despense,
Qu'il ne li calt de la desfense
Sa dame, k'il ne l'en sovient.
Plus en i met k'il ne covient;
Mais bien, ce li est vis, l'emploie:
Les temples et le vis l'en froie,
Et tot le cors jusc'a l'orteill.
Tant le froia au caut soleil
Les temples et trestot le cors
Que del cervel li jeta fors
Le rage et la melancolie.
Mais del cors oindre fist folie,
Que il ne li estoit mestiers.
S'il en i eüst .c. sestiers,
S'eüst ele autel fait, jo cuit.
La boiste enporte, si s'en fuit,
Et s'est vers ses chevax reposte;
Mais la robe mie n'en oste
Por ço que, se Diex le ravoie,
Velt c'aparellie le voie
Et qu'il le prenge, si s'en veste.
Derriere .i. grant caisne s'arreste

5a.3011

Tant que cil ot dormi assés,
Qui fu garis et respassés,
S'ot tot son sens et son memoire.
Mais nu se voit com .i. yvoire,
S'a grant honte, et grignor eüst
Se il s'aventure seüst,
Mais n'en set plus que nu se troeve.
Devant lui voit la robe nueve,
Si s'esmervelle a desmesure
Comment et par quele aventure
Cele robe estoit la venue;
Mais de sa car que il voit nue
Est trespensés et esbahis,
Et dist que mors est et traïs
Se tot ensi l'a trové nu
Riens nule ki l'ait coneü.
Et totesvoies si se vest
Et regarde par la forest
S'il verroit nul home venir.
Lever se cuide et retenir
Sor ses piés tant c'aler s'en puisse.
Mestiers li est c'aiue trusse*
Ki li aiut et ki l'emmaint,
Car si l'a li grans mals ataint
C'a paines puet sor piés ester.
Or mais n'i volt plus arrester
Li damoisele, ains est montee;
Dejoste lui est trespassee,
Alsi com el ne l'i seüst.
Et cil qui grant mestier eüst
D'aiue, ne li quesist el,
Que le menast a son ostel
Tant que il refust en sa force,
De li rapeler molt s'esforche.

La damoisele tout aussi
Va regardant tot entor li
Com ele ne sace qu'il a.
Chevalchant vait et cha et la,
Que droit vers lui ne velt aler.
Et cil commence a rapeler:
« Damoisele, de cha, de cha! »
Et la damoisele adrecha

5b.3053

Vers lui son palefroi amblant.
Cuidier li fist par tel samblant
Qu'ele de lui rien ne savoit
Et c'onques veü ne l'avoit;
Et sens et cortoisie fist.
Quant devant lui fu, si li dist:
« Sire chevaliers, que volés,
Ki a tel besoig m'apelés?
- Ha, fait il, damoisele saje,
Trovés me sui en cest boscage,
Jo ne sai par quele aventure.
Por Dieu, ma bele creature,
Vos pri que en tous guerredons
Me prestés u donés en dons
Cel palefroi que vos tenés.
- Volentiers, sire, mais venés
Avec moi la u jo m'en vois.
- Quel part, fait il, fors de cest bois,
Dusc'a .i. castel ci selonc.
- Damoisele, or me dites donc
Se vos avés mestier de moi.
- Oïl, dist ele, mais jo croi
Que vos n'estes mie tous sains;
Dusc'a .i. mois, a tot le mains,
Vos colvenroit a sejor estre;
Cest cheval que jo main en destre
Prendés, s'irons jusc'a l'ostel. »
Et cil, qui ne demandoit el,
Le prent, et montent, si s'en vont
Tant que il vienent a .i. pont
Dont l'aigue fu rade et bruians.
Et li damoisele rue ens
La boiste qu'ele portoit vuide;
Ensi a sa dame s'acuite
De son onguement escuser,
Qu'ele dira que al passer
Del pont ensi li meschaï
Que li boiste en l'aigue chaï:
Por ço que dessos li fleca
Ses palefrois, li escapa
Del puing li boiste et a bien pres
K'ele ne caï jus aprés,

5c.3095

Mais adont fust li perte graindre.
Ceste mençogne volra faindre
Quant devant sa dame ert venue.
Ensamble out lor voie tenue
Tant que al castel sunt venu;
Si a la dame retenu
Monsignor Yvain liement;
Et sa boiste et son onguement
Sa manda a sa damoisele,
Mais ce fu seul a seul; et cele
Li a la mençogne retraite,
Si grant con ele l'avoit faite,
Car le voir ne li osa dire.
S'en ot la dame mout grant ire
Et dist: « Ci a mout male perte,
Car ço est cose tote certe
Qu'ele n'ert jamais recolvré*.
Et puis que li cose est alee,
Se n'i a que del consierrer.
Tele ore cuide on desirer
Son bien c'on desire son mal;
Si com jo cuit, de cest vassal
Cuidoie joie et bien avoir,
Si ai perdu mon boin avoir
Tot le millor et le plus chier.
Nequedent mout vos voel proier
De lui servir sor tote rien.
- Par foi, dame, vos dites bien,
Car ce seroit mout malvais giex
Qui d'un damagne* feroit .ii. »

Atant de la boiste se taisent;
Et monsignor Yvain aaisent
De quanqu'eles püent et sevent;
Sel baignent et son chief li levent,
Et si le font bien reognier,
Car on le peüst apoignier
Le barbe dusques sor la fache.
Ne velt cose c'on ne li face:
S'il velt armes, on li atorne;
S'il velt cheval, on li sejorne,
Tant fort, tant bel et tant hardi.
Tant sejorna c'a .i. mardi

5d.3137

Vint al castel li quens Ailiers
A serjans et a chevaliers,
Et misent fus et prendent proies.
Et cil del castel totesvoies
Montent et d'armes se garnissent;
Armé et desarmé s'en issent
Tant que les coreors atagnent,
Qui por els fuir ne se dagnent,
Ains les atendent bien el pas.
Et mesire Yvains fiert el tas,
Qui tant ot esté sejornés
K'en sa force ot esté* retornés;
Si feri de si grant vertu
.I. chevalier parmi l'escu
Qu'il mist en .i. mont, ce me sanlle,
Cheval et chevalier ensanlle,
Que onques puis ne releva,
K'el ventre li cuers li creva
Et fu parmi l'escu navrés,
Si que li bras et li costés
S'en senti dolerosement,
Car navrés fu mout durement.
A els mesire Yvains recuevre;
Trestos de son escu se cuevre
Et point por le pas encombrer.
Si tost com on peüst numbrer
Et un et .ii. et .iii. et .iiii.,
Si tost les veïst on abatre,
Et assés plus legierement,
Quatre chevaliers erramment.
Et cil qui avoec lui estoient
Por lui grant hardement avoient;
Que tex a povre cuer et laque,
Quant voit preudome ki entaske
Devant lui tote une besogne,
Maintenant honte et vergogne
Li cort sus et si jete fors
Le povre cuer qu'il a el cors,
Si li done soldainement,
Cuer de preudonme et hardement.

Ensi sunt cil devenu preu,
Si tint mout bien cascuns son lieu

36a.3177

En le meslee et en l'estour.
Et la dame fu en la tour
De son castel montee en halt,
Si vit la mellee et l'assaut
Al pas derraisnier et aquerre;
S'en vit assés jesir a tierre
Des affolés et des occis,
Des siens et de ses anemis,
Et plus des autres que des soins.
Car li cortois, li preus, li boins,
Mesire Yvains trestot aussi
Les faisoit venir a merchi
Com font li faucon les cercelles.
Et disoient et cil et celes
Ki el chastel monté estoient
Et le batalle regardoient:
« Ahi! Com vallant soldoier!
Com fait ses anemis ploier!
Confaitement il les requiert!
Tot ensement entr'els se fiert
Com li lions entre les dains
Quant l'angoisse et cace li fains.
Et tot nostre autre chevalier
En sunt plus hardi et plus fier,
Que ja, se par lui seul ne fust,
Lanche brisie n'i eüst
N'espee traite por ferir.
Bien doit on amer et cierir
.I. preudonme quant on le troeve.
Veés or conment il se proeve,
Ves com il va de renc en renc;
Ves conment il a taint de sanc
Sa lance et s'espee nuee*,
Veés comment il se remue,
Veés conment il les entasse,
Com il lor vient, con il les passe,
Com il guencist, con il trestorne!
Et al guencir petit sejorne
Et mout poi demore en son tor;
Veés con il vient en l'estor,
Com il a poi son escu chier,
Com il le laisse detrenchier;

36b.3219

N'en a pitié ne tant ne quant,
Mais il se remet mout en grant
Des cols vengier que on li done.
Qui de trestot le bos d'Argone
Li aroit fait lances, je cuit,
N'en aroit nule anquenuit;
On ne l'en puet tant metre en faltre
Comme il peçoie et demande autre.
Et veés conment il le fait
De l'espee quant il le trait!
Onques ne fist si grant essart
Rollans li quens de Durendart,
En Rainschevax ne en Espagne.
Se il eüst en sa compagne
Auques de si fais conpagnons,
Li fel de cui nos nos plagnons
S'en alast ancui desconfis
U il remansist tos honis. »
Et dïent que buer seroit nee
Cui il aroit s'amor donee,
Qui si est as armes poisçans
Et dessor tos reconissans,
Si com cierges entre candoiles
Et li lune entre les estoiles
Et li solax dessor la lune;
Et de cascun et de cascune
A si les cuers que il valroient,
Por le proeche k'en lui voient,
Que il eüst la dame prise,
Si fust la tiere en sa devise.

Ensi tot et totes prisoient
Celui dont verité disoient
Que cels de la a si atains
Que il s'en fuient qui ains ains;
Mais il les en cache si pres
Que* tot si compagnon aprés,
Qui de lui sont aussi seür
Com s'il fussent enclos de mur
Haut et espés de piere dure.
Li cache si longement dure
Que trestot cil de la estanchent
Et cil ki cacent les detrenchent

36c.3261

Et lor chevax lor esboielent.
Li vif dessor les mors roielent,
Si s'entraffolent et occïent,
Laidement s'entrecontralïent.
Et li quens tot adiés s'en fuit
Et mesire Yvains l'en conduist,
Qui de lui sivir ne se faint;
Sa lance sor le dos li fraint
Al pié d'une roste montee,
Et ço fu mout pres de l'entree
D'un fort recet qui estoit suens.
Illuec fu retenus li quens,
C'onques riens ne l'en pot aidier;
Et sans trop longement plaidier
Le prist tantost mesire Yvains;
Et puis que il le tint as mains
Et il furent tot per a per,
N'i ot nient del escaper,
Ne del guencir, ne del desfendre,
Ains li plevi k'il s'iroit rendre
A la dame de Noiroison,
Si se metroit en sa prison
Et feroit pais a sa devise.
Et quant il en ot la foi prise,
Si li fist son cors desarmer
Et l'escu de son col oster,
Et s'espee li rendi nue.
Ceste honors li est avenue
K'il en maine le conte pris
Et sel rent a ses anemis,
Qui n'en font pas joie petite.
Mais ains fu li novele dite
A la dame, k'il i venissent;
Encontre els tot et tote issent,
Mais li dame tot devant vint.
Mesire Yvains par le main tint
Le prisonier, si li presante.
Sa volenté et sa creance
Fist li quens lués oltreement,
Et par foi et par sairement
Et par pleges le fist seüre;
Pleges li done et si li jure

36d.3303

Que tosjors mais pais li tenra
Et ses pertes li rendera,
Quanquele moverra par proeves,
Et ses maisons refera nueves
Que il a jus par tere mises.
Quant ces coses furent assises
Ensi con a la dame sist,
Mesire Yvains congiet li quist,
Que ele ne li donast mie
Se il a feme u a amie
Le volsist prendre et noçoier,
Affier n'encovenenchier.
Ains s'en parti isnel le pas,
Ne se laist convoier .i. pas,
Que ains n'i fist plus demoree.
Quant s'en parti, els pas n'agree,
C'onques rien n'i valut proiere;
Ains se mist a la voie entiere,
Si laissa mout la dame irie
Que il avoit faite mout lie.
Et com plus lie l'avoit faite,
Plus li poise et plus se dehaite
Que il ne velt plus demorer,
Car mout le volsist honorer,
Et sel fesist, se lui pleüst,
Segnor de quanques ele eüst,
U ele li eüst donees
Por son service grans soldees,
Si grans com il les volsist prendre.
Mais il n'i volt onques entendre
Parole d'onme ne de femme;
Des chevaliers et de la dame
S'est departis, mais bien lor plaist
Quant plus retenir ne lor loist.
(Mesire Yvains pensis chemine
que
Comment mesire Yvains conquist le lion)

37a.3335

Mesire Yains pensius chemine,
Que il ne cesse ne ne fine,
Par une parfonde gaudigne
U molt avoit de sauvechine,
Tant k'il oï parmi le gaut
.I. cri molt dolerous et haut.
Si adrecha droit vers le cri,
Cele part u il l'ot oï,
Et de tant com il plus l'aprochoit,
Li cris plus dolerous estoit;
Et quant il parvint cele part,
Vit .i. lion, en .i. essart,
Et .i. serpent ki le tenoit
Par le coue; se li avoit
Tos les crins ars de fu ardant.
N'ala mie loins esgardant
Mesire Yvains cele mervelle;
A soi meïsme se conselle
Alquel des .ii. il aidera.
Lors dist c'al lion secolra,
C'a venimex ne a felon
Ne doit on faire se mal non,

37b.3353

Et li serpens est venimeus,
Si li salt par la bouche feus,
Tant est de felonie plains.
Por ço pense mesire Yvains
K'il l'ocira premierement;
L'espee a traite et met avant
L'escu par de devant sa face,
Que li flamme mal ne li face
K'il jetoit hors parmi le goule,
Ki ert plus lee c'une coule.
Se li lions aprés l'assaut,
Li batalle ne li refaut;
Mais coi qu'il en aviegne aprés,
Aidier li volra il adiés,
Que pités li semont et prie
K'il face secors et aïe
A la beste gentil et franche.
A l'espee, ki souef trenche,
Va le felon serpent requerre;
Si qu'il le trenche jusqu'en tiere,
En .ii. moitiés le tronchone,
Fiert et refiert, et tant l'en done
Que trestot l'esmie et depieche.
Mais il li covient une pieche
Trenchier de la keue al lion,
Por le teste al serpent felon
Ki par le keue le tenoit;
Tant com trenchier en covenoit
En trencha, c'onques mains ne pot.
Quant le lion delivré ot,
Cuida c'a lui le covenist
Combatre et que sor lui venist;
Mais il ne le se pensa onques.
Oiés que li lions fist donques,
Il fist que fins et deboinaire,
Que il li conmencha a faire
Samblant que a lui se rendoit,
Et ses piés joins li estendoit.
Oiés con grant humilité
De beste de tele fierté,
Que vers tere encline sa chiere,
S'estut sor les .ii. piés derriere

37c.3393

Et puis aprés s'ajenoilloit
Et tote sa face molloit
De larmes, par humilité.
Mesire Yvains, par verité,
Set que li lions le merchie
Et que devant lui s'umelie
Por le serpent k'il avoit mort
Et lui delivré de la mort;
Si li plaist mout ceste aventure.
Por le venim et por l'ordure
Du serpent, ressue s'espee,
Si le ra el fuerre boutee,
Puis si se remet a la voie.
Et li lions les lui costoie,
Que jamais ne s'en partira,
Tosjors mais avec lui serra,
Que servir et garder le velt.
Devant a la voie s'aquelt.
Si com il s'en aloit devant,
Si a senti desous le vent
Bestes salvages en pasture;
Si le semont fains et nature
D'aler en proie et de cachier
Por sa vitalle porcachier;
Ce velt nature que il face.
.I. petit s'est mis en la trace
Tant c'a son segnor a mostré
Mout dolchement humilité,
K'il a flairiet dedens sa teste
Vent et flair de sauvage beste.
Voit venir son segnor a destre,
Puis le regarde et si s'arreste,
Car si le velt servir a gré,
Que encontre sa volenté
Ne volroit aler nule part.
Et cil parchoit a son esgart
Que il li mostre k'il l'atent;
Bien aparchoit, et bien entent,
Que se lui plaist, il remanra,
Et, s'il velt, il le prendera,
La venison k'il a sentie.
Lors le semont et si l'escrie

37d.3433

Aussi com .i. braket fesist;
Et li lions maintenant mist
Le nes al vent k'il ot senti;
Ne ne li ot de rien menti,
K'il n'ot pas .i. archie alee
Quant il vit en une valee
Tot seul pasturer .i. kievroel.
Celui prendera il sien voel,
Et il si fist al premier saut
Et si en but le sanc tot caut.
Quant ocis l'ot, si le jeta
Sor son col, et si l'aporta
Tant que devant son signor vint,
Qui puis en grant cherté le tint
Por la loialté qu'en lui sot.
Ja fu pres de nuit, si li plot
Que illuec se herbegeroit
Et de son kievroel prenderoit
Tant com il en volroit mangier.
Sel conmencha a escorchier;
Le cuir li fent dessos le coste,
De la longuece .i. lardé oste;
Et trait le fu d'un caillau bis,
Dont il a de la busche espris;
Et mist en une broche tost
Son lardé cuire al fu en rost;
Sel rosti tant que tos fu quis,
Mais del mangier fu li deduis,
K'il n'i ot pain ne vin ne sel
Ne nape ne cotel ne el.
Quant il menga, devant lui jut
Li lions, c'onques ne se mut;
Ains l'a tot adiés regardé
Tant con il ot de son lardé
Mangié tant que il n'en volt plus.
Et del kievroel tot le sorplus
Menga li lions jusc'as os.
Et il tint son chief a repos
Tote la nuit sor son escu,
A tel repos conme ce fu;
Et li lions ot tant de sens
K'il vella et fu en apens

6a.3475

Del cheval garder, ki paissoit
L'erbe, ki petit l'encraissoit.
Al main s'en ralerent ensamble
Et autel vie, ço me samble,
Com il orent la nuit menee
Menerent jusc'a l'ajornee*,
Et aprés tote la semaine,
Tant k'il vinrent a la fontaine
Sos le pin. Quant il vinrent la,
Por .i. poi que ne forsena
Mesire Yvains, a cele fie,
Quant la fontaine a aprochie
Et le perron et le capele.
Plus de .m. fois dolant s'apele
Et ciet pasmés, tant fu dolans.
Et s'espee, qui fu coulans,
Kiet del fuerre, si que li pointe
Es malles del hauberc sa pointe,
Tot droit el col, pres de la gole*.
N'i a malle qui n'en descloe,
Et s'espee del col li tranche
Res a res de la gorge blance,
Tant k'il en fist le sanc chaoir.
Li lions cuide mort veoir
Sson* compagnon et son segnor;
Ainc mais n'oïstes duel gregnor
A honme dire ne retraire,
Com il en conmencha a faire.
Il se dewitre et grate et crie
Et a talent que il s'ochie
A l'espee dont il est vis
Et voit son boin segnor occis.
A ses dens l'espee li oste
Et sor .i. fust gisant s'acoste
Et derriere a .i. tronc l'apuie,
Qu'ele ne guencisse ne fuie
Quant il hurtera de son pis.
Ja fust ses voloirs aconplis
Quant cil de pasmisons revint;
Et li lions son colp retint,
Qui a la mort tos atornés
Coroit conme pors dehossés

6b.3517

Qui ne prent garde u il se fiere.
Mesire Yvains en tel maniere
Dejoste le perron se pasme.
Al revenir mout fort se basme
De l'an que trespassé avoit,
Por coi sa dame le haoit,
Et dist: « Que fait qui ne se tue
Cis las qui joie s'a tolue?
Que fac jo, las, qui ne m'oci?
Comment puis jo demorer ci
Et veoir les coses ma dame?
En mon cors por coi remaint l'ame?
Et que fait ame en si las cors?
S'ele s'en ert alee fors,
Ne seroit pas en tel martire.
Haïr et blasmer et despire
Me doi mout, et jo, voir, si fas.
Ki per la joie et le soulas
Par son forfait et par son tort
Mout se doit bien haïr de mort.
Haïr et despire se doit;
Et jo, tant que nus ne me voit,
Por coi m'esparg ki ne me tu?
En'ai jo cest lion veü,
Ki por moi a si grant duel fait
K'i voloit m'espee entresait
Parmi son pis el cors bouter?
Et jo doi la mort redolter,
Qui ai* duel a* joie cangie?
De moi s'est li joie estrangie.
Joie? Quele? N'en dirai plus,
Car ço ne poroit dire nus;
S'ai demandee grant huiseuse.
Des joies fu li plus joieuse
Cele ki m'ert abandonee;
Mais mout m'i ot corte duree.
Et ki ço pert par son forfait,
N'est drois que boine aventure ait. »

Queque cil ensi se demente,
Une caitive, une dolente,
Estoit en la capele enclose,
Ki vit et oï cele chose

6c.3559

Par le mur ki estoit crevés.
Maintenant qu'il fu relevés
De pasmison, si l'apela:
« Diex, fait ele, ki est ço la?
Qui c'est ki se demente si? »
Et cil li respont: « Et vos, ki?
- Jo sui, fait ele, une caitive,
Li plus dolente riens qui vive. »
Et cil respont: « Tais, fole riens!
Tes mals si est et joie et biens
Avers le mal dont je languis.
Tant con li hom a plus apris
A delit et a joie vivre,
Tant le desvoie et plus l'enivre
Duels, quant il l'a, plus c'un autre home;
.I. febles hom porte grant sonme,
Par us et par acostumanche,
C'uns autres de grignor poissance
Ne porteroit por nule rien.
- Par foi, fait ele, jo croi bien,
Ceste parole est tote voire;
Mais ço ne refait mie a croire
Que vos aiés plus mal de moi,
Et por ço mie ne le croi,
K'il m'est avis que vos poés
Aler quel part que vous volés,
Et jo sui ci emprisonee;
Et si m'est tex raisons donee
Que demain serai ci requise
Et livree a mortel juïse.
- A! Diex, fait ...*, por quel mesfait?
- Sire, fait ele, ja Diex n'ait
De l'ame de mon cors merchi
Se jo l'ai mie desservi!
Et neporquant si vos dirai
Le mesfait, ja n'en mentirai,
Por coi jo sui mise en prison.
On m'apele de traïson
Et jo ne truis qui me desfende
Que on demain ne m'arde u pende.
- Or primes, fait il, puis jo dire
Que li miens duex et la moie ire

6d.3601

A la vostre dolor passee,
K'estre poriiés delivree
Par cui que soit de cest peril.
Dont ne poroit ço estre? - Oïl!
Mais jo ne sai encor par cui:
Il n'en sunt el monde que dui
Qui osassent vers .iii. emprendre
La batalle por moi desfendre.
- Comment? fait il. Sunt il dont troi?
- Oïl, sire, en la moie foi:
Troi sunt ki traïtre me claiment.
- Et ki sunt cil ki tant vos aiment,
Dont li uns si hardis seroit
K'encontre .iii. se combatroit
Por vos salver et garantir?
- Jo le vos dirai sans mentir:
Li uns est mesire Gauvains
Et li autres mesire Yvains,
Por cui serai demain a tort
Livree a juise de mort.
- Po* cui? fait il. C'avés vos dit?
- Sire, se Damediex m'aït,
Por le fil le roi Urien.
- Or vos ai entendue bien!
Mais vos n'i morrés ja sans lui.
Jo meïsmes cil Yvains sui
Por cui vos estes en esfroi;
Et vos estes cele, je croi,
Ki en la sale me gardastes;
Ma vie et mon cors me salvastes
Entre les .ii. portes coulans,
Et jo fui spensis et dolans
Et angoisçous et entrepris;
Mors i eüsse esté et pris
Se ne fust vostre boine aïe.
Or me dites, ma dolce amie,
Qui sunt cil qui de traïson
Vos apelent et en prison
Vos ont enclose en cest renclus.
- Sire, ne vos celerai plus
Puis qu'il vos plaist que jo vos die.
Voirs est que jo ne me fains mie

30a.3643

De vos aidier en boine foi.
Par l'amonestement de moi,
Ma dame a signor vos rechut;
Mon los et mon consel en crut,
Mais, par la sainte Paternostre,
Plus por son preu que por le vostre
Le cuidai faire et cuic encore,
Itant vos en reconois ore;
S'onor et vostre volenté
Porquis, se Diex me doinst santé.
Mais quant ço vit li senescaus,
Uns fel, .i. lere, .i. delloiaus,
Ki grant envie me portoit
Por ço que ele me creoit
Mout plus que lui de maint affaire,
Si vit mout bien k'il i pooit faire
Entre moi et li grant coros.
En plaine cort et voiant tos,
Li dist que por vos l'ai traïe,
Et jo n'euc consel ne aïe
Fors que moi, ki de fi savoie
C'onques vers ma dame n'avoie
Traïson faite ne pensee.
Si respondi, conme dervee,
Tot maintenant, sans consel prendre,
Que jo m'en feroie desfendre
Par .i. chevalier contre .iii..
Onques cil ne fu si cortois
Que il le dagnast reffuser,
Ne ressortir ne reüser
Ne m'en lut, por rien c'avenist.
Ensi a parole me prist;
Si me covint sans atargier
Encontre .iii. gage baillier,
Par respit de .xl. jours.
Puis ai esté en maintes cors.

A la cort le roi Artu fui,
N'i trovai consel de nului
N'ainc ne trovai qui me desist
De vos cose qui me sesist,
Car il n'en savoient noveles.
- Et mesire Gauvains, chaieles,

30b.3691

Li frans, li dols, u ert il donques?
A s'aïde ne falli onques
Damoisele desconseillie,
Que ne li fust aparellie.
- Se je adont trové l'eüsce,
Ja requerre ne li seüsce
Rien nule qui me fust vee*.
Mais la roïne en a menee
Uns chevaliers, ço me dist l'en,
Dont li rois fist que hors du sens,
Quant aprés lui l'en envoia,
Par Keu, ki aprés li mena
Dusc'al chevalier ki l'emmaine;
S'en est entrés en mout grant paine
Mesire Gauvains, ki le quiert.
Jamais nul jor a repos n'iert
Dusc'a tant k'il l'ara trovee.
Tote la verité provee
Vos ai de m'aventure dite.
Demain morrai de mort despite,
Si serai arse sans respit
Por mal de vos et por despit. »

Cil li respont: « Ja Dieu ne place
Que on por moi nul mal vos face!
Ja, tant con vive, ne morrés.
Demain atendre me porrés
Aparellié, lonc ma poissance,
De metre a vostre delivrance
Mon cors, si con jo le doi faire.
Mais de conter ne de retraire
Que jo sui venus ne vos calle!
Que c'aviegne de le batalle,
Gardés que on ne m'i conoisce.
- Certes, sire, por nule angoisce
Vostre non n'i descolverroie.
La mort ainsçois en sofferroie,
Puis que vos le volés issi.
Et neporquant forment vos pri
Que ja por moi ne remagniés.
Ne voel que por moi enpragniés
Batalle si tres felenesse.
Vostre merci de le promesse